អាមេរិក មិន​រំពឹង​វត្តមាន​ចិន​នៅ​ក្នុង​ពិធី​ចុះ​ហត្ថលេខា​កិច្ចព្រមព្រៀង​សន្តិភាព​កម្ពុជា-ថៃ

យោង​តាម​ការ​ចុះ​ផ្សាយ​របស់​រ៉យទ័រ ប្រភព​ពី​មន្ត្រី​អាមេរិក បាន​លើក​ឡើង​ថា ប្រទេសចិនបានដើរតួនាទីមានកម្រិតក្នុងការជួយ​សម្រប​សម្រួល​កិច្ចព្រមព្រៀងសន្តិភាព​រវាងប្រទេសកម្ពុជា និងថៃ ហើយមិនត្រូវរំពឹងថានឹងចូលរួមក្នុងព្រឹត្តិការណ៍​នា​ចុងសប្តាហ៍​នេះ​នៅ​ប្រទេស​​ម៉ាឡេស៊ី​ ពាក់ព័ន្ធ​​នឹង​ការ​ចុះ​ហត្ថលេខា​លើ​​កិច្ចព្រមព្រៀងនេះទេ។

មន្ត្រីអាមេរិក​ជាន់​ខ្ពស់​មួយ​រូប​បានប្រាប់រ៉យទ័រថា «តាមទស្សនៈរបស់សហរដ្ឋអាមេរិក យើងពិតជា​ជឿថា ប្រទេសចិន​មិន​បានដើរតួនាទីយ៉ាងសំខាន់នោះទេ ក្នុងការសម្រេចបាននូវសន្តិភាព។ ខ្ញុំ​មិន​រំពឹង​ថា​នឹង​ឃើញ​ចិន​ចូល​រួម​នោះ​ឡើយ»។

កិច្ចព្រមព្រៀងបទឈប់បាញ់ដែលមានគោលបំណងបញ្ចប់ជាផ្លូវការនូវភាពតានតឹងនៅតាមព្រំដែនជាច្រើនខែរវាងប្រទេសជិតខាងអាស៊ីអាគ្នេយ៍ទាំងពីរ ត្រូវបានគេរំពឹងថានឹងចុះហត្ថលេខានៅចុងសប្តាហ៍នេះនៅទីក្រុងគូឡាឡាំពួ នៅខាងក្រៅកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ (អាស៊ាន)។

ប្រធានាធិបតីអាមេរិកលោក ដូណាល់ ត្រាំ នឹង​ធ្វើជាសាក្សីនៃការចុះហត្ថលេខានេះ ដែលរដ្ឋមន្ត្រីការបរទេសម៉ាឡេស៊ីកាលពីសប្តាហ៍មុនបានពណ៌នាថាជា «ព្រឹត្តិការណ៍ប្រវត្តិសាស្ត្រសម្រាប់ស្ថិរភាពក្នុងតំបន់»។

កិច្ចព្រមព្រៀងសន្តិភាពដែលបានចរចាក្រោមក្របខណ្ឌរបស់អាស៊ានជាមួយនឹងការគាំទ្រការទូតរបស់សហរដ្ឋអាមេរិក ត្រូវបានគេមើលឃើញយ៉ាងទូលំទូលាយថាជាជំហានដ៏សំខាន់មួយឆ្ពោះទៅរកការបន្ធូរបន្ថយ បន្ទាប់ពីមានការប៉ះទង្គិចគ្នាដោយយោធាកាលពី​ខែ​កក្កដានៅតាម​ព្រំដែនកម្ពុជា-ថៃ។

ការកត់សម្គាល់របស់មន្ត្រីជាន់ខ្ពស់អាមេរិករូបនេះ បានលើកឡើងថា បើទោះបីជាទីក្រុងប៉េកាំង មានឥទ្ធិពលកាន់តែខ្លាំងឡើងនៅក្នុងតំបន់អាស៊ីអាគ្នេយ៍ដីគោកក៏ដោយ ការចូលរួមរបស់ខ្លួនក្នុងដំណើរការសន្តិភាពមានតិចតួច ដែលបង្ហាញពីជំហរការទូតដ៏រឹងមាំរបស់ទីក្រុងវ៉ាស៊ីនតោន នៅក្នុងតំបន់ក្រោមការដឹកនាំរបស់លោកត្រាំ។

លោកត្រាំ ក៏គ្រោងនឹង​ជួបជាមួយប្រធានាធិបតីចិន ស៊ី ជីនពីង នៅថ្ងៃព្រហស្បតិ៍សប្តាហ៍ក្រោយក្នុង​ប្រទេសកូរ៉េខាងត្បូង ដើម្បីពិភាក្សាអំពីពាណិជ្ជកម្ម និងបញ្ហាទ្វេភាគីផ្សេងទៀត។ នេះបើយោងតាមមន្ត្រីអាមេរិក។

អវត្ដមាននៃការចូលរួមរបស់ចិននៅក្នុងពិធីឈប់បាញ់បានគូសបញ្ជាក់អំពីការផ្លាស់ប្តូរភូមិសាស្ត្រនយោបាយនៅក្នុងតំបន់អាស៊ីអាគ្នេយ៍ ដែលសហរដ្ឋអាមេរិកកំពុងស្វែងរកការអះអាងឡើងវិញនូវឥទ្ធិពលរបស់ខ្លួន ចំពេលដែលការប្រជែងគ្នារវាងសហរដ្ឋអាមេរិក និងចិនកាន់តែខ្លាំងក្លា៕

ដោយ៖ ឈាង