លោក ជា សុផារ៉ា ​កំពុង​ចុះ​ត្រួត​ពិនិត្យ​ដល់​ទី​តាំង​ទន្ទ្រាន​ដី​ព្រៃ​លិច​ទឹក​នៅ​ខេត្តបាត់​ដំបង

លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ នៅ ព្រឹកថ្ងៃទី ៦ ខែធ្នូ ឆ្នាំ ២០២១ បានដឹកនាំគណៈប្រតិភូអន្តរក្រសួងចុះពិនិត្យទីតាំងជាក់ស្តែង និងចាត់វិធានការបង្ក្រាបការទន្ទ្រានដីព្រៃលិចទឹកនៅតំបន់បឹងទន្លេសាប ស្ថិតក្នុងភូមិសាស្ត្រ ស្រុកមោងឫស្សី ស្រុកឯកភ្នំ ស្រុកថ្មគោល និងស្រុកសង្កែ ខេត្តបាត់ដំបង។

ផ្ទៃដីលិចទឹកជិត ៩០០ហិកតាបន្ថែមទៀត ត្រូវបានក្រុមការងារជំនាញរកឃើញជាបន្តបន្ទាប់នៅ​​ ថ្ងៃទី ៤ ខែធ្នូនៅពេលដែលលោក សឿម​ ប៊ុនរិទ្ធ​ អភិបាលរងខេត្តបាត់ដំបង បានដឹកនាំក្រុមការងារ ចុះផ្ទាល់ដល់ទីតាំងកាប់ទន្ទ្រាន​ឈូស​ឆាយបំផ្លាញ​ព្រៃ​លិចទឹក​តំបន់ ៣ ដើម្បីកាន់កាប់ដោយខុសច្បាប់ដែល​ចំណុច​ខាងលើនេះ​ត្រូវ​បាន​ក្រុម​ល្មេីសសាបព្រោះស្រូវថ្មីៗ ​និងឈូសឆាយបន្ថែមវាតពង្រីកធ្វើជាកម្មសិទ្ធផ្ទាល់ខ្លួន។

ការចុះពិនិត្យព្រៃលិចទឹកក្នុងដែនតំបន់៣ដែលបានរកឃើញបន្ថែមទៀត ខណៈដែលប្រតិភូចម្រុះចុះដល់ចំណុចក្រពេី​សស្គម ក្នុងឃុំ​ព្រៃចាស់ ស្រុក​ឯក​ភភ្នំ ខេត្ត​បាត់ដំបងដើម្បីកំណត់ផ្ទៀងផ្ទាត់​ព្រៃលិចទឹកតំបន់ហាមឃាត់ និងធ្វើអត្តសញ្ញាណកម្មទិន្នន័យដីដែលកាប់ទន្ទ្រានក្នុងនោះបានរកឃើញផ្ទៃដីដែលក្រុមជនល្មេីសទន្ទ្រានយកសរុបជិត​៩០០ហិកតា។

ក្នុងពេលតំណាលគ្នាប្រធានគណៈបញ្ជាការឯកភាពស្រុកថ្មគោលក៏បានដឹកនាំក្រុមការងារចុះពិនិត្យនិងកំណត់មុខសញ្ញាអ្នកទន្ទ្រានដីព្រៃលិចទឹកក្នុងភូមិសាស្ត្រឃុំតាម៉ឺនភូមិសាស្ត្រឃុំជ្រោយស្តៅភូមិសាស្ត្រឃុំតាពូងភូមិសាស្ត្រឃុំបឹងព្រីងបានទប់ស្កាត់ហាមឃាត់ប្រជាពលរដ្ឋចំនួន១២គ្រួសារដែលកំពុងអាស្រ័យផលលើដីតំបន់៣សរុបចំនួន ៥១.៥ហិកតាផ្សេងទៀត។

រដ្ឋបាលខេត្តបញ្ជាក់ថាបច្ចុប្បន្នក្នុងភូមិសាស្ត្រខេត្តបាត់ដំបងមានស្រុកចំនួន០៤ដែលក្រុមជនខិលខូចកំពុងទន្រ្ទានកាន់កាប់ក្នុងនោះមានស្រុកមោងឫស្សី ស្រុកថ្មគោលឯកភ្នំ និងស្រុកសង្កែស្មើ ២៩ទីតាំង សរុបផ្ទៃដីប្រមាណជា ១២ ២២១​ហិកតា៕

អត្ថបទ៖ សៅ សារិទ្ធ