ក្រសួងការងារគ្រោងសាងសង់អគារតេជោសែនវិទ្យាសាស្រ្ត និងបច្ចេកវិទ្យាជាន់ខ្ពស់កម្ពស់៥ជាន់នាពេលខាងមុខ

ភ្នំពេញ៖ ក្រសួងការងារនិងបណ្តុះបណ្តាលវិជ្ជាជីវៈ គ្រោងនឹងសាងសង់អគារតេជោសែនវិទ្យាសាស្រ្ត  និងបច្ចេកវិទ្យាជាន់ខ្ពស់កម្ពស់៥ជាន់នាពេលខាងមុខដើម្បីលើកកម្ពស់ការអភិវឌ្ឍធនធានមនុស្ស និងគុណភាពបណ្តុះបណ្តាលបច្ចេកទេស និងវិជ្ជាជីវះឱ្យកាន់តែប្រសើរឡើងថែមទៀត។

គម្រោងសាងសសង់អគារតេជោសែនវិទ្យាសាស្រ្ត  និងបច្ចេកវិទ្យាជាន់ខ្ពស់កម្ពស់៥ជាន់ត្រូវបានលោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានបើក កិច្ចប្រជុំគណ:កម្មការអន្តរក្រសួងរវាងក្រសួងការងារ និងបណ្តុះបណ្តាលវិជ្ជាជីវៈ​ និងក្រសួងសេដ្ឋកិច្ច​ និងហិរញ្ញវត្ថុដើម្បីពិនិត្យ​ និងអនុម័តលើគម្រោង សាងសង់គម្រោងខាងលើកាលពីថ្ងៃទី២៣ ខែមិថុនា ឆ្នាំ២០២១។

បើតាម លោក បណ្ឌិត អ៊ិតសំហេង បានមានប្រសាសន៍ថាគម្រោងការសាងសង់មានហេដ្ឋារចនាសម្ព័ន្ធ  និងបំពាក់សម្ភារបរិក្ខារបច្ចេកទេស  ក្នុងអគារតេជោសែនវិទ្យាសាស្រ្ត និងបច្ចេកទេសជាន់ខ្ពស់ និងអគាររោងជាងមានស្រាប់ក្នុងបរិវេណវិទ្យាស្ថានជាតិពហុបច្ចេកទេសកម្ពុជា (NPIC) ដែលសាងសង់​ និងផ្គត់ផ្គង់ដោយក្រុមហ៊ុន សូផល ហូលឌីង ខូអិលធីឌី  និងក្រុមហ៊ុន សង្វា ពេជ្រ ខូអិលធីឌី។

លោក រដ្ឋមន្ត្រីបានបន្តថា គម្រោងសាងសង់អគារតេជោសែនវិទ្យាសាស្រ្ត  និងបច្ចេកវិទ្យាជាន់ខ្ពស់​ គឺជាគម្រោងដ៏មានសារៈសំខាន់ដើម្បីលើកកម្ពស់ការអភិវឌ្ឍធនធានមនុស្ស​ និងគុណភាពបណ្តុះបណ្តាលបច្ចេកទេស​ និងវិជ្ជាជីវះ​​ ជាពិសេសការធ្វើពិពិធកម្មឧស្សាហកម្មទៅលើផ្នែកផ្សេងទៀតដូចជា​ បរិក្ខារអគ្គីសនី​ គ្រឿងបង្គុំអេឡិចត្រូនិច​ ការតំឡើងគ្រឿងយន្ត​ ការកែច្នៃចំណីអាហារ​ និងផលិតផលកសិកម្ម​ ឱ្យស្របតាមតម្រូវការបដិវត្តឧស្សាហកម្មដំណាក់កាលទី៤​ ដែលកំពុងអភិវឌ្ឍទៅមុខឥតឈប់ឈរ​ ក្នុងការផ្លាស់ប្តូរសេដ្ឋកិច្ចផ្អែកលើធនធនធម្មជាតិ​ ទៅជាសេដ្ឋកិច្ចផ្អែកលើចំណេះដឹង​ សំដៅបង្កើតបាននូវកម្លាំងពលកម្មប្រកបដោយសក្តានុពល​ ក្រោយពេលវិបត្តិនៃការរីករាលដាលនៃជំងឺកូវីដ១៩​ បានថមថយ​ ឬរលត់បាត់ទៅទាំងស្រុង៕

សំអឿន