កីឡា

លោក ណយ ផានណា លើកឡើងពីការប្រមូលផ្ដុំ និងត្រៀមខ្លួនរបស់កីឡាកាយសម្ព័ន្ធនៅស៊ីហ្គេម លើកទី៣៣

បានផុស

១១ ខែ មុន

នៅ

ថ្ងៃអង្គារ ២០ ឧសភា ២០២៥

ដោយ

លោក ណយ ផានណា ថាសហព័ន្ធកីឡាកាយសម្ព័ន្ធកម្ពុជា ត្រៀមកីឡាករ កីឡាការិនី ៧រូបចូលរួមប្រជែងមេដាយស៊ីហ្គេម លើកទី៣៣ ឯប្រទេសថៃ ខណៈការហ្វឹកហាត់ធ្វើឡើងជាប្រចាំរហូតមកហើយ និងមានផែនការបញ្ជូនទៅហាត់ក្រៅប្រទេសទៀតផង។

ទិដ្ឋភាពហ្វឹកហាត់កន្លងទៅ

អគ្គលេខាធិការសហព័ន្ធកីឡាកាយសម្ព័នកម្ពុជា លោក ណយ ផានណា បានឲ្យដឹងថា ស៊ីហ្គេមឆ្នាំនេះនៅឯប្រទេសថៃ សហព័ន្ធគ្រោងនឹងបញ្ជូនកីឡាករ ២រូប និងកីឡាការិនី ៥រូប។ កីឡាការិនីទាំង ៥រូបនេះនឹងប្រកួតលើវិញ្ញាសា Aerobic Gymnastics ជាក្រុម ចំណែកកីឡាករ ២រូនគឺនឹងប្រកួតលើវិញ្ញាសា Artistic Gymnastic 2-3 ឧបករណ៍តែប៉ុណ្ណោះ។

ទិដ្ឋភាពហ្វឹកហាត់កន្លងទៅ

គ្រូជំនាញខាងលើនេះបន្ថែមទៀតថា សហព័ន្ធមិនមែនត្រៀមតែស៊ីហ្គេមនោះទេ ពោលក្រុមកាយសម្ព័ន្ធកម្ពុជានឹងចូលរួមប្រកួតជើងឯកអាស៊ី លើកទី១០ មុនស៊ីហ្គេមនៅថៃនេះទៅទៀត។ សព្វថ្ងៃនេះសហព័ន្ធបានផ្ដោត និងពង្រឹងខ្លាំងលើឈុតធំដែលត្រៀមការប្រកួតទាំង២ កម្មវិធីខាងលើនេះ។ មានគ្រូច្រើននាក់ជួយកែចំណុចខ្វះខាត និងហ្វឹកហាត់ផ្ដោតលំហាត់សំខាន់ៗដែលត្រូវប្រកួតនៅពេលខាងមុខ។ ក្រៅពីនេះសហព័ន្ធកំពុងស្នើសុំទៅភាគីពាក់ព័ន្ធទាំងក្នុង និងក្រៅប្រទេសដើម្បីបញ្ជូនកីឡាករ កីឡាការិនីចេញទៅហ្វឹកហាត់បន្ថែមផងដែរដើម្បីជំរុញសមត្ថភាពពួកគេឲ្យកាន់តែរីកចម្រើនថែមទៀត។

ទិដ្ឋភាពហ្វឹកហាត់កន្លងទៅ

បញ្ជាក់ដែរថា កីឡាកាយសម្ព័ន្ធក៏ត្រូវបានដាក់ឲ្យប្រកួតប្រជែងមេដាយផងដែរនៅព្រឹត្តិការណ៍ស៊ីហ្គេម លើកទី៣៣ ក្នុងប្រទេសថៃ។ ព្រឹត្តិការណ៍អាស៊ីអាគ្នេយ៍នេះនឹងមាន ៥០ប្រភេទកីឡា ប្រកួតលើ ៥៧៤វិញ្ញាសា។ ស៊ីហ្គេម លើកទី៣៣ នេះនឹងចាប់ផ្ដើមឡើងពីថ្ងៃទី៩ ដល់ ២០ ខែធ្នូ ឆ្នាំ២០២៥៕