ព័ត៌មានជាតិ
តំបន់ទឹកធ្លាក់ ៥កន្លែងមានទេសភាពស្រស់ស្អាតប្លែកភ្នែកក្នុងទឹកដីខេត្តកំពត
លោកអ្នកដែលមានបំណងទៅលេងខេត្តកំពតស្រលាញ់ធម្មជាតិមានទឹកធ្លាក់ជាមួយទេសភាពដ៏គួរឱ្យគយគន់ប៉ុន្តែមិនសូវស្គាល់ទីតាំង ឬមិនដឹងថាគួរទៅកន្លែងណាអាចសាកល្បងអានអត្ថបទមួយនេះបាន។ “កម្ពុជាថ្មី” នឹងបង្ហាញលោកអ្នកអំពីតំបន់ទឹកធ្លាក់ ៥កន្លែង នៅលើទឹកដីខេត្តកំពត ដើម្បីផ្តល់ភាពងាយស្រួលចំពោះដំណើរកម្សាន្ត។
១.រមណីយដ្ឋាន ទឹកធ្លាក់តាដាសច្ចំ
រមណីយដ្ឋាន ទឹកធ្លាក់តាដាសច្ចំ ឬ ហៅថា រមណីយដ្ឋានធម្មជាតិ កោះតាដា ស្រុកនៅឃុំស្នំប្រាំពីរ ស្រុកទឹកឈូ ខេត្តកំពត។ ប្រសិនជាលោកអ្នកធ្វើដំណើរពីទីរួមខេត្តកំពត គឺមានចម្ងាយប្រមាណ ១៧គីឡូម៉ែត្រ ចំណាយពេលប្រហែល ៣៥នាទី។ លោកអ្នកអាចទៅដល់ទឹកធ្លាក់តាដាសច្ចំបាន តាមបណ្តោយផ្លូវទឹកឈូ ហួសរមណីយដ្ឋានទឹកឈូបន្តិច នៅខាងឆ្វេងដៃ លោកអ្នកនឹងឃើញស្លាកសញ្ញាមួយដាក់ថា រមណីយដ្ឋានទឹកធ្លាក់តាដាសច្ចំ។
រមណីយដ្ឋានធម្មជាតិនេះ ត្រូវបានបង្កើតឡើងនៅឆ្នាំ២០១៤ មានកម្ពស់ ២៧ម៉ែត្រ មានល្បាក់ថ្ម៣ជាន់។ នៅទីនោះ ជាតំបន់មានទឹកធ្លាក់ ជាមួយនឹងធម្មជាតិខៀវស្រងាត់ អាចនាំអារម្មណ៍ភ្ញៀវទេសចររំសាយទុក្ខកង្វល់ គយគន់ទេសភាពដ៏ស្រស់ស្អាតមួយនេះ។ មិនតែប៉ុណ្ណោះ លោកអ្នកក៏អាចទិញផ្លែឈើធម្មជាតិ ដូចជាធុរេន ចេក ខ្នុរ ដែលលក់ដោយប្រជាជននៅតំបន់នោះជាដើម។
២.ទឹកធ្លាក់ ជ្រោះឱម៉ាល់
រមណីយដ្ឋាន ទឹកធ្លាក់ឱម៉ាល់ ជាតំបន់ទេសចរណ៍មួយកន្លែងដែលមិនសូវមាននរណាបានស្គាល់ឡើយ ព្រោះផ្លូវចូលទឹកធ្លាក់មួយនេះ ជាផ្លូវភ្នំ រៀងពិបាកធ្វើដំណើរ ជាពិសេសក្នុងរដូវវស្សា។ សម្រាប់ភ្ញៀវទេសចរដែលចង់ធ្វើដំណើរកំសាន្តទៅកាន់ទីនោះ អាចជិះម៉ូតូ ឬ កង់ ឬដើរថ្មើរជើងបាន ចំពោះរថយន្តមិនអាចចូលទៅបានឡើយ។ នៅទឹកធ្លាក់ជ្រោះឱម៉ាល់ មានទឹកធ្លាក់ត្រជាក់ដូចទឹកកក អមជាមួយទេសភាពខៀវស្រងាត់ ត្រជាក់ភ្នែក ខ្យល់អាកាសបរិសុទ្ធ នាំអារម្មណ៍លោកអ្នកស្រស់ស្រាយ បានទៅហើយចង់ទៅម្តងទៀត។
