ព័ត៌មានជាតិ

កម្ពុជា បញ្ជូនពលករជំនាញ និងកម្មសិក្សាការី ២ ម៉ឺននាក់ ទៅធ្វើការ និងសិក្សានៅជប៉ុន ១០ ខែ

បានផុស

៤ ខែ មុន

នៅ

ថ្ងៃសៅរ៍ ១៩ វិច្ឆិកា ២០២២

ដោយ

កម្ពុជា បញ្ជូនពលករជំនាញ និងកម្មសិក្សាការីប្រមាណ ២ ម៉ឺននាក់ ទៅធ្វើការ និងសិក្សា នៅប្រទេសជប៉ុន ក្នុងរយៈពេល ១០ ខែ ឆ្នាំ ២០២២ ដែលបានចូលរួមលើកស្ទួយដល់សេដ្ឋកិច្ចគ្រួសារ និងសេដ្ឋកិច្ចជាតិ កាន់តែរីកចម្រើនថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អន ប៊ុនហាក់ ប្រធានសមាគមទីភ្នាក់ងារហត្ថពលកម្មកម្ពុជាបានឲ្យដឹងនៅព្រឹកថ្ងៃទី ១៩ វិច្ឆិកានេះថា កម្ពុជា ទើបចាប់ផ្ដើមបញ្ជូនពលករជំនាញ និងកម្មសិក្សាការី ទៅធ្វើការនៅប្រទេសជប៉ុន នាខែមីនា ឆ្នាំ ២០២២ នេះទេ ដោយសារប្រទេសជប៉ុន បានបិទព្រំដែន ដែលបណ្ដាលមកពីការឆ្លងរាតត្បាតជំងឺកូវីដ-១៩។

លោក អន ប៊ុនហាក់ បានបន្តថា រយៈពេល ១០ ខែនេះ យើងបានបញ្ជូនពលករ និងកម្មសិក្សាការីទៅប្រទេសជប៉ុន ប្រមាណ ២ ម៉ឺននាក់។ ក្នុង ១ ខែៗ យើងអាចបញ្ជូនពលករ និងកម្មសិក្សាការីប្រមាណពី ៣០០០ ទៅ ៤០០០ នាក់ ទៅសិក្សា និងធ្វើការនៅជប៉ុនបានទៀងទាត់ឡើងវិញ។

លោកបានបន្ថែមទៀតថា ក្នុងចំណោមពលករខ្មែរទៅធ្វើការនៅជប៉ុន ភាគច្រើនជាកម្មសិក្សាការី។ ចំណែកពលករជំនាញមានមិនច្រើនទេ ដោយពួកគេទៅធ្វើការលើផ្នែកវេចខ្ចប់ សំណង់ ចំណីអាហារ សេវាកម្ម សណ្ឋាគារ ភោជនីយដ្ឋាន កសិកម្មដាំដុះ និងចិញ្ចឹមសត្វ។

លោកបានបន្ថែមថា ចំពោះនីតិវិធី និងបែបបទសុខាភិបាលក្នុងការបញ្ជូនពលករខ្មែរទៅប្រទេសជប៉ុន មិនតម្រូវឲ្យធ្វើចត្តាឡីស័កទៀតទេ ដោយសារ កម្ពុជា ជាប្រទេសមួយដែលស្ថិតនៅក្នុងប្រទេសមានហានិភ័យទាបកម្រិតលេខ ១។ ពោលគឺ ប្រទេសដែលមានឆ្លងជំងឺកូវីដតិចតួច ឬមិនមានឆ្លង ហើយក៏មិនកំណត់ប្រភេទវ៉ាក់សាំងដែរ ទោះពលករចាក់វ៉ាក់សាំងស៊ីណូវ៉ាក់ ស៊ីណូហ្វាម អាស្ត្រាហ្សេនេកា ភីហ្វាយហ្សឺ ក៏អាចចូលទៅក្នុងប្រទេសជប៉ុនបានដែរ។

គួរបញ្ជាក់ថា បច្ចុប្បន្ននេះមានពលករខ្មែរប្រមាណជាង ១ លាន ៣ សែននាក់ ធ្វើការនៅក្រៅប្រទេស។ ក្នុងនោះនៅថៃមានច្រើនជាងគេ រហូតដល់ទៅ ១,២២ លាននាក់ , កូរ៉េខាងត្បូងជាង ៤៥០០០ នាក់ , ម៉ាឡេស៊ី ២៣០២៧ នាក់ , ជប៉ុន ១១៤៥៣ នាក់ , សិង្ហបុរី ៨២១ នាក់ , ចិនហុងកុង ២០២ នាក់ , និងអារ៉ាប៊ីសាអូឌីត ៤៣ នាក់ ដោយក្នុង ១ ឆ្នាំៗ បានផ្ញើថវិកាមកក្រុមគ្រួសារវិញប្រមាណជាង ៣ ពាន់លានដុល្លារផងដែរ៕

អត្ថបទ ៖ សំអឿន

Related Topics:ពលករខ្មែរ