ព័ត៌មានជាតិ

ចំនួនអ្នកស្លាប់ដោយសារពុលស្រា ស ស្រាថ្នាំ នៅស្រុកកំពង់ត្រាចកើនឡើងដល់១៦នាក់ហើយ

បានផុស

៥ years មុន

នៅ

ថ្ងៃពុធ ៧ កក្កដា ២០២១

ដោយ

រហូតមកដល់ពេលនេះ ចំនួនអ្នកស្លាប់ដោយសារពុលស្រា ស ស្រាថ្នាំនៅភូមិកោះឈ្វាំង ឃុំស្វាយទងខាងត្បូង និងភូមិ ឈើទាលរាំ ឃុំស្វាយទងខាងជើង ស្រុកកំពង់ត្រាច ខេត្តកំពត បានកើនឡើងដល់ចំនួន១៦នាក់ហើយ ក្នុងនោះស្រី៩នាក់ក្នុងចំណោមអ្នករងគ្រោះចំនួន៥៥នាក់ ស្រី១៩នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក វេជ្ជបណ្ឌិត ញា ប៊ុនថន ប្រធានមន្ទីរសុខាភិបាលខេត្តកំពត បានមានប្រសាសន៍នៅយប់ថ្ងៃទី៦កក្កដានេះថា ករណីឈឺដែលសង្ស័យបណ្តាលមកពីការពុលស្រាចាប់ពីថ្ងៃទី០២ដល់ថ្ងៃទី០៥ ខែកក្កដា ឆ្នាំ២០២១ មានចំនួនសរុប ៥៥នាក់ស្រី១៩នាក់។ ក្នុងចំណោមអ្នកឈឺ ៥៥នាក់ មានអ្នកស្លាប់ចំនួន ១៦នាក់ស្រី០៩នាក់។ ក្នុងនោះករណីឈឺនៅក្នុងភូមិកោះឈ្វាំងមាន៤៥ករណីស្រី១៦នាក់ ក្នុងនោះស្លាប់១៥នាក់ស្រី០៨នាក់និងនៅ ភូមិឈើទាលរាំ ឃុំស្វាយទងខាងជើង មានអ្នកឈឺចំនួន១០នាក់ស្រី០៤នាក់ ក្នុងនោះមានស្លាប់ ០១នាក់ស្រី។

លោកវេជ្ជបណ្ឌិត បានបន្តថា ជនរងគ្រោះស្ទើរទាំងអស់បានចូលរួមពិធីបុណ្យសពឈ្មោះ “តេង ហ៊ុយ” នៅថ្ងៃទី០២ ខែកក្កដា ឆ្នាំ២០២១ ហើយក្នុងពិធីបុណ្យសពហ្នឹង អ្នកដែលបាននៅកំដរបុណ្យសពភាគច្រើនបានទទួលទានស្រាស ស្រាត្រាំថ្នាំ និង សម្ល ខពោះជ្រូកជាមួយឆៃប៉ូវ ។

លោកវេជ្ជបណ្ឌិត បានបន្តថា បន្ទាប់ពីការសម្ភាសន៍ជាមួយអ្នកឈឺ និងក្រុមគ្រួសាររបស់អ្នកស្លាប់ឃើញថាជនរងគ្រោះភាគច្រើនមានរោគសញ្ញាដូចជា ស្រវាំងភ្នែក ព្រិលភ្នែក ណែនដើមទ្រូង ចុកទ្រូង ថប់ដង្ហើម វិលមុខ ត្រជាក់ដៃជើង ងុយដេក ក្អួត រាក ឈឺក្បាល ធេងធោង អស់កម្លាំង ទន់ដៃទន់ជើង និង បាត់ស្មារតី សន្លប់។

លោក វេជ្ជបណ្ឌិត បានបន្តទៀតថា តាមការសន្និដ្ឋានដោយផ្អែកតាមសញ្ញាគ្លីនិកនិងការវិភាគលើចំនួនអ្នកបានផឹកស្រា ស ឬ ស្រាថ្នាំ និងនិយមន័យនៃការពុលមេតាណុល ក្រុមការងារអាចទាញសេចក្តីសន្និដ្ឋានបានថា ទាំងអ្នកស្លាប់ និងអ្នកឈឺ គឺអាចបណ្តាលមកពីការទទួលទានស្រា ស ឬ ស្រាថ្នាំដែលមានជាតិមេតាណុលខ្ពស់។ យ៉ាងណាក៏ដោយ លោកប្រធានមន្ទីរសុខាភិបាលបានបញ្ជាក់ថា ក្រុមការងារអាចប្រមូលសំណាកស្រា ស ទាំងនោះបញ្ជូនទៅមន្ទីរពិសោធន៍របស់ក្រសួងសុខាភិបាលរួចហើយ ដើម្បីធ្វើការវិភាគរកជាតិមេតាណុល។

លោក វេជ្ជបណ្ឌិត ញា ប៊ុនថន បានអំពាវនាវដល់បងប្អូនប្រជាពលរដ្ឋកុំពិសា ស្រាស ស្រាថ្នាំ ដែលគ្មានប្រភពច្បាស់លាស់ ការផលិតគ្មានបច្ចេកទេស គ្មានការត្រួតពិនិត្យគុណភាពពីមន្ត្រីជំនាញ និងកុំយកជាតិមេតាណុល មកលាយធ្វើស្រាហូប ដែលធ្វើប៉ះពាល់ដល់សុខភាពធ្ងន់ធ្ងរ និង រហូតដល់ស្លាប់។ ចំណែក រដ្ឋបាលខេត្តកំពត បានប្រកាសផ្អាកអាជីវកម្មផលិតស្រាដែលគ្មានច្បាប់អនុញ្ញាតពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នៅទូទាំងខេត្តផងដែរ៕

អត្ថបទ៖ សំអឿន

Related Topics:ខេត្តកំពត ពុលស្រាស្លាប់

សេចក្ដីជូនដំណឹង៧ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា