នាយឧត្តមសេនីយ៍ ស ថេត ផ្ដល់ការយកចិត្តទុកដាក់ចំពោះមន្ត្រីនគរបាលមួយរូប ដែលថៃបានចាប់ ហើយទើបដោះលែងមកវិញ

មន្ត្រីនគរបាលខេត្តបន្ទាយមានជ័យ លោក គៀត ស៊ីម៉ាក់ ដែលទើបត្រូវបានទាហានដោះលែងឱ្យត្រលប់មកកម្ពុជាវិញ ហើយកំពុងសម្រាកព្យាបាលនៅមន្ទីរពេទ្យ ទទួលបានការយកចិត្តទុកដាក់ពីលោកនាយឧត្តមសេនីយ៍ ស ថេត អគ្គស្នងការនគរបាលជាតិ។

លោកអនុសេនីយ៍ត្រី គៀត ស៊ីម៉ាក់ នាយរងប៉ុស្តិ៍នគរបាលរដ្ឋបាលឃុំគោកកឋិន នៃអធិការដ្ឋាននគរបាលស្រុកថ្មពួក បានរងរបួសក្នុងសមរភូមិបឹងត្រកួន និងត្រូវបានទាហានថៃចាប់បានកាលពីថ្ងៃទី២៤ ខែធ្នូ ឆ្នាំ២០២៥កន្លងទៅ ហើយទើបតែបានបញ្ជូនមកវិញកាលពីថ្ងៃទី២០ ខែមករា ឆ្នាំ២០២៦។ ស្នងការដ្ឋាននគរបាលខេត្តបន្ទាយមានជ័យបញ្ជាក់ឱ្យដឹងបែបនេះនៅលើបណ្ដេញសង្គមហ្វេសប៊ុក នៅថ្ងៃពុធនេះ។

លោកនាយឧត្តមសេនីយ៍ ស ថេត តាមរយៈលោកឧត្ដមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានចាត់ ឧត្តមសេនីយ៍ត្រី  រ៉ែម វីរៈ ស្នងការរង ទទួលផែនការងារសេនាធិការ រួមសហការី ចុះសួរសុខទុក្ខ និងនាំយកអំណោយ ដែលមានថវិកាចំនួន២លានរៀលជូនដល់លោកអនុសេនីយ៍ត្រី គៀត ស៊ីម៉ាក់ ដែលកំពុងព្យាបាលនៅមន្ទីរពេទ្យមិត្តភាព-កម្ពុជាជប៉ុន ខេត្តបន្ទាយមានជ័យ។

លោកស្នងការរងបានពាំនាំការសួរសុខទុក្ខពីលោកនាយឧត្តមសេនីយ៍ ស ថេត អគ្គស្នងការនគរបាលជាតិ ចំពោះលោកអនុសេនីយ៍ត្រី គៀត ស៊ីម៉ាក់ និងបានលើកទឹកចិត្ត ជូនពរឱ្យឆាប់ជាមានសុខភាពល្អមាំទាំឡើងវិញ។ លោក បានលើកឡើងពីការគិតគូររបស់ថ្នាក់ដឹកនាំ ចំពោះសុខទុក្ខ និងយកចិត្តទុក្ខដាក់ខ្ពស់ដល់គ្រប់កងកម្លាំងទាំងអស់ ហើយប្ដេជ្ញាមិនបោះបង់កងកម្លាំងគ្រប់គ្នានោះទេ។ លោកស្នងការរង ក៏បានជំរុញដល់ក្រុមគ្រូពេទ្យឱ្យមើលថែរហូតដល់ជាសះស្បើយ៕

ដោយ៖ អ ពៅ