​រដ្ឋមន្ត្រី៖ សិស្សកម្ពុជា​ ២០ ភាគរយ​មានសមត្ថភាព​ប្រណាំង​ប្រជែង​ជាមួយបរទេស​

លោក ហង់ ជួនណារ៉ុន រដ្ឋមន្ត្រីក្រសួង​អប់រំ យុវជន និងកីឡាថ្លែង​នៅក្នុងបទសម្ភាសន៍​ជាមួយកម្ពុជាថ្មីថា សិស្សកម្ពុជាប្រមាណ ២០ ភាគរយមានសមត្ថភាពអាចប្រណាំងប្រជែង​ជាមួយ​បណ្ដាប្រទេស​នៅក្នុងតំបន់ និងអន្តរជាតិ​ ខណៈរាជរដ្ឋាភិបាលកម្ពុជាចង់ឲ្យមានយុវជន និងអ្នកសិក្សាកម្ពុជាកាន់តែច្រើនមានសមត្ថភាព​ខ្ពស់​អាចប្រណាំងប្រជែង​ជាមួយ​ប្រទេស​​មិនត្រឹមតែតំបន់ទេគឺនៅលើពិភពលោក។​

លោក ហង់ ជួនណារ៉ុន បានថ្លែងបន្តថា មានកត្តា ៤ សំខាន់ ដែលអាចប្រែក្លាយយុវជន និងអ្នកសិក្សានៅក្នុងប្រទេស​កម្ពុជា​ឲ្យរីកចម្រើន​គឺកត្តាសាលារៀន​ នាយកសាលា ​ កត្តាសិស្ស និងកត្តាគ្រួសារ​ដែលចូលរួមជួយគាំទ្រ។ កត្តាទាំង ៤ នេះ​មិនអាចខ្វះបានទេ​គឺរាជរដ្ឋាភិបាល​នឹងវិនិយោគបន្តទៅលើសាលារៀន​ កែលម្អធនធានសិក្សា កែលម្អការបណ្ដុះ​បណ្ដាលគ្រូ ខណៈកត្តាសិស្ស និងគ្រួសារក៏ចាំបាច់ផងដែរ។

បើតាមរដ្ឋមន្ត្រីក្រសួងអប់រំ រាជរដ្ឋាភិបាលបានបន្តលើកទឹកចិត្ត​ឲ្យសាលារៀនទាំងអស់​ចូលរួមចំណែក​ក្នុងការពង្រឹងគុណភាព​អប់រំធ្វើឲ្យគ្រូមានគុណវុឌ្ឍខ្ពស់ឆ្លើយតបទៅនឹងតម្រូវការ នៃការអភិវឌ្ឍវិស័យអប់រំ។

សាលារៀនមាន​នៅទីក្រុង និងជនបទ ​ដោយចង់ឲ្យសាលារៀនទាំងអស់អាចពង្រឹងខ្លួនឯងបាន ​ហើយឲ្យយុវជនកម្ពុជាមានទាំងចំណេះដឹងទូលំទូលាយ និង​មានបំណិនទាំងផ្នែកបច្ចេកទេស និងបំណិនសត្សវត្សទី២១។

​លោករដ្ឋមន្ត្រីក្រសួងអប់រំបញ្ជាក់ថា បំណិនទន់សត្សវត្សទី២១ មានទាំងវិជ្ជាសម្បទា បំណិនសម្បទា បំណិនត្រិះរិះ​ពិចារណា បំណិនដោះស្រាយបញ្ហា បំណិនបច្ចេកវិទ្យា បំណិនឌីជីថល ភាពជាអ្នកដឹកនាំមានសហគ្រិនភាព ចេះបង្កើតការងារដោយខ្លួនឯង។

លោក ហង់ ជួនណារ៉ុនអះអាងថា មានតែការអភិវឌ្ឍធនធានមនុស្សឲ្យមានគុណភាពខ្ពស់ទេ ទើបអាច​ជួយកម្ពុជាឲ្យសម្រេចបានតាម​យុទ្ធសាស្ត្ររបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ដែលសម្ដេចចង់ប្រែក្លាយកម្ពុជា​ឲ្យទៅជាប្រទេស​ដែលមានប្រាក់ចំណូលមធ្យមកម្រិតខ្ពស់​នៅឆ្នាំ ២០៣០ និងក្លាយទៅជាប្រទេសរីកចម្រើន​នៅឆ្នាំ ២០៥០៕

អត្ថបទ៖ ឡេង ដេត