ខេត្ត​កំពត​មាន​រោងចក្រ​ផលិត​ស៊ីម៉ងត៍​ចំនួន ៤ ដំណើរការ ក្រោម​ទុន​វិនិយោគ​ប្រមាណ ៨០០ លាន​ដុល្លារ

ខេត្ត​កំពត​ស្ថិត​នៅ​ទិស​នីរតី​​បច្ចុប្បន្ន​មាន​រោងចក្រ​ផលិតស៊ីម៉ងត៍ចំនួន ៤ កំពុង​ដំណើរការ​ផលិត​ស៊ីម៉ងត៍​ ដើម្បី​ផ្គត់ផ្គង់​តម្រូវការ​សាងសង់​សំណង់ផ្សេងៗ។

លោក មឿង គង្គា អភិបាល​រង​ខេត្ត​កំពត​បាន​គូស​បញ្ជាក់​ថា នៅ​ក្នុង​ខេត្ត​កំពត​មាន​រោងចក្រ​ផលិត​ស៊ីម៉ងត៍​​ចំនួន ៥ ប៉ុន្តែ​​មានតែ​ ៤ កំពុង​ដំណើរការ ក្រោម​ទុន​វិនិយោគ​​ប្រមាណ ៨២០ លាន​ដុល្លារ ខណៈ​សមត្ថភាព​អាច​ផលិត​បាន​ប្រមាណ​ជា ៧ លាន​តោន​ក្នុង​មួយឆ្នាំ។

លោកបញ្ជាក់ថា ស៊ីម៉ងត៍​ដែល​ផលិត​បាន​ក្នុង​ខេត្ត​​ មិន​មាន​ការនាំចេញ​ទៅ​ក្រៅ​ប្រទេស​ឡើយ ពោល​ត្រូវ​​បាន​​លក់ និង​ចែកចាយ​សម្រាប់​តែ​ទីផ្សារ​ក្នុង​ស្រុក​ប៉ុណ្ណោះ។

ក្រុមហ៊ុន​ទាំង ៤ កំពុង​ផលិត​ស៊ីម៉ងត៍​​ក្នុង​ខេត្ត​កំពត​រួមមាន៖ ក្រុមហ៊ុន ចក្រី​ទីង ក្រុមហ៊ុន ជីប ម៉ុង ក្រុមហ៊ុន ខេស៊ីមិន (K-Cement) និង​ក្រុមហ៊ុន ថៃ ប៊ុនរ៉ុង។

លោក មឿង គង្គា បាន​បញ្ជាក់​ថា ចំនួន​កម្មករ​និង​បុគ្គលិក​ដែល​បម្រើ​ការងារ​នៅ​ក្នុង​រោងចក្រ​ផលិត​ស៊ីម៉ងត៍​ក្នុង​ខេត្ត​កំពត​មាន​ប្រមាណ​ជា ២ ០០០ នាក់។

លោក​អះអាង​ថា ក្រុមហ៊ុន​ធំៗ​ទាំងបួន​នេះ គឺជា​ក្រុមហ៊ុន​ដ៏​សំខាន់​ក្នុង​ការ​ទ្រទ្រង់ និង​អភិវឌ្ឍ​សេដ្ឋកិច្ច​ផ្នែក​ឧស្សាហកម្ម​ធុន​ធំ​នៅ​ក្នុង​ខេត្ត​កំពត។

របាយការណ៍​ពី​សមាគមឧស្សាហកម្មស៊ីម៉ងត៍កម្ពុជា​បាន​បង្ហាញ​ថា បច្ចុប្បន្ន​នេះ​កម្ពុជា​មាន​ក្រុមហ៊ុន​ផលិត​ស៊ីម៉ងត៍​ចំនួន ៦ កំពុង​ដំណើរការ រួម​មាន ក្រុមហ៊ុនកំពត ស៊ីមេន (Kampot cement co.,Ltd), ក្រុមហ៊ុន​ជីបម៉ុង អ៉ិនស៊ី ស៊ីមេន ខបភើរេសិន (Chip Mong Insee Cement Corporation), ក្រុមហ៊ុន​ស៊ីម៉ង់​ត៍ ចក្រី​ទីង (Cambodia Cement Chakrey Ting Factory Co., Ltd), ក្រុមហ៊ុន​បាត់ដំបង ខនស៍ ស៊ីមេន (Battambang Conch Cement Company Limited), ក្រុមហ៊ុន ស៊ីម៉ងត៍ ថៃ ប៊ុនរ៉ុង ខមភេនី លីមីធីត (Thai Boom Roong Cement Co.,Ltd) និង​ក្រុមហ៊ុន ខនស៍ខេធី (ខេធី) ស៊ីមេន ឯ.ក ( Conch KT Cement Company Limited) ដែល​មាន​សមត្ថភាព​ផលិត​រហូតដល់ជាង ១២ លានតោនក្នុងមួយឆ្នាំ៕