ព័ត៌មានជាតិ
គម្រោងផ្លូវក្រវាត់ក្រុងទី ៣ ត្រូវសាងសង់ស្ពានកាត់ទន្លេពីរទៀតនៅក្តីតាកុយ និងកោះដាច់
ផ្លូវក្រវាត់ក្រុងទី ៣ ដែលកំពុងស្ថាបនាបានជាង ៦០ ភាគរយ នឹងមានការសិក្សាបន្តលើការសាងសង់ស្ពានឆ្លងកាត់ទន្លេពីរទៀត ដើម្បីតភ្ជាប់ក្លាយជាផ្លូវក្រវាត់ក្រុងពេញលេញ។
ទេសរដ្ឋមន្រ្តី និងជារដ្ឋមន្រ្តីក្រសួងសាធារណការបានថ្លែងក្នុងកម្មវិធីផ្សាយផ្ទាល់ពិសេសកាលពីម្សិលមិញនេះថា ផ្លូវក្រវាត់ក្រុងទី ៣ ដែលបានសាងសង់សម្រេចបានពាក់កណ្តាលទៅហើយនេះ ចាំបាច់ត្រូវមានការសាងសង់ស្ពានកាត់ទន្លេពីរទៀត ដើម្បីតភ្ជាប់កំណាត់ផ្លូវនេះឲ្យបានពេញលេញ។
រដ្ឋមន្រ្តី ស៊ុន ចាន់ថុល បានបញ្ជាក់ថា ផ្លូវក្រវាត់ក្រុងទី ៣ ដែលកំពុងដំណើរការការដ្ឋានសាងសង់បច្ចុប្បន្ននេះជាគម្រោងពាក់កណ្តាលក្រវាត់ប៉ុណ្ណោះ។ ដើម្បីឲ្យផ្លូវក្រវាត់នេះពេញលេញ ត្រូវសិក្សាក្នុងការសាងសង់ស្ពានកាត់ទន្លេពីរទៀត នៅត្រើយខាងកើតទន្លេមេគង្គគឺនៅក្តីតាកុយ និងនៅកោះដាច់ ដើម្បីតភ្ជាប់ចរាចរណ៍ឲ្យក្លាយជាផ្លូវក្រវាត់ក្រុងពេញលេញ។
ផ្លូវក្រវ៉ាត់ក្រុងទី៣ ជាខ្សែផ្លូវថ្មីដែលតភ្ជាប់ផ្លូវជាតិសំខាន់ៗ ដោយចាប់ពីស្ពានព្រែកព្នៅនៅផ្លូវជាតិលេខ៥ ឆ្លងមកផ្លូវជាតិលេខ៤ ភ្ជាប់មកផ្លូវជាតិលេខ៣ ផ្លូវជាតិលេខ២ ផ្លូវជាតិលេខ២១ និងផ្លូវជាតិលេខ១ ភ្ជាប់មកកំពង់ផែភ្នំពេញថ្មី។
គម្រោងសាងសង់ផ្លូវក្រវាត់ក្រុងខ្សែទី៣នេះ ក៏តភ្ជាប់ទៅនឹងផ្លូវទំនប់កប់ស្រូវ ផ្លូវជាតិលេខ៥ និងភ្ជាប់ទៅនឹងស្ពានឈ្នះឈ្នះនិង មហាវិថីឈ្នះឈ្នះ និងផ្លូវជាតិលេខ៦ តែត្រូវស្ថាបនាស្ពានឆ្លងកាត់ទន្លេពីរទៀតនៅត្រើយខាងកើតទន្លេមេគង្គ ដើម្បីតភ្ជាប់ប្រែក្លាយទៅជាផ្លូវក្រវាត់ក្រុង បម្រើបណ្តាញដឹកជញ្ជូនវាងរាជធានីភ្នំពេញ។
ផ្លូវក្រវាត់ក្រុងទី ៣ មានការសាងសង់ស្ពានអាកាសឆ្លងកាត់ចំនួន០៤កន្លែង (ឆ្លងកាត់ផ្លូវជាតិលេខ៤ លេខ៣ លេខ២ និងលេខ២១) ប្រវែងសរុប ១,០០០ម៉ែត្រ រួមទាំងស្ពានឆ្លងកាត់ទន្លេបាសាក់ ០២កន្លែង ត្រង់កោះអន្លង់ចិន ប្រវែងសរុប ៩៩៦ម៉ែត្រ (ក្នុងនោះស្ពានបាសាក់ខាងកើតប្រវែង ៦៣០ម៉ែត្រ និងស្ពានបាសាក់ខាងលិច ប្រវែង៣៦៦ម៉ែត្រ)។
