ត្រី Oarfish បង្ហាញវត្តមាននៅវៀតណាម តើជាប្រផ្នូលអាក្រក់ឬយ៉ាងណា?

ជារឿងដ៏គួរឲ្យភ្ញាក់ផ្អើលដែលនៅសុខៗ ស្រាប់តែត្រី Oarfish អណ្តែតមកឆ្នេរសមុទ្រនៃខេត្ត Ninh Thuan ក្នុងប្រទេសវៀតណាម ធ្វើឲ្យមនុស្សមួយចំនួនភ័យថា នេះជាប្រផ្នូលមិនល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Oarfish ជាត្រីទឹកជ្រៅកម្រឡើងមកលើណាស់ ប៉ុន្តែមានជំនឿថា តែកាលណាវាឡើងមកទឹករាក់ហើយនោះ ប្រហែលជានៅបាតសមុទ្រកំពុងបញ្ជូនសញ្ញាគ្រោះធម្មជាតិដូចជារលកយក្សស៊ូណាមិ ឬការរញ្ជួយដី ហើយ។

តាមការចុះផ្សាយរបស់គេហទំព័រ Laodong, ត្រីនេះបង្ហាញវត្តមានក្នុងភូមិ Vinh Hy នៅឃុំ Vinh Hai នៃស្រុក Ninh Hai ខេត្ត Ninh Thuan។ អ្នកភូមិបានប្រទះឃើញត្រីនេះកាលពីព្រឹកថ្ងៃអាទិត្យទី១៨ខែឧសភាឆ្នាំ២០២៥ ដោយមានប្រវែងជិត២ម៉ែត្រ ប៉ុន្តែដាច់កន្ទុយ។

ពេលឃើញដំបូងត្រីនេះនៅមានជីវិតនៅឡើយ ប៉ុន្តែពេលអ្នកភូមិលែងវាចូលទៅក្នុងសមុទ្រវិញបានមួយភ្លែត វាក៏ងាប់តែម្តង។ យ៉ាងណាក្តី ព័ត៌មាននេះ មិនទាន់មានការបញ្ជាក់ជាផ្លូវការពីសំណាក់អាជ្ញាធរវៀតណាមនៅឡើយទេ។

នៅក្នុងរឿងព្រេងនិទានរបស់ជប៉ុន ត្រី Oarfish មានរហ័ស្សនាមថា «អ្នកនាំសារមកពីព្រះបរមរាជវាំងស្ដេចសមុទ្រ» ហើយវត្តមានសត្វត្រីនេះនៅទីណា រលកយក្សស៊ូណាមិឬរញ្ជួយដី អាចមាននៅទីនោះ។

ទោះបីជាយ៉ាងណាក៏ដោយ អ្នកវិទ្យាសាស្ត្រមិនបានរកឃើញព័ស្តុតាងជាក់លាក់ណាមួយ ដើម្បីគាំទ្រអំណះអំណាងអំពីទំនាក់ទំនងរវាងត្រីនេះ ជាមួយនឹងបាតុភូតរញ្ជួយដីនោះទេ៕

អត្ថបទ៖ សុខ សុវណ្ណ

ចុចអាន៖ ថៃ ជួបត្រី Oarfish ម្តងទៀតហើយ