ចរាចរណ៍

នគរបាលចាប់ឃាត់រថយន្ត-ម៉ូតូ ១៧ គ្រឿង ជិះបញ្ច្រាសខាងមុខអតីតសណ្ឋាគារ តាយម៉េង នៅខណ្ឌចំការមន

បានផុស

១០ ខែ មុន

នៅ

ថ្ងៃចន្ទ ១៦ មិថុនា ២០២៥

ដោយ

នគរបាលខណ្ឌចំការមន សហការជាមួយនគរបាលចរាចរណ៍ក្រុង បានស្ទាក់ចាប់អ្នកជិះល្មើសច្បាប់ចរាចរណ៍ ដោយឃាត់រថយន្តចំនួន ១ គ្រឿង និងម៉ូតូ ១៦ គ្រឿង ព្រមទាំងអប់រំណែនាំ កុំឲ្យបន្តជិះល្មើសច្បាប់បន្តទៀត។

ការឃាត់អប់រំនេះដែរបានធ្វើឡើងកាលពីវេលាព្រឹកថ្ងៃទី ១៦ ខែមិថុនា ឆ្នាំ ២០២៥ ស្ថិតនៅចំណុចអតីតសណ្ឋាគារតាយម៉េង តាមផ្លូវព្រះនរោត្ដម ភូមិ ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

លោកវរសេនីយ៍ទោ ហួរ ម៉េងហួន អធិការខណ្ឌចំការមន បានឲ្យដឹងថា ការឃាត់អប់រំនេះ ដោយអនុវត្តតាមបទបញ្ជារបស់ លោកឧត្ដមសេនីយ៍ឯក ជួន ណារិន្ទ ស្នងការរាជធានីភ្នំពេញ ដើម្បីអនុវត្តច្បាប់ចរាចរណ៍ទៅលើអ្នកជិះបញ្ច្រាសនៅខាងមុខអតីតសណ្ឋាគារតាយម៉េង លើផ្លូវនរោត្តម។

លោកបានបន្តថា តាមការសង្កេតមើលមួយរយៈចុងក្រោយនេះ គ្រោះថ្នាក់ចរាចរណ៍មានការកើនឡើង ដោយសារតែភាគច្រើនបណ្តាលមកពីការជិះបញ្ច្រាសទិស ទើបនៅថ្ងៃទី ១៦ មិថុនា នេះ លោកបានចាត់ឲ្យ លោក សួ សំ អធិការរងទទួលផែនចរាចរណ៍ខណ្ឌចំការមន ដោយមានការចូលរួមជាមួយការិយាល័យចរាចរណ៍ផ្លូវគោក ស្នងការដ្ឋាននគរបាលរាជធានីភ្នំពេញ ដើម្បីស្ទាក់ឃាត់អ្នកបើកបរបញ្ច្រាសទិសមកអប់រំណែនាំ។ ក្នុងនោះ កម្លាំង បានបន្តធ្វើការអនុវត្តច្បាប់ចរាចរណ៍ដោយឃាត់ពលរដ្ឋដែលល្មើសច្បាប់ចរាចរណ៍ ជិះបញ្ច្រាស មានរថយន្ត និងម៉ូតូ ចំនួន ១៧ គ្រឿង (រថយន្ត ១ គ្រឿង , ម៉ូតូ ១៦ គ្រឿង) មកអប់រំណែនាំ កុំឲ្យបន្តជិះបញ្ច្រាសខុសច្បាប់ចរាចរណ៍បែបនេះជាបន្តបន្ទាប់។

ក្រោយឃាត់រួចរាល់ សមត្ថកិច្ច បានអប់រំណែនាំមិនឲ្យជិះបញ្ច្រាសបែបនេះបន្តទៀតនោះឡើយ រួចបានឲ្យត្រឡប់ទៅវិញ ឬប្រកបអាជីវកម្មបន្ត។ ទន្ទឹមនោះ ករណីមិនរាងចាល សមត្ថកិច្ច នឹងធ្វើការអនុវត្តតាមនីតិវិធីច្បាប់៕

អត្ថបទ ៖ រដ្ឋា