ព័ត៌មានជាតិ

ជំនួបរដ្ឋមន្ត្រីការពារជាតិចិន-អាម៉េរិក គឺជារឿងល្អសម្រាប់អាស៊ាននាឆ្នាំនេះ

បានផុស

៤ years មុន

នៅ

ថ្ងៃពុធ ២៣ វិច្ឆិកា ២០២២

ដោយ

សៀមរាប ៖ ក្នុងសន្និសីទកាសែត នារសៀលថ្ងៃទី២៣ ខែវិច្ឆិកា ឆ្នាំ២០២២នេះ សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិកម្ពុជា និងជាម្ចាស់ផ្ទះនៃកិច្ចប្រជុំ រដ្ឋមន្ត្រីការពារជាតិអាស៊ាន-បូកលើកទី៩ បានថ្លែងប្រាប់អ្នកសារព័ត៌មានជាតិនិងអន្តរជាតិ ថា ក្នុងជំនួបរវាងរដ្ឋមន្ត្រីក្រសួងការពារជាតិចិន និងរដ្ឋមន្ត្រីក្រសួងការពារជាតិអាមេរិក កាលពីថ្ងៃទី២២ម្សិលមិញ គឺជារឿងដ៏ល្អ សម្រាប់អាស៊ាននាឆ្នាំនេះ ព្រោះរឿងរ៉ាវប៉ះពាល់គ្នាបន្តិចបន្តួចកន្លងទៅ អាចនឹងឈានទៅរកភាពល្អប្រសើរឡើងវិញបន្តិចម្តងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី បន្តគូសបញ្ជាក់ថា ទោះបីជំនួបនោះកម្ពុជាមិនបានចូលរួមក្តី តែនេះជាពន្លឺមួយសម្រាប់អាស៊ាន ដែលអាចនិយាយបានថា ភាគីចិននឹងអាមេរិក មានឱកាសជួបពិភាក្សាគ្នាដើម្បីដោះស្រាយបញ្ហាតិចតួចដែលធ្លាប់មានកន្លងមក ហើយក៏ជាផលដ៏ល្អមួយដើម្បីបន្ថយកំដៅផងដែរ។

សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី បន្តគូសបញ្ជាក់ទៀតថា ក្នុងនាមប្រធានអាស៊ាន រដ្ឋមន្ត្រីការពារជាតិ ពិតជាមានមោទនភាពនិងត្រេកអរយ៉ាងខ្លាំងនឹងសង្ឃឹមថា ប្រទែសទាំង២នឹងអាចឈានទៅរកភាពល្អប្រសើរថែមទៀត។

សម្ដេចបានធ្វើការកត់សម្គាល់និងគាំទ្រចំពោះលទ្ធផលនៃកិច្ចប្រជុំអាស៊ាន នឹងបានធ្វើការប្តេជ្ញាចិត្តខ្ពស់ក្នុងការពង្រីកកិច្ចសហប្រតិបត្តិការទូលំទូលាយ ដើម្បី ដោះស្រាយបញ្ហាសន្តិសុខរួម ការពង្រឹងមជ្ឈភាព និងឯកភាពអាស៊ាន ការគិតគូរអំពីវិធីសាស្ត្រឆ្ពោះទៅមុខរួមគ្នា ការរក្សាសន្តិភាព ស្ថិរភាព និងវិបុលភាព នៅក្នុងតំបន់ ក៏ដូចជាការរិះរកនូវកិច្ចសហប្រតិបត្តិការជាក់ស្តែង ឆ្លើយតបនឹងបញ្ហាប្រឈមទាំងបច្ចុប្បន្ន និងអនាគត។

ដោយឡែកនៅកិច្ចប្រជុំរដ្ឋមន្ត្រីការពារជាតិអាស៊ាន-បូកលើកទី៩ នេះសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី បានលើកឡើងដែរថា សមាជិកអាស៊ានទាំងអស់បានយល់ឃើញថា ការដែលមិនហៅប្រទេសមីយ៉ាន់ម៉ា ចូលរួមប្រជុំគឺជារឿងត្រឹមត្រូវបំផុត៕

ដោយ ៖ កុសល