ទឹកធ្លាក់ជ្រោះឱម៉ាល់ ស្ថិតនៅក្នុងភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ខេត្តកំពត មានចម្ងាយ ប្រហែល ១១គីឡូម៉ែត្រ ពីទីរួមខេត្តកំពត។ លោកអ្នកអាចធ្វើដំណើរទៅដល់ទីនោះបាន តាមបណ្តោយផ្លូវទឹកឈូ។
៣.ទឹកធ្លាក់៩ជាន់
ទឹកធ្លាក់៩ជាន់ ស្ថិតនៅក្នុង ភូមិអន្លង់ក្មេងលេង ឃុំតេជោអភិវឌ្ឍន៍ ស្រុកឈូក ខេត្តកំពត ជាប់នឹងព្រំប្រទល់ស្រុកភ្នំស្រួចខេត្តកំពង់ស្ពឺ។ សម្រាប់ភ្ញៀវទេសចរអាចធ្វើដំណើរកម្សាន្តនៅទីនោះបានតាមរយៈផ្លូវជាតិលេខ៤។ មិនខុសពីទឹកធ្លាក់ផ្សេងៗ ទឹកធ្លាក់៩ជាន់ មានទេសភាពស្អាត ទឹកធ្លាក់ជាថ្នាក់ៗ ទាបៗ ព្រៃឈើព័ទ្ធជុំវិញទឹកជ្រោះ ជាមួយនឹងទឹកត្រជាក់ចិត្ត។
៤.ទឹកធ្លាក់វាលពួច
លោកអ្នកដែលចង់ទៅកម្សាន្ត ទឹកធ្លាក់វាលពួច នៅខេត្តកំពត ចំណាយពេលត្រឹមប្រមាណ ៨នាទី ឬ ៨គីឡូម៉ែត្រប៉ុណ្ណោះពីទីរួមខេត្តកំពត តាមវត្តវាលពួច ជិតជើងភ្នំបូកគោ។ បន្ទាប់មក ភ្ញៀវទេសចរត្រូវដើរថ្មើរជើងប្រមាណជិត ៣០នាទីទៀត នឹងឃើញទឹកធ្លាក់វាលពួចយ៉ាងថ្លាឈ្វេង គួរឱ្យចង់លេង។ លោកអ្នកអាចលេងទឹកធ្លាក់នេះ ស្តាប់សម្លេងបក្សាបក្សីយំក្នុងព្រៃ នឹងធ្វើឱ្យអារម្មណ៍អ្នកកាន់តែស្រស់ស្រាយបន្ថែមទៀត។
៥. ទឹកធ្លាក់អន្លង់ធំ
រមណីយដ្ឋានទឹកធ្លាក់អន្លង់ធំនេះ គេអាចហៅបាន៣ឈ្មោះផ្សេងទៀតដូចជា ទឹកជ្រោះអន្លូងធំ ព្រែកត្នោត, ទឹកជ្រោះព្រែកត្នោត និងទឹកធ្លាក់អន្លង់ខៀវ មានទេសភាពស្រស់ស្អាត ជារមណីយដ្ឋានមានលក់ម្ហូបអាហារគ្រប់មុខ និងជួលកន្លែងអង្គុយលេងផងដែរ។ ទឹកធ្លាក់អន្លង់ធំ ស្ថិតនៅភូមិព្រែកក្រែង ឃុំព្រែកត្នោត ស្រុកទឹកឈូ ខេត្តកំពត មានចម្ងាយប្រហែល ៣២គីឡូម៉ែត្រ ពីរង្វង់មូលធុរេន៕
អត្ថបទ៖ អុន ស្រីមាន
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង