អាជ្ញាធរបន្ទាយមានជ័យ​បើកកិច្ចប្រជុំបិទទ្វារបញ្ចប់វិវាទដីធ្លី​ជិត ៨០០ ហិកតា​នៅក្រុងប៉ោយប៉ែត​

​អភិបាលរងខេត្តបន្ទាយមានជ័យ ​លោក ង៉ោ ម៉េង ជ្រួន ​នៅថ្ងៃទី​២៧ ខែកក្កដា ២០២២ បានដឹកនាំប្រជុំ​ចង្អៀតដោះស្រាយបញ្ចប់វិវាទដីធ្លី​ ទំហំ ៧៨៧ ហិកតា នៅភូមិសាស្ត្រក្រុងប៉ោយប៉ែត និងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ កិច្ចប្រជុំនេះហាមមិនឲ្យអ្នកកាសែតចូលរួមយកព័ត៍មានជាដាច់ខាត ដោយអាជ្ញាធរបានបិទ្វារប្រជុំនៅសាលប្រជុំក្រុមប្រឹក្សាខេត្ត។

ក្រោយកិច្ចប្រជុំ លោក ង៉ោ ម៉េងជ្រួន បានប្រាប់អ្នកសារព័ត៌មានថាកិច្ចប្រជុំបិទទ្វារមិន​ឲ្យអ្នក​កា​សែតចូលរួម​នេះមិនទទួលបានលទ្ធផលអ្វីទេ ប៉ុន្តែភាគីវិវាទបានយល់ព្រមឯកភាពគ្នាថា នឹងចូលតុជជែកគ្នានៅក្នុងបន្ទប់ប្រជុំដើម្បីសម្របសម្រួលដោះស្រាយគ្នានៅលើកក្រោយឆាប់ៗ នេះបន្តទៀត។

មន្ត្រីជំនាញដែលបានចូលរួមក្នុងកិច្ចប្រជុំនោះដែរបានបង្ហើបប្រាប់ឱ្យដឹងថា កិច្ចប្រជុំបាន ឯកភាពគ្នាលើ ៣ ចំណុច ទី១ គ្រប់ភាគីយល់ព្រមអនុវត្តកិច្ចព្រមព្រៀងបញ្ចប់វិវាទចុះថ្ងៃទី ១១ ខែឧសភា ឆ្នាំ២០២២ រវាងលោកឧកញ៉ា លី សាយឃាង និងលោក ញឹក ប៊ុនឆៃ ដោយឯកភាពគ្នាថា នឹងបន្តជួបប្រជុំសម្របសម្រួលគ្នាលើកក្រោយបន្តទៀត ទី២កិច្ចប្រជុំ នឹងកោះហៅឈ្មោះ តែ ភ័ណ្ឌណូរ៉ា អ្នកទិញដីទំហំ ៦៩ ហិកតាពីលោក ញឹក ប៊ុនឆៃ ដោយតម្រូវឱ្យទៅដោះស្រាយគ្នាជា​មួយ​ឧកញ៉ា លី សាយ ឃាង តាមកិច្ចព្រមព្រៀង នេះដែរ និងទី៣ កិច្ចប្រជុំនឹងបន្តដោះស្រាយរឿង​នេះ ជាមួយអ្នកពាក់ព័ន្ធដែលតម្រូវឱ្យមកចូលរួមដោះស្រាយបន្តទៀតផងដែរ៕

អត្ថបទ៖ វ៉ាន់ ណាង