អ្នកនាំពាក្យក្រសួងព័ត៌មាន ច្រានចោលចំពោះការលើកឡើងថា សេរីភាពសារព័ត៌មាននៅកម្ពុជា រងការ​រំលោភបំពាន

មន្ត្រីជាន់ខ្ពស់ក្រសួងព័ត៌មាន បានច្រានចោលចំពោះការលើកឡើង របស់មជ្ឈមណ្ឌលសិទ្ធិមនុស្សកម្ពុជា (CCHR) ដែលថា សេរីភាពសារព័ត៌មាន រងការរំលោភបំពានយ៉ាងធ្ងន់ធ្ងរ ក្នុងរយៈពេលប៉ុន្មានឆ្នាំចុងក្រោយនេះ ហើយថា ប្រព័ន្ធផ្សព្វផ្សាយឯករាជ្យ ត្រូវបានរងការដៅជាមុខសញ្ញា។

ការច្រានចោលនេះ បន្ទាប់ពីមជ្ឈមណ្ឌលសិទ្ធិមនុស្សកម្ពុជា (CCHR) កាលពីថ្ងៃទី ២៧ ខែមេសាកន្លងទៅនេះ បានចេញសេចក្ដីថ្លែងការណ៍មួយ ពាក់ព័ន្ធនឹងការចាប់ផ្ដើមយុទ្ធនាការ សម្រាប់ទិវាសេរីភាពសារព័ត៌មានពិភពលោក។ នៅក្នុងសេចក្ដីថ្លែងការណ៍នោះ CCHR បានលើកឡើងថា នៅប្រទេសកម្ពុជា ប្រព័ន្ធផ្សព្វផ្សាយឯករាជ្យ ត្រូវបានរងការដៅមុខសញ្ញា ហើយរបកគំហើញរបស់ ម.ស.ម.ក នាពេល​ថ្មីៗនេះ បង្ហាញថា សេរីភាពសារព័ត៌មាន រងការរំលោភបំពានយ៉ាងធ្ងន់ធ្ងរ ក្នុងរយៈពេលប៉ុន្មានឆ្នាំចុងក្រោយនេះ។

លោក មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានឲ្យដឹងអ្នកសារព័ត៌​មានកម្ពុជាថ្មី ដឹងនៅថ្ងៃទី ២៩ ខែមេសានេះថា ពាក់ព័ន្ធនឹងការលើកឡើង របស់មជ្ឍមណ្ឌលសិទ្ធិមនុស្សកម្ពុជា (CCHR) ដែលថា នៅប្រទេសកម្ពុជា ប្រព័ន្ធផ្សព្វផ្សាយឯករាជ្យ ត្រូវបានរងការដៅជាមុខសញ្ញា និងសេរីភាពសារព័ត៌មាន រងការរលោភបំពានយ៉ាងធ្ងន់ធ្ងរនោះ ជាការលើកឡើង ដែលពុំមានការពិត និងពុំត្រឹមត្រូវនោះទេ។

លោក មាស សុភ័ណ្ឌ បានបញ្ជាក់ថា សេរីភាពសារព័ត៌មាននៅព្រះរាជាណាចក្រកម្ពុជា ត្រូវបានធានា និងការពារយ៉ាងគត់មុត ដោយច្បាប់របបសារព័ត៌មាន ច្បាប់ និងលិខិតបទដ្ឋានគតិយុត្តិនានា ស្របតាម រដ្ឋធម្មនុញ្ញ នៃព្រះរាជាណាចក្រកម្ពុជា។ លោកថា តាមរយៈនេះ អ្នកសារព័ត៌មាន និងអង្គភាពសារព័ត៌មានគ្រប់និន្នាការ និងពហុនិយម អាចបំពេញតួនាទី ភារកិច្ច និងអនុវត្តសេរីភាពរបស់ពួកគេ ដោយសេរី និងស្មើភាពគ្នា បានគ្រប់ទីកន្លែងក្នុងព្រះរាជាណាចក្រកម្ពុជា និងពុំមានការរើសអើង ឬបំពាន សិទ្ធិសេរីភាព ឬគំរាមកំហែង ដូចការលើកឡើងរបស់អង្គការនេះ នោះទេ។

