អាជីវកម្មរ៉ែក្នុងខេត្តមណ្ឌលគិរី សម្ដេច ហ៊ុន សែន ឱ្យពង្រឹងការគ្រប់គ្រងកុំឱ្យប៉ះពាល់ដល់បរិស្ថាន

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានណែនាំឱ្យមានការពង្រឹងលើការធ្វើអាជីវកម្មរ៉ែនៅក្នុងខេត្តមណ្ឌលគិរី ដើម្បីធានាបាននូវកិច្ចការពារធនធានធម្មជាតិ ហើយប្រាកដថាអាជីវកម្មរ៉ែមិនធ្វើឱ្យប៉ះពាល់ដល់បរិស្ថាន។

ការណែនាំរបស់សម្តេចតេជោ បានធ្វើឡើងនៅក្នុងកម្មវិធីសំណេះសំណាលជាមួយ​ក្រុម​ប្រឹក្សាខេត្ត ក្រុង ស្រុក ឃុំ សង្កាត់ និងអាជ្ញាធរពាក់ព័ន្ធក្នុងខេត្ត​មណ្ឌលគិរី កាលពីថ្ងៃទី៧ ខែកក្កដា ឆ្នាំ២០២៦។ នៅក្នុងជំនួបសំណេះសំណាលនោះ សម្តេចតេជោ ហ៊ុន សែន បានលើកឡើងពីការណែនាំលើកិច្ចការងារជាច្រើនដល់អាជ្ញាធរក្នុងខេត្តភូមិភាគឦសានមួយនេះ ជាអាទិ៍ការងារប្រមូលពន្ធដារ និងពន្ធគយ ការរក្សាសន្តិសុខ សណ្តាប់ធ្នាប់សង្គម ជំរុញការផ្ដល់សេវាសាធារណៈ រួមទាំងកិច្ចការពារធនធានធម្មជាតិ ជាដើម។

ពាក់ព័ន្ធនឹងកិច្ចការពារធនធានធម្មជាតិ សម្ដេចតេជោប្រធានព្រឹទ្ធសភា បានអំពាវនាវដល់អាជ្ញាធរគ្រប់លំដាប់ថ្នាក់ចូលរួមថែរក្សាធនធានធម្មជាតិឱ្យបានគង់វង្ស តាមរយៈការពង្រឹងកិច្ចការពារ អភិរក្ស និងទប់ស្កាត់រាល់បទល្មើសធនធានធម្មជាតិនានា ដែលមាននៅក្នុងមូលដ្ឋានរបស់ខ្លួន។ សម្ដេច បានសង្កត់ធ្ងន់ដល់ការធ្វើអាជីវកម្មរ៉ែនៅក្នុងខេត្តមណ្ឌលគិរី ធ្វើយ៉ាងណាកុំឱ្យប៉ះពាល់ដល់បរិស្ថាន។

បើតាមរបាយការណ៍របស់លោក គង់ គឹមនី អភិបាលខេត្តមណ្ឌលគិរី ក្នុងខេត្តភូមិភាគឦសានមួយនេះ មានក្រុមហ៊ុនវិនិយោគលើវិស័យរ៉ែចំនួន១៨ក្រុមហ៊ុនស្មើនឹង២១អាជ្ញាប័ណ្ណ ដែលក្នុងនោះមានក្រុមហ៊ុន រឺណេសង់ មីណឺរ៉ល (Renaissance Minerals) បានធ្វើអាជីវកម្មចម្រាញ់រ៉ែមាស តាំងពីឆ្នាំ២០២១ ហើយគិតរហូតមកដល់បច្ចុប្បន្ន ក្រុមហ៊ុននេះចម្រាញ់រ៉ែមាសបានចំនួនជាង១៨តោនមាស។

ជាការកត់សម្គាល់បន្ថែម ក្រុមហ៊ុន រឺណេសង់ មីណឺរ៉ល ដែលជា​ក្រុមហ៊ុន​ឧស្សាហកម្ម​មាន​មូលដ្ឋាន​នៅ​​ប្រទេស​អូស្រ្តាលី ទទួល​សិទ្ធិ​ធ្វើ​អាជីវកម្ម​​ពីរាជ​រដ្ឋាភិបាលកម្ពុជា​​បាន​ចាប់ផ្តើម​រុក​រក​រ៉ែមាស​នៅតំបន់អូខ្វាវ ក្នុងស្រុកកែវសីមា ដែល​បច្ចុប្បន្ន​​ក្រុមហ៊ុន​កំពុង​ប្រតិបត្តិ​នៅ​ក្នុង​រណ្ដៅរ៉ែមាសចំនួន៧រណ្ដៅ ហើយគ្រោង​នឹង​បន្តរណ្តៅទី៨បន្ថែមទៀត៕

ដោយ៖ ធឿន វ៉ាន់សុង