ព័ត៌មានជាតិ

ពលរដ្ឋធ្វើដំណើរតាមដងផ្លូវ ស្នើក្រសួងសាធារណការ និងអាជ្ញាធរ ជួយពិនិត្យជួសជុលកំណាត់ផ្លូវជាតិលេខ ៣៣

បានផុស

៥ ខែ មុន

នៅ

ថ្ងៃព្រហស្បតិ៍ ៦ តុលា ២០២២

ដោយ

នៅថ្ងៃទី ៦ ខែតុលា ឆ្នាំ ២០២២ នេះ ប្រជាពលរដ្ឋ បានធ្វើដំណើរតាមកំណាត់ផ្លូវជាតិលេខ ៣៣ ដែលរងការខូចខាតជង្ហុកយ៉ាងខ្លាំង ចាប់ពីភូមិកំពង់ត្រាចទី ១ ស្ថិតក្នុងឃុំកំពង់ត្រាចខាងកើត ស្រុកកំពង់ត្រាច ខេត្តកំពត ឆ្ពោះទៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងនោះ ស្ថានភាពពិបាកក្នុងការធ្វើចរាចរណ៍ ដោយបានធ្វើដំណើរឆ្លងកាត់ផ្លូវជាតិលេខ ៣៣ តភ្ជាប់ទៅនឹងផ្លូវជាតិលេខ ៣១ នេះ កំពុងរងការខូចខាតជង្ហុកយ៉ាងខ្លាំង ហើយបងប្អូនប្រជាពលរដ្ឋអ្នកធ្វើដំណើរបានសំណូមពរទៅក្រសួងសាធារណការ និងដឹកជញ្ជូន និង អាជ្ញាធរពាក់ព័ន្ធ សូមមេត្តាជួយអន្តរាគមន៍ ជួសជុលស្ថាបនាឲ្យបានល្អប្រសើរ សម្រាប់ការធ្វើដំណើរបានស្រួល។ ព្រោះថា ផ្លូវជាតិលេខ ៣៣ នេះ មានសារៈសំខាន់សម្រាប់ភ្ញៀវទេសចរធ្វើដំណើរឆ្លងកាត់ច្រើន។

បន្ថែមពីនោះ ផ្លូវជាតិលេខ ៣៣ និងផ្លូវជាតិលេខ ៣១ នេះ មានសារៈសំខាន់ណាស់សម្រាប់ភ្ញៀវទេសចរ ដែលបានធ្វើដំណើរឆ្លងកាត់ទៅលេងកម្សាន្តនៅក្នុងភូមិសាស្ត្រខេត្តកែប និងខេត្តកំពតផងដែរ។

បន្ទាប់ពីមានភ្លៀងធ្លាក់ប៉ុន្មានថ្ងៃជាប់គ្នាកន្លងមក ធ្វើឲ្យកំណាត់ផ្លូវជាតិលេខ ៣៣ តភ្ជាប់ទៅនឹងផ្លូវជាតិលេខ ៣១ រងការទ្រុឌទ្រោម និងមានជង្ហុកយ៉ាងច្រើន ដោយទ្រាំនឹងរថយន្តដឹកថ្មធ្យូង រថយន្តដឹកដី រថយន្តតូច-ធំ ធ្វើដំណើររាប់សិបគ្រឿងជារៀងរាល់ថ្ងៃ ទើបរងការខូចខាតយ៉ាងធ្ងន់ធ្ងរ។ ទន្ទឹមនោះ អាជ្ញាធរ ហាក់ដូចជាពុំបានយកចិត្តទុកដាក់មើលកំណាត់ផ្លូវនេះឡើយ ទុកឲ្យប្រជាពលរដ្ឋធ្វើដំណើរឆ្លងកាត់យ៉ាងវេទនា។

បើយោងតាមប្រជាពលរដ្ឋរស់នៅតំបន់នោះបានឲ្យដឹងទៀតថា រយៈពេលប្រមាណជាង ២ ខែមកហើយ ដែលកំណាត់ផ្លូវជាតិលេខ ៣៣ និងកំណាត់ផ្លូវជាតិលេខ ៣១ នេះ បានតភ្ជាប់ទៅនឹង ផ្លូវជាតិលេខ ៣ ឆ្ពោះរាជធានីភ្នំពេញ រងការខូចខាតធ្ងន់ធ្ងរ ក្នុងនោះមានជង្ហុកធំៗឆ្ពោះទៅរាជធានីភ្នំពេញ និងមានទឹកដក់ពេលភ្លៀងស្ទើរក្លាយជាកូនត្រពាំងទៅហើយ ជាហេតុធ្វើឲ្យប្រជាពលរដ្ឋ ដែលធ្វើដំណើរតាមម៉ូតូ និងរថយន្តតូច-ធំ មួយចំនួន ក៏បានរអ៊ូ ដោយសារផ្លូវមានជង្ហុកខ្លាំងពេក។

ប្រជាពលរដ្ឋ សំណូមពរឲ្យក្រសួងពាក់ព័ន្ធ ក៏ដូចជា អាជ្ញាធរ មេត្តាជួយមើលផ្លូវ និងជួសជុលផងដើម្បីឲ្យកំណាត់ផ្លូវជាតិលេខ ៣៣ និងផ្លូវជាតិលេខ ៣១ ដែលតភ្ជាប់ទៅនឹងផ្លូវជាតិលេខ ៣ ឆ្ពោះទៅរាជធានីភ្នំពេញ ដ៏មានសារៈសំខាន់នេះ ឲ្យមានចរាចរណ៍បានស្អាតឡើងវិញ៕

អត្ថបទ ៖ សឹង រ៉ាត់