ព័ត៌មានអន្ដរជាតិ

លោក Anutin លុបចោលដំណើរកិច្ចប្រជុំកំពូលអាស៊ាន ដើម្បីកាន់ទុក្ខមាតាស្តេចថៃ

បានផុស

៩ ខែ មុន

នៅ

ថ្ងៃសៅរ៍ ២៥ តុលា ២០២៥

ដោយ

Chheang

នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក Anutin Charnvirakul បានលុបចោលការធ្វើដំណើរទៅចូលរួមកិច្ចប្រជុំកំពូលមេដឹកនាំអាស៊ាននៅប្រទេសម៉ាឡេស៊ី នាថ្ងៃសៅរ៍ទី២៥ខែតុលានេះ ដើម្បីធ្វើជាប្រធានកិច្ចប្រជុំគណៈរដ្ឋមន្ត្រីពិសេសមួយ ដើម្បីកាន់ទុក្ខចំពោះម្ចាស់ក្សត្រី Sirikit ដែលជាព្រះមាតាស្តេច Vajiralongkorn ដែលសោយទិវង្គតកាលពីថ្ងៃសុក្រ។

លោក Anutin Charnvirakul (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បរិយាកាសនៅវិមានរដ្ឋាភិបាលថៃនៅព្រឹកថ្ងៃសៅរ៍នេះមានសភាពស្ងប់ស្ងាត់ ខណៈរដ្ឋមន្ត្រី មន្ត្រីរាជការ និងអ្នកសារព័ត៌មានសុទ្ធតែស្លៀកពាក់ខ្មៅចូលគោរពវិញ្ញាណក្ខន្ធ។ នៅម៉ោង៨ព្រឹក ទង់ជាតិត្រូវបានបន្ទាបមកត្រឹមពាក់កណ្តាល ដើម្បីឧទ្ទិសដល់វិញ្ញាណក្ខន្ធម្ចាស់ក្សត្រី Sirikit។

យ៉ាងណាមិញ បើតាមការចុះផ្សាយរបស់ The Nation ប្រភពពីវិមានរដ្ឋាភិបាលថៃបាននិយាយថា ឥឡូវនេះលោកនាយករដ្ឋមន្ត្រីនឹងធ្វើដំណើរទៅប្រទេសម៉ាឡេស៊ីនៅថ្ងៃអាទិត្យស្អែកវិញ ជាកន្លែងដែលលោកត្រូវបានគេរំពឹងថានឹងចូលរួមកិច្ចប្រជុំកំពូលមេដឹកនាំអាស៊ាន និងធ្វើជាសាក្សីក្នុងការចុះហត្ថលេខាលើកិច្ចព្រមព្រៀងសន្តិភាពកម្ពុជា-ថៃ ដែលមានប្រធានាធិបតីសហរដ្ឋអាមេរិក ដូណាល់ ត្រាំ ជាអ្នកសង្កេតការណ៍។ ពិធីចុះហត្ថលេខាដែលបានគ្រោងទុកដំបូងសម្រាប់ពេលរសៀល អាចត្រូវបានផ្លាស់ប្តូរទៅពេលព្រឹក ដើម្បីសម្រួលដល់ការចូលរួមរបស់លោក Anutin។ ប្រសិនបើអាមេរិកមិនអាចសម្របបាន នោះរដ្ឋមន្ត្រីក្រសួងការបរទេសថៃ នឹងចុះហត្ថលេខាតាំងនាមជំនួសឲ្យនាយករដ្ឋមន្ត្រី Anutin។

សូមជម្រាបថា ម្ចាស់ក្សត្រី Sirikit សោយទិវង្គតនាវេលាម៉ោង៩:២១នាទី ថ្ងៃសុក្រទី២៤ខែតុលាឆ្នាំ២០២៥ នៅមន្ទីរពេទ្យ King Chulalongkorn Memorial។ ទ្រង់មានជំងឺដាច់សរសៃឈាមខួរក្បាលប្រភេទ Ischemic កាលពីឆ្នាំ២០១២ ហើយចាប់តាំងពីពេលនោះមក គេមិនសូវបានឃើញព្រះរាជវត្តមានរបស់ទ្រង់នោះទេ៕