ភាពទាក់ទាញដ៏សម្បូរបែបរបស់ខេត្តព្រះសីហនុ បានធ្វើឱ្យខេត្តជាប់មាត់សមុទ្រមួយនេះ ទទួលបានការចាប់អារម្មណ៍ និងស្រូបទាញភ្ញៀវទេសចរជាខ្លាំង។ ជាក់ស្តែង នៅចុងសប្តាហ៍នៃខែ ធ្នូ ពោលគឺចាប់ថ្ងៃទី ១៩-២៥ ធ្នូ មានទេសចរទៅកម្សាន្តនៅខេត្តព្រះសីហនុប្រមាណ ១៩០,០១៥នាក់។ នេះបើតាមរបាយការណ៍ប្រចាំសប្តាហ៍របស់​ក្រសួងទេសចរណ៍។ បន្ទាប់ពីខេត្តព្រះសីហនុ ខេត្តសៀមរាប ទទួលបានភ្ញៀវទេសចរ ៧៦,០២២នាក់, រាជធានីភ្នំពេញ ៣២,១៧៥នាក់, ខេត្តកំពត ២៧,៦៨១នាក់, ខេត្តបាត់ដំបង ១៩,៩៧០នាក់, ខេត្តកំពង់ចាម ១៤,១៦១នាក់ និងខេត្តកែប ចំនួន ១០,៨៧៨នាក់។

បើតាមក្រសួងទេសចរណ៍ សរុបនៅទូទាំងប្រទេសចាប់ពីថ្ងៃទី១៩-២៥ ខែធ្នូ ឆ្នាំ២០២២ ទទួលបានភ្ញៀវទេសចរ ចំនួន ៤៣៩,០៤៦នាក់ ក្នុងនោះភ្ញៀវជាតិមាន៤០២,៣៤៧នាក់ និងភ្ញៀវបរទេសមាន៣៦,៦៩៩នាក់។

ដោយឡែកនាឱកាសឆ្លងឆ្នាំខាងមុខ មន្ទីរទេសចរណ៍ នៅតាមបណ្តាខេត្តនានា បានរៀបចំពិធីលេងកម្សាន្តជាច្រើន ដើម្បីទាក់ទាញទេសចរ បន្ថែមទៀត។ ជាក់ស្តែងប្រធានមន្ទីរទេសចរណ៍ខេត្តកំពត រំពឹងថា នឹងទទួលបានភ្ញៀវទេសចរ រាប់ម៉ឺននាក់ នៅថ្ងៃឆ្លងឆ្នាំសកលខាងមុខ ដោយរដ្ឋបាលខេត្ត នឹងរៀបចំព្រឹត្តិការណ៍ជាច្រើន រួមមាន ការប្រគំតន្ត្រីខ្នាតធំ ចំនួន ៣ទីតាំង  ការប្រកួតកីឡាប្រដាល់ និងគុនល្បុក្កតោ ពិធីប្រណាំងទូកនេសាទ និងទូកនាគ ទិដ្ឋភាពម៉ូតូហោះ​លើអាកាស ការបាញ់កាំជ្រួច នៅយប់ថ្ងៃទី៣០ និងយប់ឆ្លងឆ្នាំ ព្រមទាំងកសរទស្សនានាឡិកា យក្សដាក់តាំងនៅលើ ស្ពានឥន្ទធនូជាដើម៕