បាក់ស្រុត​ច្រាំងទន្លេ​ទើបសាង​សង់នៅខេត្ត​កំពង់ឆ្នាំង​

ច្រាំងទន្លេខាងមុខ​ អធិការនគបាលស្រុកកំពង់លែង ខេត្តកំពង់ឆ្នាំង បានរងនូវការបាក់ស្រុតទៅក្នុងទន្លេ ខណៈការសាងសង់ទើបសម្រេចបានប្រមាណជា​៧០%ប៉ុណ្ណោះ។

ហេតុការណ៍នេះ​បានកើតនៅវេលាម៉ោង១៖៣០នាទីយប់ឈានចូលថ្ងៃទី១៤ ខែកញ្ញា ឆ្នាំ២០២១​ស្ថិតក្នុងភូមិកំពង់បឹងឃុំកំពង់ហៅ ស្រុកកំពង់លែងខេត្តកំពង់ឆ្នាំង។

សេចក្តីរាយការណ៍ពីស្រុកកំពង់លែងបានឱ្យដឹងថានៅយប់កើតហេតុនោះមានភ្លៀងខ្លាំងបណ្តាលច្រាំងទន្លេបាក់ស្រុះធ្លាក់ទាំងផ្ទាំងៗចុះទៅក្នុងទន្លេ។

ច្រាំងទន្លែនេះត្រូវ​បានសាងសង់ដោយរដ្ឋបាលខេត្តកំពង់ឆ្នាំងដែលមានប្រវែង ១៥០ ម៉ែត្រ និងជើងទេ ៧ ម៉ែត្រ ហើយការសាងសង់ច្រាំងទន្លេនេះត្រូវបានក្រុមហ៊ុនក្នុងស្រុកមួយដែលគេស្គាល់ ឈ្មោះ ប៊នឌីម៉ង់ ជាអុ្នកមៅការសាងសង។

លោក ចេង ចាន់ដូណា អភិបាលរងស្រុកកំពង់លែងបានឱ្យដឹងនៅព្រឹកថ្ងៃទី១៤កញ្ញានេះថា សំណង់ច្រាំងទន្លេនេះទើបតែបានសាងសង់ ប្រមាណជា១ខែប៉ុណ្ណោះហើយការបាក់ស្រុតបណ្តាលឱ្យខូចខាត សំណង់នេះខាងក្រុមហ៊ុននឹងបន្តធ្វើឡើងវិញ ហើយការសាងសង់ទើបធ្វើបានប្រមាណជា៧០%ដោយមិនទាន់បញ្ចប់កុងត្រានៅឡើយទេ។

ប្រជាពលរដ្ឋ និងអ្នកជំនាញខាងសំណង់មួយចំនួនបានរិះគន់ចំពោះក្រុមហ៊ុន សំណង់ឈ្មោះថា ប៊នឌីម៉ង់ ដែលសាងសង់មិនត្រឹមត្រូវតាមបច្ចេកទេស គ្រាន់តែភ្លៀងមួយមេធ្វើ ឲ្យច្រាំងទន្លេនេះបាក់ស្រុតទាំងផ្ទាំងៗបែបនេះ សំណាងហើយការសាងសង់ស្ថិតក្នុងកុងត្រានៅឡើយ ប្រសិនបើផុតកុងត្រាតែមួយថ្ងៃ រដ្ឋបាលស្រុក ឬ ខេត្តច្បាស់ជានិយាយ មិនចេញទេ ព្រោះមិនដឹងអ្នកណាមកសង មានតែរដ្ឋត្រូវខាតបង់តែប៉ុណ្ណោះ ៕

អត្ថបទៈណារី