ព័ត៌មានជាតិ

វិស័យទេសចរណ៍រួមចំណែកប្រមាណ ៣០% នៃចំណូល GDP សម្រាប់ពលរដ្ឋខេត្តកំពត

បានផុស

៣ ម៉ោង មុន

នៅ

ថ្ងៃពុធ ១៥ កក្កដា ២០២៦

ដោយ

វិស័យទេសចរណ៍ជាប្រភពចំណូលដ៏សំខាន់សម្រាប់ពលរដ្ឋខេត្តកំពត ដោយបានរួមចំណែកប្រមាណពី ២០% ទៅ ៣០% នៃចំណូល GDP សរុបរបស់ខេត្ត។ នេះបើតាមការលើកឡើងរបស់លោក មឿង គង្គា អភិបាលរងខេត្តកំពតនៅក្នុងសន្និសីទបង្ហាញពីវឌ្ឍនភាពការងារប្រចាំឆមាសទី១ ឆ្នាំ២០២៦ របស់រដ្ឋបាលខេត្តកំពត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក មឿង គង្គា បានរំលេចពីសក្ដានុពលក្នុងខេត្តកំពត ជាខេត្តគោលដៅឆ្នេរសមុទ្រដ៏ទាក់ទាញមួយដែលមានចម្ងាយប្រមាណ ១៤៨ គីឡូម៉ែត្រពីរាជធានីភ្នំពេញ។

ខេត្តកំពតមានគោលដៅទេសចរណ៍សរុបប្រមាណ ៤២ ទីតាំង រួមមានទាំងសហគមន៍ទេសចរណ៍ចំនួន ៩ សហគមន៍ផ្សេងទៀត។

លោក មឿង គង្គា បានថ្លែងថា ដើម្បីទាក់ទាញទេសចរមកកម្សាន្តខេត្តតំបន់ឆ្នេរនេះបន្ថែមទៀត អាជ្ញាធរខេត្តបានរៀបចំទីតាំងសហគមន៍តាមឆ្នេរសមុទ្រ ដើម្បីទាក់ទាញភ្ញៀវទេសចរឱ្យមកកម្សាន្តកាន់តែច្រើនទាំងក្នុងរដូវប្រាំង និងរដូវវស្សា។ ការពង្រីកសក្ដានុពលទេសចរណ៍ទាំងតំបន់ធម្មជាតិ និងការកែច្នៃ គឺធ្វើយ៉ាងណាទាក់ទាញភ្ញៀវទេសចរឱ្យចង់មកកម្សាន្តហើយចង់ត្រឡប់មកម្ដងទៀត ដោយមិនមានភាពជិនណាយ។

តំបន់ទេសចរណ៍ និងសមិទ្ធផលថ្មីៗបានទាក់ទាញទេសចរមកកម្សាន្តខេត្តកំពតមានដូចជា រូបសំណាក់សេះសមុទ្រ ដែលជារូបសំណាក់ដ៏មានប្រជាប្រិយភាពបំផុត ដែលភ្ញៀវទេសចរអន្តរជាតិ និងជាតិមិនដែលរំលងក្នុងការទៅទស្សនា។ ការដំឡើងនាឡិកាយក្ស និងឧបករណ៍រាំតាមបទភ្លេងស្ថិតនៅមុខសាលាខេត្ត តាមបណ្ដោយមាត់ព្រែកកំពង់បាយ។

ការរៀបចំឆ្នេរខ្សាច់កម្សាន្តនៅតាមបណ្ដាញឆ្នេរកំពង់បាយរួមមាន ឆ្នេរកោះស្មៅ ឆ្នេរនៅចន្លោះស្ពានថ្មី និងស្ពានចាស់។ បន្ថែមពីនេះអាជ្ញាធរខេត្តបានក៏កំពុងរៀបចំ «បាតដៃសម្រាប់ថតរូប» ស្ថិតនៅចន្លោះស្ពានថ្មី និងស្ពានចាស់ តាមបណ្ដាញមាត់ព្រែកកំពង់បាយ ហើយបច្ចុប្បន្នជិតរួចរាល់ហើយ។

តាមរយៈរៀបចំបង្កើតសមិទ្ធផលថ្មីៗបន្តបន្ទាប់ លោក មឿង គង្គា រំពឹងថា នឹងបង្កើនការចាប់អារម្មណ៍សម្រាប់ភ្ញៀវទេសចរមកកម្សាន្តនៅក្នុងខេត្តកំពត ដែលនឹងអាចហក់កើនឡើងបន្ថែមទៀតនៅក្នុងឆ្នាំ ២០២៦ និង ២០២៧។

ពាក់ព័ន្ធសេវាកម្មស្នាក់នៅវិញ ខេត្តកំពតមិនមានបញ្ហាប្រឈមបញ្ហាផ្ទះស្នាក់សម្រាប់ភ្ញៀវទេសចរនោះទេ។ នេះបើតាមលោក មឿង គង្គា។

បច្ចុប្បន្ន ខេត្តមានបន្ទប់ស្នាក់នៅប្រមាណ ៥ ០០០ បន្ទប់ និងមានមូលដ្ឋានអាជីវកម្មទេសចរណ៍រួមមានបឹងហ្គាឡូ និងរីសតប្រមាណ ៦០០ អាជីវកម្ម សម្រាប់ទទួលទេសចរមកស្នាក់នៅកម្សាន្ត៕