សហគ្រាសមានពេល ៣០ថ្ងៃទៀត បញ្ចូលរបាយការណ៍ហិរញ្ញវត្ថុរបស់ខ្លួនទៅនិយ័តករគណនេយ្យនិងសវនកម្ម

និយ័តករគណនេយ្យនិងសវនកម្ម បានប្រកាសផ្តល់ពេលវេលាបន្ថែម ៣០ ថ្ងៃទៀត ដល់សហគ្រាសមិនរងសវនកម្មណា ដែលមិនទាន់បានដាក់បញ្ចូលរបាយការណ៍ហិរញ្ញវត្ថុប្រចាំឆ្នាំ ២០២១ មកកាន់និយ័តករគណនេយ្យ និងសវនកម្ម។

យោងតាមសេចក្តីជូនដំណឹងរបស់និយ័តករគណនេយ្យ និងសវនកម្មនៃអជ្ញាធរសេវាហិរញ្ញវត្ថុមិនមែនធនាគារ ដែលកម្ពុជាថ្មីទទួលបាននៅថ្ងៃទី ១២ ខែ មេសានេះ បានឱ្យដឹងថា ដោយសារតែប្រព័ន្ធដាក់បញ្ចូលទិន្នន័យ E-Filling System មានបញ្ហាបច្ចេកទេស ទើបធ្វើឲ្យការដាក់បញ្ចូលរបាយការណ៍ហិរញ្ញវត្ថុរបស់សហគ្រាសមានភាពរអាក់រអួល ហេតុដូចនេះ ទើប និយ័តករគណនេយ្យនិងសវនកម្ម(ន.គ.ស) ផ្តល់ពេលបន្ថែម ៣០ថ្ងៃទៀត ដោយគិតចាប់ពីថ្ងៃ ១៦មេសា ដល់ ១២ ឧសភា ឆ្នាំ ២០២២នេះ ដើម្បីឲ្យសហគ្រាសមិនរងសវនកម្មបានបានដាក់បញ្ចូល របាយការណ៍របស់ខ្លួនទាន់កាលកំណត់។

សេចក្តីជូនដំណឹងដដែល បានបញ្ជាក់ថា ក្នុងករណីសហគ្រាសណាមិនបានដាក់បញ្ចូលរបាយការណ៍ហិរញ្ញវត្ថុឆ្នាំ ២០២១ តាមការកំណត់ខាងលើទេ នោះសហគ្រាសនឹងត្រូវទទួលពិន័យអន្តរការណ៍ ដែលបានកំណត់នៅក្នុងអនុក្រិត្យលេខ ៧៩ អនក្រ.បក. ចុះថ្ងៃទី១ មិថុនា ឆ្នាំ២០២០ កន្លងទៅ៕

អត្ថបទ៖ នាង រតនៈ