ឱសថព្យាបាលកូវីដ-១៩ ឈ្មោះ Molupiravir មានច្រើនប្រភេទ តើគួរប្រើ ឱសថបែបណា?

បច្ចុប្បន្ន គេសង្កេតឃើញថា នៅតាមទីផ្សារ មានលក់ឧសថសម្រាប់ព្យាបាលជំងឺកូវីដ១៩ ឈ្មោះ Molupiravir ជាប្រភេទថ្នាំផ្សេងៗគ្នា ដែលធ្វើឱ្យមហាជន មិនច្បាស់ថា ឧសថទាំងនោះវាជាប្រភេទថ្នាំដូចគ្នា ឬយ៉ាងណា?

លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ ក្រសួងសុខាភិបាល នៅរសៀលថ្ងៃទី២១ ខែកុម្ភៈ ឆ្នាំ ២០២២ នេះ បានបញ្ជាក់ថា ទាក់ទងទៅនឹងថ្នាំសម្រាប់ព្យាបាលជំងឺកូវីដ-១៩ មានប្រភេទថ្នាំផ្សេងៗគ្នា តែឈ្មោះ Molupiravir ដូចគ្នានោះ គឺជាប្រភេទថ្នាំតែមួយ គ្រាន់តែការផលិតដោយរោងចក្រផ្សេងៗគ្នា។

លោកស្រីវេជ្ជបណ្ឌិត ឱ វណ្ណឌីន មានប្រសាសន៍បញ្ជាក់បន្ថែម សូមប្រជាពលរដ្ឋនៅកម្ពុជា ប្រើប្រាស់តែប្រភេទដែលមានបញ្ជិការទទួលស្គាល់ពីក្រសួងសុខាភិបាលត្រឹមត្រូវ ដោយនៅលើប្រអប់ថ្នាំមានបិទវីញែត លេខបញ្ជិការត្រឹមត្រូវ ព្រោះមានប្រភេទដែលលក់ខុសច្បាប់ ដូចជាមានសំបកប្រអប់ពណ៌ក្រហមជាដើម។

គួររំលឹកថា កាលពីថ្ងៃទី៣ ខែវិច្ឆិកា ឆ្នាំ២០២១ ក្រសួងសុខាភិបាល បានអនុញ្ញាតឲ្យប្រើប្រាស់ឱសថព្យាបាលជំងឺកូវីដ-១៩ ឈ្មោះ Molnupiravir ដែលជាប្រភេទឱសថគ្រាប់ ក្នុងលក្ខខណ្ឌបន្ទាន់៕

អត្ថបទ៖ ច័ន្ទ វីរៈ