អូស្ត្រាលី សន្យាជួយផ្ទេរចំណេះដឹង និងជំនាញបទល្មើសបច្ចេកវិទ្យា និងការសម្អាតប្រាក់ដល់នគរបាលកម្ពុជា

លោក Reece Philip Kershaw ស្នងការនគរបាលសហពន្ធ័អូស្រ្តាលីបានសន្យាថា នឹងបន្តជួយផ្ទេរចំណេះដឹង និងជំនាញលើការងារប្រយុទ្ធប្រឆាំងបទល្មើសបច្ចេកវិទ្យា និងបទល្មើសសម្អាតប្រាក់ដល់មន្ត្រីនគរបាលជាតិកម្ពុជា។ ការសន្យានេះ បានធ្វើឡើងកាលពីរសៀលថ្ងៃទី០១ខែមីនា ក្នុងឱកាសជួបសម្តែងការគួរសមជាមួយសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។

លោក Reece Philip Kershaw បានបន្តថា ក្នុងកិច្ចសហប្រតិបត្តិការជាង២០ឆ្នាំមកនេះ នគរបាលកម្ពុជា និងអូស្ត្រាលី បានបន្សល់ទុកសមិទ្ធិផលជាច្រើន ព្រមទាំងបានធ្វើឱ្យចំណងមិត្តភាពនេះ ក្លាយទៅជាមិត្តភាពប្រពៃណី ដោយបានធ្វើកិច្ចសហប្រតិបត្តិការយ៉ាងល្អលើការងារប្រយុទ្ធប្រឆាំងគ្រឿងញៀន និងបទល្មើសមួយចំនួនទៀត។ លោក បានប្តេជ្ញាបន្តសហការជាមួយកម្លាំងនគរបាលជាតិកម្ពុជា ដើម្បីប្រយុទ្ធប្រឆាំងជាមួយបទឧក្រិដ្ឋនានា ដែលមានអង្គការចាត់តាំង។

ពាក់ព័ន្ធនឹងបទល្មើសគ្រឿងញៀននេះដែរ សម្ដេចក្រឡាហោម ស ខេង ក៏បានគូសបញ្ជាក់ថា កន្លងមកសមត្ថកិច្ចកម្ពុជាចាប់បានគ្រឿងញៀន និងសារធាតុផ្សុំរាប់រយតោន និងកំពុងបន្តយុទ្ធនាការប្រយុទ្ធប្រឆាំងគ្រឿងញៀនយ៉ាងសកម្ម។ នៅក្នុងជំនួបនោះសម្ដេចក្រឡាហោមឧបនាយករដ្ឋមន្ត្រី ក៏បានវាយតម្លៃខ្ពស់ចំពោះកិច្ចសហប្រតិបត្តិការរវាងនគរបាលប្រទេសទាំងពីរកម្ពុជា អូស្ត្រាលី ជាពិសេស ទៅលើការអនុវត្តកិច្ចព្រមព្រៀង និងអនុស្សារណៈនានាដែលកំពុងនៅជាធរមាន និងបានជំរុញឱ្យភាគីទាំងពីរបន្តអនុវត្តឱ្យមានប្រសិទ្ធភាពបន្តទៀត និងពិនិត្យលទ្ធភាពចុះកិច្ចព្រមព្រៀងស្ដីពីកិច្ចសហប្រតិបត្តិការបន្ថែមលើវិស័យទាំងឡាយណាដែលយល់ថាចាំបាច់ដើម្បីបំរើជាប្រយោជន៍ដល់នគរបាល និងប្រជាជនប្រទេសទាំងពីរ៕

ដោយ៖ សំអឿន