សត្វត្មាតរស់នៅតំបន់ព្រៃអភិរក្សសៀមប៉ាងទទួលបានចំណីមួយខែបួនដង

សត្វត្មាតនិងសត្វកម្រចំនួន ៤ ប្រភេទទៀតរស់នៅក្នុងតំបន់ព្រៃអភិរក្សសៀមប៉ាងក្នុងឃុំព្រែកមាស នឹងឃុំថ្មកែវ ស្រុកសៀមប៉ាង ខេត្តស្ទឹងត្រែង ទទួលបានចំណីក្នុងមួយខែបួនដង។

លោកលាង ប៊ុនប៉ែង មន្ត្រីអង្គការជីវិតសត្វស្លាបអន្តរជាតិប្រចាំស្រុកសៀមប៉ាងបាន​ឲ្យ​ដឹងថា សត្វត្មាតរួមទាំងសត្វកម្រ​បួន​ប្រភេទនោះមានប្រភេទសត្វត្រយ៉ងយក្ស សត្វចំកំកស សត្វត្រដក់តូច និង​ត្រដក់ធំ។

ដោយឡែកមួយប្រភេទទៀតនោះ ជាប្រភេទសត្វត្មាតដែលនៅសេសសល់ប្រមាណជាង ៩០ ទៅ ១០០ ក្បាលតែប៉ុណ្ណោះ​។

មន្ត្រីអង្គការជីវិតសត្វស្លាបបានបន្តឲ្យដឹងទៀតថា ការចូលរួមថែរក្សាសត្វទាំងនេះ គឺដើម្បីឲ្យសត្វត្មាតរួមសត្វបួនប្រភេទទៀត រស់នៅគង់វង្ស ពងកូន រស់នៅក្នុងព្រៃទឹកដីខេត្តស្ទឹងត្រែង កុំឱ្យវាទៅរស់នៅតំបន់ព្រៃប្រទេសឡាវ ដោយសារបច្ចុប្បន្នសត្វកម្រទាំងនេះវានៅសល់តិចតួចតែប៉ុណ្ណោះ។

លោកបន្តថា ដើម្បីឱ្យសត្វត្មាតនិងសត្វ បួនប្រភេទទៀតរស់នៅក្នុងតំបន់ព្រៃអភិរក្សសៀមប៉ាង យើងបានផ្តល់ជាចំណីបន្ថែម ធ្វើឡើងក្នុងមួយខែ៤ដង ជារៀងរាល់ខែ ដើម្បីឱ្យសត្វត្មាតវាមកស៊ី ព្រោះដោយសារចំណីធម្មជាតិក្នុងព្រៃ បច្ចុប្បន្នមិនសំបូរនោះទេ ។

លោកស៊ីន ដាន មេឃុំថ្មកែវ ស្រុកសៀមប៉ាងខេត្តស្ទឹងត្រែងបានសំណូមពរ និង​អំពាវនាវដល់បងប្អូនប្រជាពលរដ្ឋទាំងអស់ ចូលរួមអភិរក្សសត្វស្លាបនេះ វាអាចបំរើឱ្យវិស័យទេសចរណ៍ដោយសារភ្ញៀវទេសចរមកលេងចង់មើលពពួកសត្វដ៏កម្រទាំងនេះ។

សត្វត្មាតរួមសត្វបួនប្រភេទទៀតបច្ចុប្បន្ននេះ ពេលយើង​ដាក់ចំណីឱ្យម្តងៗសង្កេតឃើញមានសត្វត្រយ៉ងយក្ស- សត្វចំកំកស-សត្វត្រដក់តូច-នឹងត្រដក់ធំ-និងសត្វត្មាតមានចន្លោះចាប់ពី ៩០ក្បាលទៅ១០០ក្បាលតែប៉ុណ្ណោះ រស់នៅតំនប់ព្រៃអភិរក្សសៀមប៉ាងខេត្តស្ទឹងត្រែង៕

អត្ថបទ៖ ងិនលីម