ម្ចាស់ផ្ទះ​ ១៣ ​ល្វែង​ រស់​នៅអាគារ​អាយុកាលជិត​មួយ​សតវត្ស​ ស្ម័គ្រចិត្ត​ចាកចេញ​តាម​សំណើអាជ្ញាធរ

លោក សាន់ យូ អភិបាលរងខេត្តកំពង់ឆ្នាំង នៅ ព្រឹក​ថ្ងៃទី ១៣ ខែធ្នូនេះ បានឱ្យដឹងថា ប្រជាពលរដ្ឋជាម្ចាស់ផ្ទះចំនួន១៣ ល្វែង មានចំនួន ១២គ្រួសារ ស្ថិតនៅ ទីប្រជុំជនផ្សារក្រោម ក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង បានស្ម័គ្រចិត្តដឹកជញ្ជូនឥវ៉ាន់ចាកចេញពីផ្ទះទ្រុឌទ្រោមទាំង ១៣ ល្វែងនេះហើយ តាមការណែនាំរបស់អាជ្ញាធរ ដើម្បីបញ្ចៀសគ្រោះថ្នាក់ដល់អាយុជីវិត ព្រោះថាផ្ទះថ្មទាំង ១៣ នេះមានអាយុកាល ៩០ឆ្នាំ មានសភាពពុកផុយទ្រុឌទ្រោមខ្លាំងណាស់ទៅ ហើយ ដែលអាចបាក់បង្កគ្រោះថ្នាក់ដល់អ្នកស្នាក់នៅ ។

ផ្ទះថ្មទាំង ១៣ ល្វែងនេះ បានកសាងឡើងនៅ ក្នុងជំនាន់អាណានិគមនិយមបារាំងក្នុងឆ្នាំ១៩៣១ មានអាយុកាល៩០ឆ្នាំហើយ។ មកដល់ពេលនេះផ្ទះថ្មទាំង១៣ល្វែងមានសភាពទ្រុឌទ្រោមយ៉ាងខ្លាំង អាចនឹងបាក់ស្រុតបង្កគ្រោះថ្នាក់ដល់ប្រជាពលរដ្ឋជាម្ចាស់ផ្ទះដែលកំពុងស្នាក់នៅ ។

ហេតុនេះរដ្ឋបាលក្រុងនិងខេត្ត ស្នើសុំឱ្យបងប្អូនប្រជាពលរដ្ឋដែលរស់នៅ ក្នុងអាគារទាំង ១៣ល្វែង ដែលមាន ១២​គ្រួសារ​នេះត្រូវចាកចេញពីអាគារនេះ ចាប់ពីថ្ងៃជូនដំណឹងនេះ រហូតដល់ថ្ងៃទី១៣ ខែធ្នូ ឆ្នាំ២០២១ ជាកំហិត ផុតថ្ងៃ កំណត់នេះអាជ្ញាធរនិងចាត់វិធានការរដ្ឋបាលតាមផ្លូវច្បាប់។

លោកអភិបាលរងខេត្តកំពង់ឆ្នាំងបានបញ្ជាក់ឱ្យដឹងទៀតថា តាមសំណូមពររបស់ប្រជាពលរដ្ឋទាំង ១២ គ្រួសារ ជាម្ចាស់ផ្ទះ ១៣ល្វែងស្ម័គចិត្តចាកចេញមុនថ្ងៃទី១៤ ខែធ្នូ ឆ្នាំ២០២១នេះ គឺរដ្ឋបាលខេត្ត នឹងជួយសម្របសម្រួលជូនប្រជាពលរដ្ឋទាំង ១២ គ្រួសារលើឯកសារគតិយុត្តិទាំងឡាយរួមមាន ការសុំច្បាប់វាយកំទេចអាគារទ្រុឌទ្រោមចេញការសុំ ច្បាប់សាងសង់សំណង់អាគារឡើងវិញ និងការគូរប្លង់សង់អាគារ។

ដោយឡែកនៅ ព្រឹកថ្ងៃទី១៣ ខែធ្នូឆ្នាំ២០២១ នេះស្ត្រីម្នាក់ឈ្មោះ កែវ ពៅ ជាម្ចាស់ផ្ទះ១ល្វែងក្នុងចំណោម ១៣ខាងលើ បានឱ្យដឹងថា កន្លងមកអាជ្ញាធរក្រុង និងខេត្តចេះតែតែសំណូមពរឲ្យពួកគាត់ចាកចេញពីផ្ទះទាំង១៣ នេះ ហើយបានសន្យាតែមាត់តែពុំមានក្រដាសស្នាមអ្វីទេថា នឹងជួយសម្រួលច្បាប់ក្នុងការការវាយកំទេចផ្ទះទាំង១៣ល្វែងនេះចោល និងជួយសម្រួលច្បាប់ ក្នុងការសុំធ្វើផ្ទះ ល្វែងទាំង១៣ល្វែងខាងលើនេះឡើងវិញជាដើម។

ដែលការសន្យាគ្មានលិខិតស្នាមខាងលើនេះ ពុំបានឲ្យពួកគាត់មានភាពកក់ក្តៅ ហើយ។ ប៉ុន្តែក្នុងនេះក្នុងអាណត្តិលោកអភិបាលខេត្តថ្មី ស៊ុន សុវណ្ណរិទ្ធិ គាត់មានជំនឿជឿជាក់ជាងមុនទើប នាំគ្នាចាកចេញតាមការណែនាំរបស់រដ្ឋបាលខេត្ត ដូចនេះពួកគាត់ស្នើសុំដល់អ្នកកាសែតមេត្តាសុំធ្វើជាសាក្សីឲ្យពួកគាត់ផង ចំពោះការសន្យាខាងលើរបស់រដ្ឋបាលក្រុង និងខេត្ត៕

អត្ថបទ៖ ឈៀង ថារិទ្ធ