៩ ខែឆ្នាំនេះ គ្រោះមហន្តរាយបណ្តាលឲ្យមនុស្សស្លាប់ និងរបួសជាង ២០០ នាក់ បំផ្លាញផ្ទះសម្បែង​ជិត ៥ ពាន់ខ្នង​

យោង​តាម​របាយការណ៍​របស់​គណៈកម្មាធិការ​គ្រប់គ្រង​គ្រោះ​មហន្តរាយ​បាន​ឲ្យ​ដឹង​ថា ក្នុង​រយៈពេល ៩ ខែ ឆ្នាំ ២០២២ នេះ គ្រោះ​មហន្តរាយ​បង្កឡើង​ដោយ​ខ្យល់​កន្ត្រាក់ រន្ទះបាញ់ និង​អគ្គិភ័យ បាន​សម្លាប់​មនុស្ស​ចំនួន ៦៨ នាក់ របួស ១៥២ នាក់ បំផ្លាញ​ផ្ទះសម្បែង ៤៧៨៣ ខ្នង​សាលារៀន ៤០ ខ្នង អគារ​រដ្ឋបាល ២៣ កន្លែង តូប​ផ្សារ ៨០ តូប ឃ្លាំង​ទំនិញ និង​រោងចក្រ​សិប្បកម្ម​ ២៥ កន្លែង និង​ងាប់​គោក្របី ៨៤ ក្បាល។

របាយការណ៍​ដដែល​បាន​បន្ត​ថា ក្នុង​នោះ​ខ្យល់​កន្ត្រាក់​បាន​កើត​ឡើង​ចំនួន ១៥៦ លើក បណ្តាល​ឲ្យ​រលំ​ផ្ទះ ៩៤៣ ខ្នង របើក​ដំបូល​ផ្ទះ ៣២០១ ខ្នង របើក​ដំបូល​សាលារៀន ៣៨ ខ្នង តូប​ផ្សារ ១៣ តូប អគារ​រដ្ឋបាល ២១ កន្លែង ស្លាប់​មនុស្ស ៣ នាក់ និង​របួស ៥៩ នាក់ នៅ​រយៈពេល ៩ ខែ។

ចំណែក​រន្ទះបាញ់​វិញ​កើតឡើង​ចំនួន ៩៥ លើក ប៉ះពាល់​ផ្ទះ ២២ ខ្នង ស្លាប់​មនុស្ស ៥៣ នាក់ របួស ៤៩ នាក់ និង​ងាប់​គោក្របី ៨៤ ក្បាល និង​គ្រោះ​អគ្គិភ័យ​កើតឡើង ៣៥៧ លើក ប៉ះពាល់​ផ្ទះ ៦១៧ ខ្នង ឆេះ​តូប​ផ្សារ ៧៧ តូប ឃ្លាំង​ទំនិញ ១៦ កន្លែង សាលារៀន ២ ខ្នង រោងចក្រ​សិប្បកម្ម ៩ កន្លែង អគារ​រដ្ឋបាល ២ កន្លែង ស្លាប់​មនុស្ស ១២ នាក់ និង​រង​បួស ៤៥ នាក់ ក្នុង​រយៈពេល ៩ ខែ​ដូចគ្នា។

របាយការណ៍​បាន​បន្ត​ទៀត​ថា ក្នុង​ចំណោម​អ្នក​ស្លាប់​ដោយសារ​គ្រោះ​អគ្គិភ័យ ១២ នាក់ ក្នុង​នោះ​នៅ​ភ្នំពេញ​មាន​ចំនួន ៤ នាក់ ក្នុង ៨៧ លើក បំផ្លាញ​ផ្ទះសម្បែង ២២៧ ខ្នង តូប ១៤ តូប ឃ្លាំង​ទំនិញ ៩ កន្លែង រោងចក្រ​សិប្បកម្ម ៣ កន្លែង និង​សាលារៀន ១ កន្លែង ខេត្ត​កំពង់ស្ពឺ​ស្លាប់ ២ នាក់ ស្វាយរៀង ២ នាក់ ក្រចេះ ២ នាក់ កំពង់ចាម ១ នាក់ និង​សៀមរាប ១ នាក់៕

អត្ថបទ ៖ សំអឿន