ឆមាសទី១នេះ ខ្យល់កន្ត្រាក់បណ្តាលឱ្យមនុស្សស្លាប់ និងរបួសជាង២០នាក់ ប៉ះពាល់ផ្ទះពលរដ្ឋជាង៣ពាន់ខ្នង

នៅក្នុងឆមាសទី១ ឆ្នាំ២០២២នេះ គ្រោះធម្មជាតិដោយបាតុភូតខ្យល់កន្ត្រាក់បានកើតឡើងជាង១០០លើកបណ្តាលឱ្យមនុស្សស្លាប់និងរបួសជាង២០នាក់ និងខូខាតផ្ទះសម្បែងជាង៣ពាន់ខ្នង។

យោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយបានឱ្យដឹងថា ៦ខែឆ្នាំ២០២២នេះ បាតុភូតខ្យល់កន្ត្រាក់បានកើតឡើងចំនួន១០៨លើកបណ្តាលឱ្យរលំផ្ទះធ្ងន់ធ្ងរចំនួន៦៨៥ខ្នង របើកដំបូលផ្ទះនិងខូចខាតមធ្យមចំនួន​២៣៧៤ខ្នង របើកដំបូលសាលារៀន១៩ខ្នង ប៉ះពាល់តូបលក់ដូរ១៣តូប របើកអគាររដ្ឋបាល៦កន្លែង ស្លាប់មនុស្ស៣នាក់និងរបួស១៨នាក់។ ចំនួននេះបើធៀបទៅនឹងរយៈពេលដូចគ្នាឆ្នាំ២០២១កន្លងទៅឃើញថា មានការថយចុះគួរឱ្យកត់សម្គាល់។

ចំណែក៦ខែឆ្នាំ២០២១បាតុភូតខ្យល់កន្ត្រាក់បានកើតឡើងចំនួន១៣៨លើកបណ្តាលឱ្យរលំផ្ទះចំនួន៦០០ខ្នង របើកដំបូលផ្ទះ៤៥៦៥ខ្នង របើកសាលារៀន៣១ខ្នង ប៉ះពាល់តូបផ្សារ១០០តូបប៉ះពាល់អគាររដ្ឋបាល១៧កន្លែង ស្លាប់មនុស្ស៥នាក់និងរបួស៥៦នាក់ ខណៈ៦ខែឆ្នាំ២០២០មានបាតុភូតខ្យល់កន្ត្រាក់កើតឡើងចំនួន១៥៥លើកបណ្តាលឱ្យរលំផ្ទះចំនួន៧១១ខ្នង របើកដំបូលផ្ទះចំនួន៤៥០៥ខ្នង របើកដំបូលសាលារៀន២៤ខ្នង ប៉ះពាល់អគាររដ្ឋបាលចំនួន២៤ខ្នង ស្លាប់មនុស្ស៤នាក់និងរបួស៤៣នាក់៕

អត្ថបទ៖ សំអឿន