កូនប្រុសលោក ខាន់ សុវណ្ណ រៀបរាប់លម្អិតជុំវិញការទទួលមរណភាព របស់ឪពុកលោក

កូនប្រុសរបស់សពលោក ខាន់ សុវណ្ណ បានឲ្យដឹងថា ឪពុករបស់លោកបានទទួលមរណភាព កាលពីយប់ថ្ងៃពុធ បន្ទាប់ពីធ្វើដំណើរទៅព្យាបាលជំងឺនៅប្រទេសឥណ្ឌា តែដល់ពាក់កណ្ដាលផ្លូវក៏បញ្ហាបេះដូងធ្វើទុក្ខ បណ្ដាលឲ្យទទួលមរណភាពតែម្ដង។

លោក ខាន់ តូនី ដែលជាកូនប្រុសរបស់សពលោក ខាន់ សុវណ្ណ បានឲ្យអ្នកសារព័ត៌មានកម្ពុជាថ្មី ដឹងនៅព្រឹកថ្ងៃទី ២៤ ខែមីនានេះថា ឪពុករបស់លោកបានធ្វើដំណើរចេញពីប្រទេសកម្ពុជាតាមយន្ដហោះ បំណងទៅព្យាបាលជំងឺនៅប្រទេស ឥណ្ឌា ដែលត្រូវធ្វើដំណើរឆ្លងកាត់ពីរទៅបីប្រទេស ទើបទៅដល់ប្រទេសឥណ្ឌា។  

ប៉ុន្តែជាអកុសល នៅពេលធ្វើដំណើរដល់ពាក់កណ្ដាលផ្លូវទៅហើយ លោក ខាន់ សុវណ្ណ ដែលជាឪពុករបស់លោកក៏ធ្វើទុក្ខបេះដូង។ នៅពេលភ្លាមៗនោះ ខាងជើងយន្ដហោះ ក៏បានសម្រេចចិត្តចុះចតនៅប្រទេសមីយ៉ាន់ម៉ា ដើម្បីធ្វើការសង្គ្រោះបន្ទាន់ តែមិនអាចជួយសង្គ្រោះលោក ខាន់ សុវណ្ណ បានឡើយ ដោយលោកបានទទួលមរណភាព នៅយប់ថ្ងៃទី ២៣ ខែមីនា ឆ្នាំ ២០២២ នៅប្រទេសមីយ៉ាន់ម៉ាតែម្ដង​។

លោក ខាន់ តូនី បានឲ្យដឹងដែរថា បច្ចុប្បន្នសាកសពរបស់លោក ខាន់ សុវណ្ណ ដែលឪពុករបស់លោក បាននិងកំពុងតម្កល់នៅប្រទេសមីយ៉ាន់ម៉ា ដោយសារតែមីយ៉ាន់ម៉ាពុំមានជើងហោះហើរ មកកាន់រាជធានីភ្នំពេញ នោះទេ។ ដូច្នេះលោក ក៏បានធ្វើការងារជាមួយមន្ត្រីស្ថានទូតកម្ពុជានៅទីនោះ ដើម្បីរៀបចំបូជាសពរបស់លោក ខាន់ សុវណ្ណ នៅប្រទេសមីយ៉ាន់ម៉ា រួចហើយយកធាតុមកធ្វើបុណ្យតាមប្រពៃណី នៅក្នុងប្រទេសកម្ពុជាវិញ។

កូនប្រុសរបស់សពលោក ខាន់ សុវណ្ណ បានបញ្ជាក់ទៀតថា ឪពុករបស់លោក មានបំណងទៅព្យា​បាលជំងឺថ្លើមនៅប្រទេសឥណ្ឌា។ ប៉ុន្តែការស្លាប់របស់លោក ខាន់ សុវណ្ណ គឺបណ្ដាលមកពីការធ្វើទុក្ខបេះដូង។

សូមជម្រាបថា លោក ខាន់ សុវណ្ណ ស្ថាបនិក នៃអង្គព្រោកប្រាជ្ញ និងជាអ្នកអត្ថាធិប្បាយបញ្ហាសង្គម និងនយោបាយ បានទទួលមរណភាព កាលពីយប់ថ្ងៃទី ២៣ ខែមីនា ឆ្នាំ ២០២២ ក្នុងជន្មាយុ ៦៦ឆ្នាំ ដោយរោគាពាធ។

បើតាមសារចូលរួមមរណទុក្ខ របស់សមាជិក-សមាជិកា នៃអង្គព្រោកប្រាជ្ញ បានសរសេរថា សូមថ្លែងនូវមរណទុក្ខក្រៀមក្រំ ដោយក្តីក្តុកក្តួលបំផុតដែលលោក ខាន់ សុវណ្ណ ស្ថាបនិក នៃអង្គព្រោកប្រាជ្ញ បានទទួលមរណភាព នាយប់ថ្ងៃទី ២៣ ខែមីនា ឆ្នាំ ២០២២ ក្នុងជន្មាយុ ៦៦ឆ្នាំ ដោយរោគាពាធ។

សារចូលរួមមរណទុក្ខ បានសរសេរបន្តថា សូមសម្តែងនូវការសោកស្តាយ គ្មានអ្វីប្រៀបផ្ទឹមបានឡើយចំពោះមរណភាពនេះ និងសូមកត់ត្រាទុកនូវរាល់ស្នាដៃ ឧត្តមគតិ វីរភាព និងគុណបំណាច់របស់លោក ដែលជាកុលបុត្រខ្មែរ និងជាសកម្ម​ជនដ៏ឆ្នើម ដែលបានពលិកម្មគ្រប់បែបយ៉ាង ដើម្បីផលប្រ​យោ​​ជន៍របស់ប្រទេសជាតិ ប្រជាជនកម្ពុជា និងបានចូលរូមថែ​រក្សាសន្តិភាពបាន ដោយលំបាកនេះ។

ប្រភពដដែល បានបន្តថា «សូមចូលរួមរំលែកនូវមរណទុក្ខ ដោយក្តីសោកសង្រេងបំផុត ជាមួយក្រុមគ្រួសារសព ហើយសូមបួងសួងឲ្យវិញ្ញាណក្ខន្ធរបស់លោក ខាន់ សុវណ្ណ បានទៅសោយសុខក្នុងសុគតិភពកុំបីឃ្លៀងឃ្លាតឡើយ»៕

អត្ថបទ៖ ឃួន សុភ័ក្រ