ត្រឹម២សប្តាហ៍ខែនេះ ភ្ញៀវទេសចរជាតិមានជាង ១០ម៉ឺននាក់ ខណៈភ្ញៀវបរទេសចាប់ផ្តើមចូល​ខេត្តព្រះសីហនុ

រយៈពេល ២សប្តាហ៍នៃខែ មករា ឆ្នាំ ២០២២នេះ ខេត្តព្រះសីហនុ ទទួលបានភ្ញៀវទេសចរណ៍ជាតិប្រមាណជាង ១០ម៉ឺននាក់ ក្នុងនោះភ្ញៀវទេសចរណ៍បរទេសផ្ទៃក្នុងប្រមាណ ៥ភាគរយ។ នេះបើតាមការបញ្ជាក់របស់លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ ប្រាប់កម្ពុជាថ្មីនៅថ្ងៃទី ១៧ ខែ មករា។

លោកប្រធានមន្ទីរបានឲ្យដឹងដូច្នេះថា« ភ្ញៀវទេសចរអន្តរជាតិ មិនមានច្រើនប៉ុន្មានទេ ២សប្តាហ៍មានប្រមាណប្រាំឬប្រាំមួយជើងប៉ុណ្ណោះ យើងហៅថា ភ្ញៀវទេសចរបរទេសផ្ទៃក្នុង»។

បើតាមលោក សុចិត្តគ្រឹស្នា ពេញ១ឆ្នាំ ២០២១ ខេត្តព្រះសីហនុ ទទួលបានភ្ញៀវទេសចរសរុបប្រមាណជាង ១លាននាក់ ក្នុងនោះលោកប៉ាន់ស្មានថា ភ្ញៀវម្នាក់ចំណាយក្នុងការដើរកម្សាន្តអស់ ៨០ដុល្លារអាមេរិក។

​ជុំវិញការឆ្លងរាលដាលជំងឺកូវីដបំប្លែងខ្លួនថ្មី អូមីក្រុង ប្រធានមន្ទីរទេសចរណ៍ខេត្តព្រះសីហនុ បានឲ្យដឹងថា មន្ទីរជំនាញមានសេនាធិការសហការជាមួយអាជ្ញាធរពាក់ព័ន្ធ ជាពិសេសគណៈកម្មាធិការប្រយុទ្ធប្រឆាំងកូវីដថ្នាក់ខេត្ត យកចិត្តទុកដាក់ ពង្រឹងទប់ស្កាត់ការរីករាលដាល តាមរយៈការបើកវគ្គផ្សព្វផ្សាយ និងណែនាំឲ្យគោរពគោលការណ៍របស់ក្រសួងសុខាភិបាល៕ ដោយ៖ ទួន សុផល