ជំនន់ទឹកភ្លៀង លិចកំណាត់ផ្លូវជាតិលេខ៦ និងលេខ៧ មន្ត្រីចុះរំដោះទឹក បញ្ចៀសការ​លិចលង់ ក្នុងស្រុកព្រៃឈរ

ជំនន់ទឹកភ្លៀង បានបណ្តាលឱ្យជន់លិចកំណាត់ផ្លូវជាតិ លេខ ៦ និងលេខ ៧ ក្នុងស្រុកបាធាយ និងស្រុកព្រៃឈរ។

គិតត្រឹមល្ងាច ថ្ងៃទី ២០ ខែកញ្ញា ឆ្នាំ២០២១នេះ មន្ត្រីជំនាញ និងអាជ្ញាធរបានរកវិធីរំដោះទឹកឱ្យចេញពីផ្លូវបានចំនួន ២​កន្លែងហើយ និងនៅសល់ ១ កន្លែងទៀត ដែលមានចម្ងាយជាង ២០០ ម៉ែត្រ ទឹកកំពុងហូរកាត់ផ្លូវ ចំណែកឯការចរាចរវិញ នៅតែដំណើរការធម្មតា តែរថយន្តត្រូវបើកបន្ថយល្បឿន។

តាមការឲ្យដឹងពីមន្ត្រីជំនាញបានបញ្ជាក់ថា នៅល្ងាចថ្ងៃទី ២០ កញ្ញានេះ មានទីតាំងជំនន់ទឹកភ្លៀងបានលិច ចំនួន ៣កន្លែងគឺនៅស្រុកបាធាយ ១ កន្លែង លើផ្លូវជាតិលេខ៦ និង១ កន្លែង លើផ្លូវជាតិលេខ៧ ស្ថិតក្នុង ឃុំមៀន ស្រុក ព្រៃឈរ ហើយទាំង ២ទីតាំងនេះ ស្ថាប័នជំនាញ សហការជាមួយអាជ្ញាធរកាយជាប្រឡាយរំដោះ ទឹកចេញពីថ្នល់ ហើយ។

ដោយឡែក ១កន្លែទៀត នៅចំណុចលើ កំណាត់ ផ្លូវជាតិ លេខ៧ ស្ថិតក្នុងឃុំខ្វិតធំ ស្រុកព្រៃឈរវិញ ទឹកនៅ ហូរកាត់ថ្នល់ជម្រៅប្រហែលត្រឹមជង្គង់ចម្ងាយជាង ២០០ម៉ែត្រនៅឡើយ។

ក្រុមការងារ និងសម្រេចឱ្យគ្រឿងចក្រ កាយរំដោះទឹកចេញពីតំបន់នោះដើម្បីបញ្ចៀសការលិចលង់ផ្លូវជាតិលេខ៧ លំនៅដ្ឋានប្រជាពលរដ្ឋ សាលារៀន វត្តអារាមផងដែរ៕

អត្ថបទ៖ ហុង ម៉េងហៀង