ក្ងោក មានតម្លៃខ្ទង់ពាន់ដុល្លារ ជាសត្វកម្រមានអ្នកចិញ្ចឹម

សត្វក្ងោកកម្រមានអ្នកចិញ្ចឹម ហើយក៏ជាសត្វស្លាបដ៏ស្រស់ឆើត សំដៅទៅដោយរោមពណ៌ចម្រុះនៅពេលដែលសត្វក្ងោកត្រដាងស្លាបម្តងៗ ចេញជារង្វង់មូលបញ្ចេញនូវពន្លឺពណ៌ផ្លេកៗ គួរឲ្យចង់គយគន់ជាខ្លាំង។

សត្វក្ងោកធ្លាប់តែឃើញក្នុងព្រៃជ្រៅ ឬនៅតាមរមណីយដ្ឋានដែលគេយកមកចិញ្ចឹម ដើម្បីទាក់ទាញភ្នែកទេសចរណ៍ ឥឡូវថ្មីៗនេះ មានសត្វក្ងោកនាំចូលពីថៃ ដាក់លក់តាមបណ្តាខេត្ត ហើយបើតាមការរៀបរាប់របស់បងស្រី ផល្លា ដែលជាអ្នកលក់បន្ត តាមរយៈការផ្សព្វផ្សាយអនឡាញនៅស្រុកអង្គរជ័យ ខេត្តតាកែវ។

បងស្រី ផល្លា បន្តថា កូនសត្វក្ងោកដែលមានទំងន់៨ខាំ អាចលក់ចេញបានក្នុង១ក្បាលថ្លៃ ២៧០ដុល្លារ ដោយឡែកសត្វក្ងោកដែលមានទំងន់ ៤ គីឡូក្រាម ទៅ ៥ គីឡូក្រាម កំពុងពេញវ័យអាចលក់បាន១ក្បាល១០០០ដុល្លារ។

ពូជក្ងោកនាំចូលនេះ មាន ២ ប្រភេទ គឺប្រភេទក្ងោកដាង និងប្រភេទក្ងោកត្រូលវិញ។ ចំពោះចំណីរបស់សត្វក្ងោកនេះងាយស្រួលចិញ្ចឹម ដោយសារវាស៊ីស្រូវដូចសត្វចិញ្ចឹមក្នុងស្រុកផងដែរ។

បងស្រី ផល្លា បន្តទៀតថា សត្វក្ងោកនេះ មានអាយុវែងចាប់ពី ២៥ ឆ្នាំ ទៅ ៣០ ឆ្នាំ ហើយអ្នកដែលចង់យកទៅចិញ្ចឹមគឺសម្រាប់លម្អផ្ទះ ក៏ដោយសារតែសត្វក្ងោកនេះមានស្លាបចម្រុះពណ៌ល្អស្អាត គួរជាទីទាក់ទាញភ្នែក អ្នកដែលចង់ឃើញរូបវាបង្ហាញរាង៕

អត្ថបទ៖ កញ្ញា វ៉ាត

ចុចអាន៖សេដ្ឋកិច្ច​ធ្លាក់​ចុះ​គ្រប់កន្លែង​អំឡុង​ពេល​កូវីដ តែ​យុវជន​ម្នាក់​បែរ​ជា​កាក់កប​ជា​មួយ​របរ​នេះ​ទៅ​វិញ