ព័ត៌មានជាតិ

ខេត្តចន្ទបុរី ត្រៀមទទួលពលករខ្មែរតាមកិច្ចព្រមព្រៀង ២ ម៉ឺននាក់ ចូលទៅធ្វើការ

បានផុស

៥ years មុន

នៅ

ថ្ងៃសុក្រ ៣ ធ្នូ ២០២១

ដោយ

រដ្ឋាភិបាលថៃ បានអនុញ្ញាតរួចរាល់ហើយ ក្នុងកិច្ចពិភាក្សាគ្នាដាក់ឲ្យបើកច្រកទ្វារព្រំដែនឡើងវិញ ពិសេសការទទួលយកពលករខ្មែរតាមកិច្ចព្រមព្រៀងចំនួន ២ ម៉ឺននាក់ ដើម្បីចូលទៅធ្វើការក្នុងខេត្តចន្ទបុរីនាពេលឆាប់ខាងមុខនេះ។ ពលករខ្មែរ ដែលអនុញ្ញាតឲ្យចូលទៅធ្វើការនៅក្នុងខេត្តនេះ តម្រូវឲ្យចាក់វ៉ាក់សាំងរួចរាល់ពេញលេញយ៉ាងតិចចំនួន២ដូស។ នេះជាការបញ្ជាក់របស់លោក សុថេ ថងយាំ អភិបាលខេត្តចន្ទបុរី ប្រទេសថៃ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់លោក សុថេ ថងយាំ ធ្វើឡើងនៅក្នុងកិច្ចប្រជុំស្តិពីកិច្ចសហប្រតិបត្តិការរវាងខេត្តប៉ៃលិននិងខេត្តចន្ទបុរីប្រទេសថៃកាលពីថ្ងៃទី ២ ធ្នូ ២០២១ ដោយមានការ ចូលរួមពីភាគីកម្ពុជាមានអភិបាលខេត្តបាត់ដំបងលោក សុខ លូ និង អភិបាលខេត្តប៉ៃលិនលោកស្រី បាន ស្រីមុំ ។

កិច្ចប្រជុំនេះ មានគោលបំណង ដើម្បីពិភាក្សាការងារក្នុងការសម្របសម្រួល និងនីតិវិធីជូនដល់ពលករខ្មែរ ដែលត្រូវចូលធ្វើការនៅក្នុងខេត្តចន្ទបុរីនៃព្រះរាជាណាចក្រថៃ ក្នុងអំឡុងពេលដែលប្រទេសថៃគ្រោងនឹងធ្វើការបើកច្រកទ្វារព្រំដែនទទួលពលករ ដែលនៅក្នុងខេត្តបាត់ដំបង និងប៉ៃលិននាពេលខាងមុខនេះ។ ដោយឡែក ចំពោះការអនុញ្ញាតឲ្យពលករអាចចូលទៅធ្វើការនៅប្រទេសថៃ គឺត្រូវអនុវត្តវិធានការសុខាភិបាលនៃប្រទេសទាំង ២ និងត្រូវតែមានការចាក់វ៉ាក់សាំងកូវីដ-១៩ បានពេញលេញ(២ដូស)ត្រូវធ្វើតេស្តរកកូវីដ -១៩ និងធ្វើចត្តាឡីស័កហើយពលករទាំងនោះ ត្រូវបានម្ចាស់អាជីវកម្ម ឬសហគ្រាសរបស់ភាគីថៃទំនាក់ទំនងផ្ទាល់ និងទទួលខុសត្រូវលើពលករទាំងនោះ។

លោក សុថេ ថងយាំ មានប្រសាសន៍ឲ្យដឹងថា រដ្ឋាភិបាលថៃបានអនុញ្ញាតរួចរាល់ហើយក្នុងកិច្ចពិភាក្សាគ្នាដាក់ឲ្យបើកច្រកទ្វារព្រំដែនឡើងវិញ ពិសេសទទួលពលករខ្មែរតាមកិច្ចព្រមព្រៀងចំនួន២ ម៉ឺននាក់ ដើម្បីចូលទៅធ្វើការក្នុងខេត្តចន្ទបុរី សម្រាប់រដូវប្រមូលផលផ្លែឈើហូបផ្លែ ដែលមានរយៈពេលប្រមាណ ៣-៤ ខែ ខណៈដែលប្រទេសថៃខ្វះកម្លាំង ពលកម្មក្នុងការប្រមូលផលផ្លែឈើ ។

លោក សុថេ ថងយាំ ក៏បានគូសបញ្ជាក់ផងដែរថា ការទទួលពលករខ្មែរទៅធ្វើការក្នុងខេត្តចន្ទបុរី គឺតម្រូវឲ្យពលករដែលបានចាក់វ៉ាក់សាំងរួចរាល់ពេញលេញយ៉ាងតិចចំនួន ២ ដូស និងតាមគោលការណ៍ការអនុញ្ញាតឲ្យចូលទៅបំពេញការងារស្របច្បាប់នៅក្នុងប្រទេសថៃដោយផ្អែកលើខ្លឹមសារនៃអនុស្សារណៈរួមគ្នា។

ការបើកច្រកទ្វាព្រំដែនអន្តរជាតិបានឡែមខេត្តចន្ទបុរី និង ច្រកទ្វារអន្តរជាតិដូងស្រុកកំរៀងខេត្តបាត់ដំបង,ច្រកទ្វារអន្តរជាតិព្រំខេត្តប៉ៃលិន មិនត្រឹមតែដើម្បីទទួលពលករខ្មែរ នោះទេ វាមានសារសំខាន់ក្នុងការដោះដូរផលិតផលកសិកម្ម និងអ្នកទេសចរទៅវិញទៅមកឡើងវិញក្នុងជំហានសាកល្បង ដើម្បីឈានទៅដល់ការបើកច្រកទ្វារព្រំដែនកម្ពុជា-ថៃ ទាំងស្រុងនាពេលខាងមុខ ៕

អត្ថបទ៖ ណារី