ក្រៅពីផ្លូវក្រវាត់ក្រុងទី ៣ រដ្ឋាភិបាលបានដាក់ផែនការក្នុងការស្ថាបនាផ្លូវក្រវាត់ក្រុងទី៤។ បើតាមលោករដ្ឋមន្រ្តី ការស្ថាបនាផ្លូវក្រវាត់ក្រុងទី ៤ ជាគម្រោងបន្ទាប់ ក្រោយផ្លូវក្រវាត់ក្រុងទី ៣ បានសាងសង់បញ្ចប់បានពេញលេញ។
បើតាមការសិក្សាកន្លងមក ផ្លូវក្រវាត់ក្រុងទី ៤ មានប្រវែង ១៩៥គីឡូម៉ែត្រ ឆ្លងកាត់ខេត្តចំនួន៤ គឺខេត្តកំពង់ស្ពី តាកែវ កណ្តាល និងខេត្តព្រៃវែង ដោយកាត់ខេត្តកំពង់ស្ពីចំនួន ៣ស្រុក, ខេត្តតាកែវចំនួន ១ស្រុក, ខេត្តកណ្តាល ៨ ស្រុក និងខេត្តព្រៃវែង ២ស្រុក។
គម្រោងស្ថាបនាផ្លូវក្រវាត់ក្រុងទី៤ នឹងជួយសម្រួលដល់ការដឹកជញ្ជូនទំនិញទៅកាន់ផ្លូវជាតិផ្សេងៗ និងទៅកាន់ព្រំដែនប្រទេសវៀតណាម ប្រទេសថៃ បានកាន់តែលឿន ចំណេញពេលវេលា កាត់បន្ថយការចំណាយបានមួយកម្រិតទៀត៕
អត្ថបទ៖ ប៊ុណ្ណារ៉ា
-
ព័ត៌មានជាតិ១ សប្តាហ៍ agoផ្លូវជាតិថ្មីកាត់ពីខេត្តបាត់ដំបងទៅខេត្តសៀមរាប និង ផ្លូវជាតិលេខ ៦០បេ កំពុងជំរុញឈានទៅបើកការដ្ឋានសាងសង់នៅពេលខាងមុខ
-
ព័ត៌មានជាតិ១ ថ្ងៃ agoត្រីជាង ២ តោន ងាប់នៅតំបន់អភិរក្សតាមោក ខេត្តសៀមរាប ដោយសារទឹករាក់ និង អាកាសធាតុក្តៅខ្លាំង
-
ចរាចរណ៍១ សប្តាហ៍ agoករណីគ្រោះថ្នាក់រថយន្ដដឹកកម្មកររោងចក្រនៅកំពង់ឆ្នាំង និងស្វាយរៀង មានជនរងគ្រោះស្លាប់សរុប ១៣នាក់ និងរបួសធ្ងន់ស្រាលជាង៣០នាក់
-
ព័ត៌មានជាតិ១ សប្តាហ៍ agoអភិបាលខេត្ត និងតំណាងរាស្ត្រ ចុះពិនិត្យដល់ទីតាំងភ្លាមៗក្រោយមានគ្រោះថ្នាក់ចរាចរណ៍នៅស្រុកកំពង់ត្រឡាច
-
ព័ត៌មានជាតិ១ ថ្ងៃ agoរដូវវស្សាប្រុងប្រយ័ត្ន! គ្រោះរន្ទះបាញ់សម្លាប់គោ ១៩ក្បាល នៅស្រុកលំផាត់ ខេត្តរតនគិរី
-
ព័ត៌មានអន្ដរជាតិ១ សប្តាហ៍ agoអាមេរិក ជំរុញឱ្យសម្ព័ន្ធមិត្តណាតូ ជួយរួមដៃគ្នាបញ្ចប់សង្គ្រាមអ៊ីរ៉ង់
-
សេដ្ឋកិច្ច៥ ថ្ងៃ agoអតីតនិស្សិតពេទ្យសត្វម្នាក់ ចាប់របរចិញ្ចឹមមាន់សាច់រកចំណូលបានសមរម្យផ្គត់ផ្គង់គ្រួសារ
-
សន្តិសុខសង្គម១៥ ម៉ោង agoឆ្លងចរន្តអគ្គិសនីឆេះរោងចក្រផលិតស័ង្កសី គាបស្នោ ១ កន្លែង រងការខូចខាត នៅសង្កាត់ត្រពាំងក្រសាំង