កូនខ្មែរ​មួយរូបបញ្ចេញស្នាដៃកែច្នៃឧបករណ៍​បាញ់ថ្នាំ​បម្រើឱ្យវិស័យកសិកម្ម​

ឧបករណ៍កែច្នៃជាគ្រឿងយន្តពាក់កណ្តាលស្វ័យប្រវត្តិសម្រាប់បម្រើឱ្យវិស័យកសិកម្មត្រូវបានកូនខ្មែរចេះច្នៃប្រឌិតឡើង ងាយស្រួលក្នុងការប្រើប្រាស់ និងបានផ្តល់ផលប្រយោជន៍ទៅដល់បងប្អូនកសិករដែលកំពុងដាំដុះ និងថែទាំដំណាំ ឧស្សាហកម្មបានគ្រប់ប្រភេទ។

លោក ហេង លាងពៅ រស់នៅភូមិត្នោតថ្មីឃុំសំអាង ស្រុកថាឡាបរិវ៉ាត់ បានបញ្ចាក់ថា៖ ឧបករណ៍កសិកម្មនេះសម្រាប់ប្រើបាញ់ថ្នាំសម្លាប់សត្វល្អិត និងថ្នាំបំប៉នទៅលើដំណាំ ព្រោះបច្ចុប្បន្នកសិករមានដីចំការធំៗបានដាំដំណាំឧស្សាហកម្មច្រើនប្រភេទ មានដូចជាកៅស៊ូ ស្វាយចន្ទី ស្វាយកែវល្មៀត ដំឡូងមី ជាដើមហើយពួកគាត់អាចបញ្ជាទិញយកទៅប្រើប្រាស់សម្រាប់ថែទាំដំណាំបានស្រួល។

លោកបន្តថា៖ ដោយសារតែភាពលំបាកកន្លងមកទើបរិះរកបច្ចេកទេសកែច្នៃឧបករណ៍នេះសម្រាប់ប្រើប្រាស់បានសម្រេចជោគជ័យ និងមានកសិករយើងមួយចំនួនបានទិញយកទៅប្រើរួចមកហើយដែរ។ ហើយជាងនេះទៀត អាចរកប្រាក់ចំណូលបាន ពីការទៅស៊ីឈ្នួលបាញ់ថ្នាំលើដំណាំឱ្យកសិករផ្សេងៗទៀត ដោយមិនបាច់ចំណាយពេលវេលាយូរក្នុងការបាញ់ថ្នាំនិងចៀសវាងបានពីផលប៉ះពាល់ផ្នែកសុខភាពផងដែរ។

លោកបន្ថែមថា៖ ឧបករណ៍ពាក់កណ្តាលស្វ័យប្រវត្តិនេះ ក្រុមការងារបច្ចេកទេស ផលិតមួយគ្រឿងត្រូវចំណាយពេលវេលាមួយសប្តាហ៍ និងចំណាយថវិកាទិញសម្ភារសរុបប្រមាណជិត ២.០០០ ដុល្លារហើយលក់ជូនអតិថិជនវិញមួយគ្រឿងមានតម្លៃចាប់ពី ២.៥០០រយ ទៅ៣.៥០០រយដូល្លាតាមការបញ្ជាទិញ។

លោក សុធី កសិករនៅភូមិរាជានុកូលសង្កាត់ក្រុងស្ទឹងត្រែងបានទទួលស្គាល់ថា៖ ឧបករណ៍បាញ់ថ្នាំនេះពិតជាបានជួយកាត់បន្ថយការប្រើកម្លាំងពលកម្ម ហើយបាញ់ថ្នាំបានសព្វល្អ និងបានលឿនឆាប់រហ័សចំណេញពេលវេលាធ្វើឱ្យដំណាំទទួលបានផលល្អថែមទៀត។

លោកបន្តថា៖ កសិករដែលដាំដំណាំឧស្សាហកម្មច្រើនគួមានឧបរណ៍នេះសម្រាប់ដោះស្រាយបញ្ហា ព្រោះបានប្រើប្រាស់ ខ្លួនឯងហើយ និងអាចទៅស៊ីឈ្នួលបាញ់ថ្នាំដំណាំឱ្យកសិករ ឬក្រុមហ៊ុនផ្សេងៗបានប្រាក់ចំណូលបន្ថែមទៀត។

សូមបញ្ជាក់ថា៖ កូនខ្មែរកែច្នៃឧបករណ៍ពាក់កណ្តាលស្វ័យប្រវត្តិសម្រាប់បម្រើឱ្យវិស័យកសិកម្មនេះ លោក ហេង​លាងពៅចេះផលិតរយៈពេល៣ឆ្នាំមកហើយ ដែលមានទីតាំងនៅភូមិត្នោតថ្មី ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង ស្ថិតនៅតាមបណ្តោយផ្លូវជាតិលេខ០៩ មានចម្ងាយពីទីរួមខេត្តស្ទឹងត្រែងប្រមាណជាង៣០គីឡូម៉ែត្រ៕

អត្ថបទ៖ ងិនលីម