ព័ត៌មានជាតិ

ចិនប្ដេជ្ញាជំរុញការនាំទំនិញកសិផលកម្ពុជាទៅកាន់ទីផ្សារចិនឱ្យកាន់តែច្រើន

បានផុស

៣ years មុន

នៅ

ថ្ងៃពុធ ២៤ សីហា ២០២២

ដោយ

រដ្ឋាភិបាលចិនប្ដេជ្ញាបន្តអភិវឌ្ឍកិច្ចសហប្រតិបត្តិការសេដ្ឋកិច្ចជាមួយកម្ពុជាឱ្យកាន់តែខ្លាំងឡើងជាពិសេសជំរុញការនាំទំនិញកសិកម្មកម្ពុជា ទៅកាន់ទីផ្សារចិន និងការបង្កើនការហោះហើរត្រង់មកកម្ពុជា។

ការលើកឡើងបែបនេះគឺបានធ្វើឡើងក្នុងជំនូបរវាងសម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងលោក លីវ ជានចាវ ( Liu Jianchao) រដ្ឋមន្ត្រីក្រសួងទំនាក់ទំនងអន្តរជាតិនៃគណៈកម្មការមជ្ឈឹមបក្សកុម្មុយនីស្តចិននៅព្រឹកថ្ងៃទី ២៤ ខែសីហា ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនូបនោះ លោក លីវ ជានចាវ បានពាំនាំនូវការផ្ដាំផ្ញើរសួរសុខទុក្ខពីលោកប្រធានាធិបតីចិនស៊ី ជីនពីង និងនាយករដ្ឋមន្ត្រី លី កេជៀង ជូនសម្ដេចតេជោ។

លោក លីវ ជានចាវ មានប្រសាសន៍ថា «កាអភិវឌ្ឍសេដ្ឋកិច្ចបានបំពេញឱ្យសេចក្ដីត្រូវការរបស់ប្រជាជនកម្ពុជាក្នុងន័យនេះ ភាគីចិន និងបន្តអភិវឌ្ឍកិច្ចសហប្រតិបត្តិការសេដ្ឋកិច្ច ជាមួយកម្ពុជា ឱ្យកាន់តែខ្លាំងឡើងជាពិសេសជំរុញការនាំទំនិញកសិកម្ម កសិផលកម្ពុជា ទៅកាន់ទីផ្សារចិន ការបង្កើនការហោះហើរត្រង់មកម្ពុជា ការលើកទឹកចិត្តអ្នកវិនិយោគចិន មកកាន់កម្ពុជា និងជួយលើការអភិវឌ្ឍថាមពលបៃតង»។

លោក លីវ ជានចាវ មានប្រសាសន៍ថា រូបលោកធ្លាប់មកកម្ពុជានៅឆ្នាំ ២០០៤ រយៈពេល ១៨ មានការផ្លាស់ប្ដូរយ៉ាងខ្លាំង កម្ពុជាមានភាពស្រស់បំព្រងសេដ្ឋកិច្ចមានការលូតលាស់ ទីក្រុងមានការអភិវឌ្ឍ និងតួនាទីរបស់កម្ពុជា នៅលើឆាកអន្តរជាតិត្រូវបានទទួលស្គាល់ និងគោរព ទាំងនេះ លោក លីជាន ចាវ គោរពជូនសម្ដេចតេជោថា គឹឆ្លុះបញ្ចាំងនូវការដឹកនាំដ៍ត្រឹមត្រូវរបស់សម្ដេចតេជោ និងជាគំរូសម្រាប់ប្រទេសកំពុងអភិវឌ្ឍ។

ជាការឆ្លើយតបសម្ដេចតេជោ ហ៊ុន សែន នាយករដ្ឋមន្ត្រីកម្ពុជាមានប្រសាសន៍ថ្លែងអំណរគុណ លោក លីវ ជានចាវ ចំពោះការវាយតម្លៃការអភិវឌ្ឍន៍របស់កម្ពុជារយៈពេល ១៨ ឆ្នាំកន្លងមកនេះ។

សម្ដេចតេជោយល់ស្របថា ការអភិវឌ្ឋសេដ្ឋកិច្ចគឺបម្រើឱ្យសេចក្ដីត្រូវការរបស់ប្រជាជនក្នុងន័យនេះ សម្ដេចបានអរគុណ និងស្វាគមចំពោះការពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែប្រសើថែមទៀតជាពិសេសលើវិស័យ ពាណិជ្ជកម្ម កសិកម្ម វិនិយោគទុន ទេសចរណ៍ និងវិស័យថាមពលបៃតងផដែរ៕