កំពង់ផែ​ទេសចរណ៍​កោះទន្សាយ​ នឹង​ជួយ​ពង្រីក​សក្តានុ​ពល​សេដ្ឋកិច្ច​​ខេត្តកែប

កំពង់ផែទេសចរណ៍កោះទន្សាយសម្រេចការសាងសង់ជាស្ថាពររួចរាល់១០០% ក្រោយដំណើរការសាងស់ង់អស់រយៈពេលជាង ២ឆ្នាំ កំពង់ផែនេះគ្រោងនឹងសម្ពោធ ដាក់ឲ្យប្រើប្រាស់នាដើមខែកុម្ភៈឆ្នាំ២០២២ខាងមុខ ដោយរំពឹងខ្ពស់ថានឹងជួយបង្កើនលំហូរទេសចរទៅកាន់បណ្តាកោះក្នុងខេត្តកែបកាន់តែច្រើន និងបង្កើនសក្តានុពលសេដ្ឋកិច្ចរបស់ខេត្តផងដែរ។

លោក លីប ជាង វិស្វករសាងសង់គម្រោងកំពង់ផែកោះទន្សាយបានឲ្យដឹងនារសៀលថ្ងៃទី ៤ ខែមករា ឆ្នាំ២០២២នេះថាការអភិវឌ្ឍសាងសង់កំពង់ផែទេសចរណ៍ (កោះទន្សាយ) នេះអនុវត្តន៍តាមបទដ្ឋានកម្រិតកំណត់បច្ចេកទេសសំណង់សាធារណការរបស់ក្រសួងសាធារណការ និងដឹកជញ្ជូន។

លោកបន្ថែមថា ក្នុងនោះបានសាងសង់ផ្លូវបេតុងសរសៃដែកអគារលក់សំបុត្រព្រមទាំងអគាររង់ចាំ បន្ថែមពីនោះមានស្ពានចូលផែ តួផែដែលមានរាងស្នូកក្តាមនិងដៃផែ ចំនួន៤មានតូច២ធំ២។

ទីតាំងផែដែលទើបសាងសង់រួចនេះ ស្ថិតនៅកំពង់ផែចាស់ (កោះទន្សាយ) ក្រុងកែប ខេត្តកែប ដែលបានប្រើរយៈពេលសាងសង់ ២៤ខែ គិតចាប់ពីថ្ងៃបើកការដ្ឋានថ្ងៃទី ១២ ខែធ្នូ ឆ្នាំ២០១៩ រហូតដល់ ថ្ងៃទី២៧ ខែធ្នូ ឆ្នាំ២០២១។

លោក សោម ពិសិដ្ឋ អភិបាលខេត្តកែបធ្លាប់បានមានប្រសាសន៍កាលពីពេលថ្មីៗកន្លងទៅថា គម្រោងសាងសង់កំពង់ផែទេសចរណ៍កោះទន្សាយនេះសម្រាប់ត្រៀម បម្រើដល់វិស័យទេសចរណ៍ដែលមានលទ្ធភាពអាចទទួលចតនាវាផ្ទុកអ្នកដំណើរបានក្រោម ៣០០នាក់។

ដោយឡែកនាវាដឹកទំនិញផ្សេងៗអាចចូលចតបាននាវា ដែលស្ថិតក្រោម១៥តោន។ លោកបន្តថា នេះគឺជាការពង្រីកសក្តានុពលវិស័យទេសចរណ៍ និងសេដ្ឋកិច្ចរបស់ខេត្តកែបតាមរយៈផ្លូវទឹកទ្វេភាគី ជាមួយប្រទេសក្នុងតំបន់ ដែលផែនេះអាចឈានទៅដល់ទទួលភ្ញៀវកម្រិតថ្នាក់អន្តរជាតិផងដែរសម្រាប់ថ្ងៃអនាគត។

គួរបញ្ជាក់ថា កំពង់ផែទេសចរណ៍កោះទន្សាយនេះចំណាយថវិការក្នុងការសាងសង់ប្រមាណជិត ៥ ពាន់លានរៀលស្ថិតក្នុងភូមិកែប សង្កាត់កែប ក្រុងកែប ខេត្តកែប ដែលមានសណ្ឋានជារូបក្តាមចម្ងាយពីដីគោកចូលទៅក្នុងសមុទ្រប្រមាណ ៣០៦ម៉ែត្រទទឹង ៦៨ម៉ែត្រ មានផ្ទៃក្រឡាសរុបប្រមាណជាង ៤ពាន់ម៉ែត្រការ៉េ៕

អត្ថបទ៖ ណារី