ខេត្តក្រចេះជាប់ដងទន្លេ​មេគង្គ​ មានសហគ្រាសចំនួន ៧ កំពុង​ធ្វើអាជីវកម្មគ្រួស-ខ្សាច់ផ្គត់ផ្គង់​ការដ្ឋាន​សំណង់

លោក គង់ គឹមនី អភិបាលរងខេត្តក្រចេះបានឲ្យដឹងថា ក្នុងខេត្តក្រចេះមានសហគ្រាសធ្វើអាជីវកម្មគ្រួស-ខ្សាច់សំណង់ចំនួន ៧ សហគ្រាស ស្មើនឹង ៧ អាជ្ញាប័ណ្ណ ដែលកំពុង​ធ្វើ​អាជីវកម្ម​បូម​ក្រួស​ខ្សាច់​ពី​បាត​ទន្លេ​ដើម្បីផ្គត់ផ្គង់ការដ្ឋាន​សំណង់​នៅក្នុង​ខេត្ត​​។

លោក គង់ គឹមនី អភិបាលរងខេត្តក្រចេះ​បាន​បញ្ជាក់ថា អាជីវកម្មគ្រួស-ខ្សាច់សំណង់ដែល​កំពុង​ធ្វើអាជីវកម្ម​ក្នុង​ខេត្ត​ក្រចេះ ក្នុង​នោះនៅ​ក្រុងក្រចេះ​មាន​ចំនួន ៣ កន្លែង, ស្រុកចិត្របុរីមាន​ ១ កន្លែង, ស្រុកឆ្លូងមាន ១ កន្លែង និង​ស្រុកព្រែកប្រសប់មាន​ចំនួន ២ កន្លែង។

លោក គង់ គឹមនីបានគូស​បញ្ជាក់ថា សហគ្រាសដែល​ធ្វើអាជីវកម្មកាយគ្រួសនិងខ្សាច់ទាំងអស់ក្នុង​ខេត្ត​ក្រចេះ គឺ​មានទីតាំង​នៅតាម​ដង​ទន្លេមេគង្គ។

ពាក់ព័ន្ធ​ការធ្វើអាជីវកម្ម​ធនធាន​គ្រួសខ្សាច់នេះ មន្រ្តី​ក្រសួងធនធានទឹកនិងឧតុនិយម បាន​ជំរុញឲ្យគ្រប់ភាគីពាក់ព័ន្ធ អនុវត្តយន្តការគ្រប់គ្រង និងបទដ្ឋានបច្ចេកទេសសម្រាប់ការធ្វើអាជីវកម្មឲ្យមានប្រសិទ្ធភាព។

ក្នុង​ឱកាសអញ្ជើញ​​ចុះ​​ផ្សព្វផ្សាយ​ពី​បទដ្ឋានគតិយុត្ត យន្តការគ្រប់គ្រង និងបទដ្ឋានបច្ចេកទេសសម្រាប់ការធ្វើអាជីវកម្មខ្សាច់ ប្រកប​ដោយការទទួលខុសត្រូវនៅសាលប្រជុំសាលាខេត្តក្រចេះ កាលពី​ព្រឹកថ្ងែទី២១ ខែឧសភា ឆ្នាំ២០២៦ លោក ស៊ិន វិសិទ្ធ អនុរដ្ឋលេខាធិការក្រសួងធនធានទឹក និងឧតុនិយម បានជំរុញឲ្យគ្រប់ភាគីពាក់ព័ន្ធធ្វេីយ៉ាងណាត្រូវគ្រប់គ្រង និងអនុវត្តបទដ្ឋានបច្ចេកទេសឲ្យមានប្រសិទ្ធភាព ដើម្បីផ្ដល់អាជ្ញាប័ណ្ណដោយតម្លាភាព។

លោក ស៊ិន វិសិដ្ឋ អនុរដ្ឋលេខាធិការក្រសួងធនធានទឹក និងឧតុនិយម និងជាអនុប្រធានលេខាធិការដ្ឋានគណៈ​កម្មាធិការគ្រប់គ្រងធនធានខ្សាច់បានបញ្ជាក់ថា គណៈកម្មាធិការគ្រប់គ្រងធនធានខ្សាច់មានភារកិច្ចត្រួតពិនិត្យ និងតាមដានការធ្វើអាជីវកម្មធនធានខ្សាច់ ពាក់ព័ន្ធនឹងធនធានទឹក និងបច្ចេកទេសបូមខ្សាច់ស្របតាមបទដ្ឋានបច្ចេកទេសជលវិទ្យា និងជលគតិ។

លោកថា ការធ្វើអាជីវកម្មខ្សាច់ដោយគ្មានការគ្រប់គ្រងត្រឹមត្រូវ អាចបង្កឲ្យមានផលប៉ះពាល់ដល់បរិស្ថានក៏ដូចជាការបាក់ស្រុតច្រាំងទន្លេ ការបាត់បង់ជីវចម្រុះ និងប៉ះពាល់ដល់ជីវភាពរស់នៅរបស់ប្រជាពលរដ្ឋផងដែរ។ ដូច្នេះការរៀបចំយន្តការគ្រប់គ្រងឲ្យមានប្រសិទ្ធភាព និងការអនុវត្តបទដ្ឋានបច្ចេកទេសម៉ឺងម៉ាត់ជាកត្តាចាំបាច់៕

អត្ថបទ៖ ប្រុញ វិធិន