ព័ត៌មានជាតិ
អ្នកនាំពាក្យ ៖ ការចុះឈ្មោះបោះឆ្នោត នឹងត្រូវធ្វើឡើងជាធម្មតា ក្នុងកំឡុងពេលបុណ្យអុំទូក ៣ថ្ងៃ
មន្ត្រីជាន់ខ្ពស់ គ.ជ.ប បានអះអាងថា ការចុះឈ្មោះបោះឆ្នោត នឹងត្រូវធ្វើឡើងជាធម្មតាមិនមានការឈប់សម្រាកឡើយ ក្នុងកំឡុងពេលព្រះរាជពិធីបុណ្យអុំទូករយៈពេល ៣ថ្ងៃ។ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ នាឆ្នាំ ២០២២នេះ ចំថ្ងៃទី ៧-៨-៩ ខែវិច្ឆិកា។ ក្នុងរយៈពេល ៣ថ្ងៃនេះ មន្ត្រីរាជការ បុគ្គលិកក្រុមហ៊ុន និងកម្មករ ត្រូវបានអនុញ្ញាតឲ្យឈប់សម្រាក។
លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ៣ ខែវិច្ឆិកានេះថា ក្នុងកំឡុងពេលព្រះរាជពិធីបុណ្យអុំទូករយៈពេល ៣ថ្ងៃ ក្រុមការងារចុះឈ្មោះបោះឆ្នោត មិនមានការឈប់សម្រាកនោះទេ។ ដូច្នេះ ប្រជាពលរដ្ឋខ្មែរដែលគ្រប់អាយុ អាចទៅចុះឈ្មោះបោះឆ្នោតបាន នៅថ្ងៃឈប់សម្រាកទាំង ៣ថ្ងៃនោះ។
លោក សោម សូរីដា មានប្រសាសន៍ថា «សម្រាប់ពិធីបុណ្យអុំទូកនេះ ក្រុមចុះឈ្មោះបោះឆ្នោតនៅបន្តការងាររបស់ខ្លួន មានន័យថា គ.ជ.ប បន្តការចុះឈ្មោះបោះឆ្នោតជូនប្រជាពលរដ្ឋ នៅក្នុងឱកាសបុណ្យអុំទូក ដែលមានរយៈពេល ៣ថ្ងៃ ដោយពុំមានការឈប់នោះទេ ចឹងប្រជាពលរដ្ឋដែលឈប់សម្រាកនៅថ្ងៃបុណ្យ អាចអញ្ជើញទៅចុះឈ្មោះបោះឆ្នោត នៅតាមការិយាល័យចុះឈ្មោះបោះឆ្នោត»។
បើតាមអ្នកនាំពាក្យ គ.ជ.ប រយៈពេល ១៤ថ្ងៃ នៃការចុះឈ្មោះបោះឆ្នោតឆ្នាំ ២០២២ នៅទូទាំងប្រទេស មានប្រជាពលរដ្ឋចុះឈ្មោះបោះឆ្នោតថ្មីចំនួន ១៨៥,២៧១ នាក់។ ចំណែកអ្នកដែលនឹងត្រូវលុបឈ្មោះចេញពីបញ្ជីបោះឆ្នោតមានចំនួន ១០៩,០៣៥នាក់ ហើយអ្នកដែលបានកែតម្រូវទិន្នន័យ មានចំនួន ១៣,២៨១ នាក់ និងអ្នកដែលបានផ្ទេរទីលំនៅចូលក្នុងឃុំ-សង្កាត់ថ្មី មានចំនួន ៥៧,៣៦៩នាក់។
លោកអគ្គលេខាធិការរង បានឲ្យដឹងបន្តថា ក្នុងរយៈពេល ១៤ថ្ងៃ នៃការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ ២០២២នេះ បានប្រព្រឹត្តទៅដោយរលូន នៅក្នុងបរិយាកាសសន្តិសុខសុវត្ថិភាព និងសណ្ដាប់ធ្នាប់សាធារណៈល្អ ដោយមិនមានបញ្ហាណាមួយកើតឡើងយ។
សូមជម្រាបថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ ២០២២ ប្រព្រឹត្តទៅចាប់ពីថ្ងៃទី ២០ ខែតុលា ដល់ថ្ងៃទី ៨ ខែធ្នូ ឆ្នាំ ២០២២ គិតទាំងថ្ងៃសៅរ៍ និងថ្ងៃអាទិត្យ៕
អត្ថបទ៖ ឃួន សុភ័ក្រ
-
ព័ត៌មានជាតិ១ សប្តាហ៍ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ៣ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ម៉ោង ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានអន្ដរជាតិ១ សប្តាហ៍ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
កីឡា៤ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៣ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
ព័ត៌មានជាតិ៧ ថ្ងៃ ago
សម្តេច ហ៊ុន សែន ៖ ហេតុអ្វីបានជាមកដល់ពេលនេះហើយមានមន្ត្រីយើងប្រព្រឹត្តបែបនេះ ដោយពាក់ស្បែកជើងចូលក្នុងព្រះវិហារ?
-
សន្តិសុខសង្គម៥ ថ្ងៃ ago
បឋម៖ អគ្គិភ័យកំពុងឆេះរោងចក្រជិតផ្សារបែកចាន (មានវីដេអូ)