​ប្រមុខរាជរដ្ឋាភិបាល ៖ មន្ទីរពេទ្យមិត្តភាពកម្ពុជា-ចិន​ព្រះ​កុសុមៈ ​កើតចេញពីកិច្ចសហ​ប្រតិបត្តិការ និងការជឿទុកចិត្តគ្នា​

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ​​មានប្រសាសន៍បែបនេះ ​នៅក្នុងពិធីសម្ពោធដាក់ឲ្យប្រើប្រាស់ជាផ្លូវការ​​ មន្ទីរពេទ្យមិត្តភាពកម្ពុជា-ចិនព្រះ​កុសុមៈ (ពេទ្យលោកសង្ឃ) ដែល​​ជា​មន្ទីរពេទ្យបំពាក់បរិក្ខារវេជ្ជសាស្ត្រ​​​ទំនើប នាព្រឹកថ្ងៃទី ២១ ខែមីនា ឆ្នាំ ២០២២នេះ។ ​

​សម្តេច​តេជោ ហ៊ុន សែន បានបញ្ជាក់បែបនេះ​ថា​ «សមិទ្ធផល​ (​មន្ទីរពេទ្យមិត្តភាពកម្ពុជា-ចិនព្រះ​កុសុមៈ​) ​កើតចេញពីការ​ទំនាក់ទំនងរវាងកម្ពុជា និងចិន ដែលបានលើកកម្ពស់ដល់កម្រិតដៃគូយុទ្ធសាស្ត្រគ្រប់ជ្រុងជ្រោយ និងដែលមានឈ្មោះថា មិត្តដែកថែប​ ហើយអ្វីបានកើតចេញមកទៀតថ្ងៃនេះ ផ្ដើមចេញពីកិច្ចសហប្រតិបត្តិការ និងការជឿទុកចិត្តគ្នា និងការចង់ជួយគ្នាពីសំណាក់សាធារណរដ្ឋប្រជាមានិតចិន មកកាន់ប្រទេសកម្ពុជា»។​

សម្តេចតេជោ​បញ្ជាក់ទៀតថា សម្តេច​ពិតជាមានការរីករាយ ដែលប៉ុន្មាន​ថ្ងៃមុននេះ សម្ដេច និងទូតចិនបាន​សម្ពោធមន្ទីរពេទ្យមិត្តភាពកម្ពុជា-ចិន ត្បូងឃ្មុំ ​​មានតម្លៃប្រមាណជិត ៥០លានដុល្លារ​ ​ហើយថ្ងៃនេះ​បាន​សម្ពោធមន្ទីរពេទ្យនេះមួយទៀត ដែលមន្ទីរពេទ្យនេះមានតម្លៃប្រមាណ ៨៥លានដុល្លារ។ សម្តេច​បន្តថា ​នេះគឺជាជំនួយដ៏ធំនៅក្នុងផ្នែកសុខាភិបាល ដែលកម្ពុជាទទួលបាន ដើម្បីឆ្លើយតបទៅនឹងតម្រូវការ និងបញ្ហាសុខមាលភាព របស់ប្រជាជនកម្ពុជា​​​។​

សូមបញ្ជាក់ថា ​មន្ទីរពេទ្យមិត្តភាពកម្ពុជា-ចិន ព្រះកុសុមៈ ​ដែលប្រជាពលរដ្ឋខ្មែរស្គាល់ជាទូទៅថា ជាមន្ទីរពេទ្យលោកសង្ឃនោះ ត្រូវបានសាងសង់ក្រោមជំនួយឥតសំណងរបស់រដ្ឋាភិបាលចិន។ មន្ទីរពេទ្យនេះ ត្រូវបានបើកការដ្ឋាន សាងសង់នៅថ្ងៃទី ៣០ ខែតុលា ឆ្នាំ ២០១៨ ដោយចំណាយពេល ​៣៩​ខែ។ ​សាងសង់លើទំហំដីជាង ​១៣ពាន់ម៉ែត្រក្រឡា មានកម្ពស់ ​១១ជាន់​។ ក្នុងនោះ ចែកចេញជាផ្នែកពិគ្រោះជំងឺក្រៅ ផ្នែក​សង្គ្រោះបន្ទាន់ ផ្នែកបច្ចេកវិទ្យាវេជ្ជសាស្ត្រ ផ្នែកជំងឺទូទៅ ជំងឺវះកាត់ ផ្នែកសម្ភព រោគស្ត្រី ព្រមទាំងសេវាជំនួយផ្សេងៗទៀត។ នៅលើដំបូលអគារមានចំណតឧត្ថម្ភាគចក្រចុះចត ទម្ងន់ពី​៣តោន ទៅ ៥តោន​ផងដែរ។​

មន្ទីរពេទ្យ​ដែ លបំពាក់ដោយឧបករណ៍វេជ្ជសាស្ត្រទំនើបៗនេះ មានគ្រែសម្រាប់ព្យាបាលអ្នកជំងឺ​ប្រមាណ​ ៤០០គ្រែ។ ក្នុងមន្ទីរពេទ្យនេះ ក៏មានកន្លែងព្យាបាលតាមបែបវេជ្ជសាស្ត្របុរាណចិនផងដែរ ហើយព្យាបាលដោយគ្រូពេទ្យចិនផ្ទាល់តែម្តង។​

បើតាមលោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា បាន​អះអាងថា ចាប់តាំងពីបង្កើតឡើង ​​​មន្ទីរពេទ្យនេះ ​បានដើរតួនាទីយ៉ាងសំខាន់ ក្នុងការជួយព្យាបាល​សុខភាពប្រជាពលរដ្ឋកម្ពុជា ហើយបន្ទាប់ពីពង្រីកក្រោយជំនួយរបស់ភាគី ចិន មន្ទីរពេទ្យនេះបាននាំមកនូវឧបករណ៍វេជ្ជសាស្ត្រ​កម្រិតខ្ពស់ និងប្រព័ន្ធព្យាបាលថែទាំទំនើប ហើយនឹងក្លាយទៅជាមន្ទីរពេទ្យរដ្ឋដ៏ទំនើបនៅកម្ពុជា។ លោកថា មន្ទីរពេទ្យនេះ ក៏បានបង្កើតផ្នែកពេទ្យចិនប្រពៃណី ដែលរៀបចំដោយក្រុមអ្នកជំនាញថ្នាក់ជាតិ របស់​​ពេទ្យចិន​ផងដែរ។​

លោក វ៉ាង វិនធាន ​បានអះអាងទៀតថា មន្ទីរពេទ្យនេះ ត្រូវបានរចនាដោយលើកដៃសំពះ​តាមប្រពៃ​ណីរបស់កម្ពុជា ហើយជានិ​មិត្តរូបនៃសេចក្តីប្រាថ្នា​ដ៏ប្រពៃ របស់ប្រជាជនចិន ​ចំពោះប្រជាជនកម្ពុជា៕

អត្ថបទ៖ កោះកែវ