ព័ត៌មានជាតិ
ក្រោយវិបត្តិកូវីដ-១៩ តើកម្រិតវិញ្ញាសាប្រឡងសិស្សពូកែឡើងវិញ ត្រូវបានបន្ធូរបន្ថយ មែនទេ?
ការប្រឡងសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ឆ្នាំ២០២២ បានដំណើរការឡើងវិញ និងបញ្ចប់ដោយជោគជ័យ បន្ទាប់ពីខកខានរយៈពេល ២ ឆ្នាំ ដោយសារវិបត្តិ និងការទប់ស្កាត់ការឆ្លងរាលដាលជំងឺកូវីដ-១៩។ ថ្វីដ្បិត កម្ពុជា បានជួបវិបត្តិសាកលនេះដែរក្ដី ក៏មន្ត្រីក្រសួងអប់រំ យុវជន និងកីឡា អះអាងថា នៅតែរក្សាបានគុណភាពសិស្សពូកែ សម្រាប់ឆ្នាំ២០២២ មិនស្រកថមថយជាងបណ្ដាឆ្នាំមុនជួបវិបត្តិឡើយ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឱ្យ “កម្ពុជាថ្មី” ដឹងនៅរសៀលថ្ងៃទី២០ ខែមិថុនានេះថា បន្ទាប់ពី កម្ពុជា រងវិបត្តិសាកល ជំងឺកូវីដ-១៩ ដែលធ្វើឱ្យប៉ះពាល់ដល់ការសិក្សាមិនបានពេញលេញ អាក់ខានការប្រឡងសិស្សពូកែ ២ឆ្នាំមកនេះ។ ចំពោះ សិស្សពូកែទូទាំងប្រទេស គ្រប់កម្រិត គ្រប់មុខវិជ្ជា ឆ្នាំ២០២២នេះ នៅតែរក្សាគុណភាព និងសមត្ថភាពជាសិស្សពូកែទូទាំងប្រទេសដូចឆ្នាំកន្លងមក។
លោក រស់ សុវាចា បញ្ជាក់បន្ថែមថា ចំពោះវិញ្ញាសា គ្រប់ថ្នាក់ និងមុខវិជ្ជា នៃការប្រឡងសិស្សពូកែ ទូទាំងប្រទេសឆ្នាំ២០២២នេះ ត្រូវបានរៀបចំដោយ រក្សាយន្តការ និងដំណើរការប្រឡង ដូចឆ្នាំកន្លងមក និងពុំបានបន្ធូរបន្ថយកម្រិតវិញ្ញាសា ពោលគឺដើម្បីធានារក្សាគុណភាពសិស្សពូកែ។
មន្ត្រីជាន់ខ្ពស់ក្រសួងអប់រំ យុវជន និងកីឡា ខាងលើ មានប្រសាសន៍ថា លទ្ធផលប្រលងសិស្សពូកែទូទាំងប្រទេស ឆ្នាំ២០២២ បន្ទាប់ពីផ្អាកអស់រយៈពេល២ឆ្នាំ ដោយសារវិបត្តិជំងឺកូវីដ-១៩កន្លងមកនេះ បង្ហាញឱ្យឃើញ ពីការខិតខំប្រឹងប្រែងរៀនសូត្ររបស់បេក្ខជនប្រលង មុន និងក្នុងបរិបទកូវីដ-១៩ ក្រោមការជួយជ្រោមជ្រែងពីសំណាក់ លោកគ្រូអ្នកគ្រូ មាតាបិតា គណៈគ្រប់គ្រងគ្រឹះស្ថានសិក្សា បុគ្គលិកអប់រំ និងគ្រប់ភាគីពាក់ព័ន្ធ ប្រកបដោយការយកចិត្តទុកដាក់ខ្ពស់ ក្នុងការអនុវត្តបទបញ្ញត្តិប្រឡង និងវិធានការសុវត្ថិភាពសុខភាពនៅគ្រប់ដំណាក់កាលនៃការប្រឡង។
បណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា បច្ចុប្បន្ននេះ បច្ចេកវិទ្យា និងវិទ្យាសាស្ត្រទំនើបមានសន្ទុះរីកចម្រើនខ្លាំងណាស់ដែលជាហេតុនាំឱ្យនិន្នាការពិភពលោក និងប្រទេសក្នុងតំបន់កំពុងយកចិត្តទុកដាក់បណ្ដុះបណ្ដាលជួរអ្នកប្រាជ្ញជំនាន់ថ្មី វ័យក្មេងឱ្យមានសមត្ថភាព តាមទាន់របត់ចំណេះដឹងវិទ្យាសាស្ត្រជឿនលឿន ដើម្បីបម្រើសេចក្ដីត្រូវការរបស់សង្គមជាតិនីមួយៗ។
បណ្ឌិតសភាចារ្យ ណាត ប៊ុនរឿន បញ្ជាក់បន្ថែមថា ក្រសួងអប់រំ យុវជន និងកីឡា និងរាជរដ្ឋាភិបាល តែងយកចិត្តទុកដាក់ជាពិសេសយុវជន ដែលមានទេពកោសល្យខ្ពស់ ពូកែ ពីព្រោះអ្នកទាំងអស់នេះហើយ ដែលជាសសរទ្រូងដ៏រឹងមាំ របស់ប្រទេសជាតិ និងជាអ្នកស្នងអ្នកស្រករមុននាពេលអនាគត។
គួរបញ្ជាក់ថា ការប្រឡងសិស្សពូកែទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ប្រចាំឆ្នាំ ២០២២ បានដំណើរការអស់រយៈពេល ១សប្តាហ៍ ដោយមួយផ្នែកៗមាន ជ័យលាភីចំនួន ១០ រូប សរុប ៦០ រូប។ បេក្ខជនសិស្សពូកែតាមរាជធានី ខេត្ត ចូលរួមប្រឡងឆ្នាំនេះ មានចំនូន ៤៨០នាក់ មកពី ២៩៤សាលា លើចំនួនគ្រឹះស្ថានមធ្យមសិក្សាសរុប ១៨១២ ទូទាំងប្រទេស។ បេក្ខជនថ្នាក់ទី៩ មាន ២៤០នាក់ ស្រី១៤៩នាក់ បេក្ខជនថ្នាក់ទី១២ មាន ២៤០នាក់ ស្រី ១២២នាក់៕
អត្ថបទ៖ ច័ន្ទ វីរៈ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានជាតិ៥ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?