ព័ត៌មានជាតិ

រាជរដ្ឋាភិបាលសម្រេចបង្កកដីជាង ១ ពាន់ហិកតា នៅកោះថ្ម ត្រៀមបង្កើតតំបន់សេដ្ឋកិច្ចពិសេស

បានផុស

៤ years មុន

នៅ

ថ្ងៃចន្ទ ២០ មិថុនា ២០២២

ដោយ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី ២០ ខែមិថុនា ឆ្នាំ ២០២២ នេះ បានសម្រេចបង្កកដីចំនួន ១ ១៧៦ ហិកតា ដើម្បីត្រៀមបម្រុងទុកការបង្កើតតំបន់សេដ្ឋកិច្ចពិសេស ឬរោងចក្រ នៅទីតាំងកោះថ្ម «X16» ឃុំទន្លូង ស្រុកមេមត់ ខេត្តត្បូងឃ្មុំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ ហ៊ុន សែន មានប្រសាសន៍ ក្នុងពិធី ប្រារព្ធខួប៤៥ឆ្នាំ នៃដំណើរតស៊ូរំដោះជាតិ នៅព្រំដែនកម្ពុជា-វៀតណាម ក្នុងខេត្តត្បូងឃ្មុំនៅព្រឹកថ្ងៃទី ២០ ខែមិថុនា ឆ្នាំ២០២២។

សម្ដេចតេជោ ហ៊ុន សែន មានប្រសាសន៍ថា ថ្ងៃក្រោយតំបន់នេះ ក្លាយទៅជាតំបន់ផ្លាស់ប្ដូរទំនិញដ៍ល្អ អ្នកដែលផលិតនៅតំបន់នេះ អាចចុះទៅកំពង់ផែ គីយឺត និងផ្លូវទៅទីក្រុងហ៊ូ ជីមិញ។ ហើយថា តំបន់នេះ អាចទៅជាតំបន់កែច្នៃ ព្រោះកសិផល និងវត្ថុធាតុដើមរបស់កម្ពុជាមានចំនួនច្រើននៅតំបន់ឥសាន ខេត្តក្រចេះ ដែលតភ្ជាប់នៅតំបន់ទាំងនេះ។

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក៏បានណែនាំឱ្យលោក ស៊ុន ចាន់ថុលរដ្ឋមន្ត្រីក្រសួងសាធារណការ និងដឹកជញ្ជូន ចាប់ផ្ដើមពង្រីកផ្លូវនៅទីតាំងនោះទៅព្រំដែនឱ្យបានប៉ុនស្មើផ្លូវជាតិលេខ ៧ ខណៈដែលសម្ដេចប្រកាសគ្រោងបើកច្រកអន្តរជាតិរវាងកម្ពុជា-វៀតណាមនៅទីតាំងកោះថ្ម «X16» ឃុំទន្លូង ស្រុកមេមត់ ខេត្តត្បូងឃ្មុំ៕