អ្នកនាំពាក្យក្រសួងព័ត៌មាន បានឲ្យដឹងបន្តថា ក្រសួងព័ត៌មាន តែតែងផ្តល់នូវការទទួលស្គាល់ភាព ស្របច្បាប់ និងផ្តល់តម្លៃដល់អង្គភាពសារព័ត៌មាន និងអ្នកសារព័ត៌មាន ដែលកំពុងប្រកបវិជ្ជាជីវៈសារព័ត៌មាននៅកម្ពុជា ស្មើៗគ្នា ដោយពុំមានការបែងចែកនូវនិន្នាការនយោបាយ ឬអង្គភាពសារព័ត៌មាន តូច ឬធំនោះទេ ហើយពួកគេត្រូវបានការពារ ដោយស្មើភាពគ្នាតាមផ្លូវច្បាប់។

មន្ត្រីជាន់ខ្ពស់ក្រសួងព័ត៌មានរូបនេះ បានគូសបញ្ជាក់ថា «ក្នុងរយៈពេលប៉ុន្មានឆ្នាំចុងក្រោយនេះ ការអនុវត្តសេរីភាពសារព័ត៌មាន នៅព្រះរាជាណាចក្រកម្ពុជា កាន់តែមានភាពប្រសើរជាប់លំដាប់។ ជាក់ស្ដែង បច្ចុប្បន្ននេះព្រះរាជាណាចក្រកម្ពុជា មានអង្គភាពផ្សព្វផ្សាយទាំងបែបប្រពៃណី និងបែបទំនើប (ផ្សព្វផ្សាយ តាមអនឡាញ និងឌីជីថល) ចំនួន ២១០០អង្គភាព និងមានអ្នកសារព័ត៌មានជាតិ និងបរទេស ដែលកំពុងប្រកបវិជ្ជាជីវៈសារព័ត៌មាននៅកម្ពុជា ប្រមាណជិត ៦០០០នាក់ ដែលក្នុងនោះមានស្រ្តីប្រមាណជា ៥០០នាក់ផងដែរ ដែលកំពុងបំពេញតួនាទីយ៉ាងសកម្ម ក្នុងការផ្សព្វផ្សាយព័ត៌មាន ក្នុង ប្រទេសកម្ពុជា និងពីជុំវិញពិភពលោកជូនដល់ប្រជាជនកម្ពុជា ទាំងក្នង និងក្រៅប្រទេស បានទទួល នូវព័ត៌មានយ៉ាងសំបូរបែប គ្រប់ពេលវេលា និងគ្រប់ទីកន្លែង ផងដែរ»។ 

លោកបន្ថែមថា «ដូច្នេះ យើងអាចនិយាយបានថា សេរីភាពសារព័ត៌មាន នៅព្រះរាជាណាចក្រកម្ពុជា  ពុំបានរងនូវការរំលោភបំពាន ដូចការលើកឡើង របស់អង្គការមជ្ឈមណ្ឌលសិទ្ធិមនុស្សកម្ពុជា នោះឡើយ»។ លោកអនុរដ្ឋលេខាធិការ បានបញ្ជាក់ទៀតថា ក្រសួងព័ត៌មាន ដែលជាសេនាធិការរបស់ រាជរដ្ឋាភិបាលកម្ពុជា នឹងបន្តនូជំហរគាំទ្រ និងបន្តខិតខំយ៉ាងមោះមុត ដើមម្បីលើកកម្ពស់សេរីភាពសារព័ត៌មាន នៅកម្ពុជា ដោយអនុលោមទៅច្បាប់ និងលិខិតបទដ្ឋានគតិយុត្តិជាធរមាន នៃព្រះរាជាណាចក្រកម្ពុជា​៕

អត្ថបទ៖ ឃួន សុភ័ក្រ