ភ្លៀងបន្តធ្លាក់ពីរថ្ងៃ​ធ្វើឱ្យកម្ពស់ទឹកទន្លេហក់ឡើង​អាជ្ញាធរ​អំពាវនាវ​ឱ្យពលរដ្ឋ​ប្រុងប្រយ័ត្ន

ដោយសារទឹកភ្លៀងនៅតែបន្តធ្លាក់ជាប់ៗគ្នារយៈពេលពីរថ្ងៃ គឺថ្ងៃទី៥ និងទី ៦ ខែកញ្ញានេះធ្វើឱ្យទឹកទន្លេ​មានការហក់ឡើង បណ្ដាលឱ្យលិចភូមិឋានរបស់ប្រជាពលរដ្ឋនៅតំបន់ទំនាបក្នុងទឹកដីខេត្តកំពង់ឆ្នាំង។

​យោងតាមរបាយការណ៍របស់លោក ដោក ប៊ុនថុន ប្រធានមន្ទីរធនធានទឹក និងឧុតុនិយម​ខេត្តកំពង់ឆ្នាំង​បានឱ្យ​ដឹងនៅរសៀលថ្ងៃទី០៦ ខែកញ្ញានេះថា នៅស្ថានីយជលសាស្ត្រផ្សារក្រោម ទឹកទន្លេសាបមានកម្ពស់៧,៨១ម៉ែត្រ។ ដោយឡែកស្ថានភាពទឹកភ្លៀងមានកំរិត៣៧មីលីម៉ែត្រ គឺភ្លៀងធ្លាក់បានទាំង ៧ ក្រុងស្រុក ក្នុងខេត្តកំពង់ឆ្នាំង។

លោកប្រធានមន្ទីរធនធានទឹក និងឧតុនិយមខេត្តកំពង់ឆ្នាំងបានបញ្ជាក់ឲ្យដឹងទៀតថា ចំពោះស្ថានភាពទឹកទន្លេសាបកំពុងមានការហក់ឡើងនេះ លំនៅឋានរបស់ប្រជាពលរដ្ឋដែលកំពង់រស់នៅតាមដងទន្លេសាបមិនទាន់កើតមានគ្រោះមហន្តរាយណាមួយគួឱ្យព្រួយបារម្ភនោះទេ។

អភិបាលខេត្តកំពង់ឆ្នាំង លោក ស៊ុន សុវណ្ណារិទ្ធិ ក៏ដូចជាប្រធានមន្ទីរធនធានទឹក បានធ្វើការអំពាវនាវដល់បងប្អូនប្រជា ពលរដ្ឋដែលរស់នៅតាមដងទន្លេក៏ដូចជាការធ្វើដំណើរតាមផ្លូវទឹកពីតំបន់មួយទៅតំបន់មួយសូមមានការប្រុងប្រយ័ត្នខ្ពស់ចំពោះហានិភ័យជាយថាហេតុដោយសារភ្លៀងខ្យល់កន្ត្រាក់ និងផ្គររន្ទះ ក្នុងនោះកុមាតូចៗត្រូវមើល ការពារថែទាំពួកគាត់ដោយប្រុងប្រយ័ត្នខ្ពស់ដោយកុំទុកចោល អោយនៅតែម្នាក់ឯងអាចធ្វើអោយពួកគាត់ស្លា ប់ដោយសារការលង់ទឹកទន្លេ។

នៅក្នុងខែ សីហា ២០២២ កន្លងទៅនេះកើតមានករណីលង់ទឹកស្លាប់ចំនួន ៣ នាក់ក្នុងនោះមានក្មេង២នាក់ និងមនុស្សចាស់ម្នាក់ស្លាប់ផងដែរ៕

អត្ថបទ៖ ឈៀងថារិទ្ធ