មកដឹងតម្លៃបន្ទប់ ដែលស្ថាប័នព័ត៌មានជួល​សម្រាប់យកព័ត៌មាន​កិច្ចប្រជុំកំពូលអាស៊ាន

ក្រសួងព័ត៌មានបានរៀបចំសាល ហៅថា មជ្ឈមណ្ឌលព័ត៌មាន សម្រាប់ស្ថាប័នព័ត៌មានជាតិ និងអន្តរជាតិ អង្គុយធ្វើការ និងរង់ចាំយកព័ត៌មាន ដើម្បីផ្សព្វផ្សាយអំពីកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធលើទី ៤០ និងទី ៤១ នៅសណ្ឋាគារសុខា ភ្នំពេញ។

ស្ថាប័ន ដែលជួលបន្ទប់ VIP ឬហៅថា Booth បានឱ្យដឹងថា ការជួលរយៈពេល៤ថ្ងៃនេះ មានតម្លៃ ២៥០០ដុល្លារ។

បើតាមអង្គភាពព័ត៌មានដែលជួលបន្ទប់នេះ បានលើកឡើងទៀតថា ចំណុចពិសេសនៃបន្ទប់នេះ គឺមានអ៊ីធើណេត​ល្បឿនលឿនជាងអ្នកនៅខាងក្រៅ មានលក្ខណៈឯកជនងាយស្រួលធ្វើការ និងទុកដាក់សម្ភារៈផ្សេងៗ ជាពិសេស​មិនបែកអារម្មណ៍ក្នុងការចាប់ជ្រុងសរសេរព័ត៌មាន ឬបង្ហោះលើវេបសាយ និងបញ្ជូនព័ត៌មានទៅមកបានលឿនជាដើម។

លោក ផុស សុវណ្ណ ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន បានឱ្យដឹងថា អ្នកសារព័ត៌មានជាតិនិងអន្តរជាតិ បានចុះឈ្មោះយកព័ត៌មាន ក្នុងកិច្ចប្រជុំកំពូល​អាស៊ានលើកទី៤០និង៤១ និងកិច្ចប្រជុំពាក់ព័ន្ធ ចំនួនជាង១៧០០នាក់ ក្នុងនោះមានជនបរទេសចំនួន​ប្រហែល​៩០០នាក់។

សូមបញ្ជាក់ថា កិច្ចប្រជុំកំពូលអាស៊ាន ដែលកម្ពុជាធ្វើជាប្រធាន និងជាម្ចាស់ផ្ទះ បានប្រព្រឹត្តិទៅអស់រយៈពេល ៤ថ្ងៃ គឺចាប់ពីថ្ងៃទី ១០-១៤ ខែវិច្ឆិកា ឆ្នាំ ២០២២។

ក្រោយបញ្ចប់កិច្ចប្រជុំសម្តេចតេជោ ហ៊ុន សែន នាយករដ្ឋមន្រ្តី បានគូសបញ្ជាក់នៅក្នុងសន្និសីទសារព័ត៌មាន​នារសៀលថ្ងៃទី ១៣ វិច្ឆិកា ថា កិច្ចប្រជុំនេះ ដំណើរការទៅដោយរលូន ទទួលបានជោគជ័យយ៉ាងត្រចះត្រចង់ និងជាប្រវត្តិសាស្រ្តរបស់កម្ពុជាផងដែរ៕