ព័ត៌មានជាតិ

ក្រុមហ៊ុនជប៉ុនពីរ កំពុងលេចធ្លោបោះទុនរយលានដុល្លារវិនិយោគនៅកម្ពុជា

បានផុស

២ ខែ មុន

នៅ

ថ្ងៃពុធ ១១ មករា ២០២៣

ដោយ

ជប៉ុនជាប្រទេសមហាអំណាចសេដ្ឋកិច្ចធំទី ៣ របស់ពិភពលោក។ ប្រទេសប្រជុំកោះនេះជឿនលឿនលើផ្នែកឧស្សាហកម្មផលិតកម្ម ដែលជាវិស័យសក្ដានុពលរបស់ជប៉ុន។

នៅកម្ពុជាមិនទាន់ក្រុមហ៊ុនជប៉ុនធំៗច្រើនមកវិនិយោគទេ។ យ៉ាងណាមិញបច្ចុប្បន្នក៏ឃើញមានក្រុមហ៊ុនជប៉ុនមួយចំនួនចាប់ផ្ដើមសម្លឹងលើទីផ្សារកម្ពុជា លើការវិនិយោគលើវិស័យសក្តានុពលមួយចំនួន។

ក្រុមហ៊ុន មីនីបៀរ

ក្រុមហ៊ុនមិនីបៀរ ជាក្រុមហ៊ុនផលិតគ្រឿងបង្គំដ៏ធំមួយរបស់ជប៉ុន ដែលបានបើកប្រតិបត្តិការអាជីវកម្មជាង ១១ ឆ្នាំនៅកម្ពុជាតាំងពីឆ្នាំ ២០១១ មក។ ក្រុមហ៊ុនបានចាប់ផ្ដើមពីទុនប្រមាណជា ២៣ លានដុល្លារនិងកម្មករជាង១០០០ នាក់ ឥឡូវនេះក្រុមហ៊ុនបានពង្រីកទុនរហូតដល់ជាង ៦០០លានដុល្លារជាមួយកម្មករជាង ៦ពាន់នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចតេជោ ហ៊ុន សែន ធ្លាប់បានថ្លែងនៅក្នុងពិធីសម្ភោធរោងចក្រក្រុមហ៊ុនមីនីបៀរកាលពីឆ្នាំ២០១១ ដោយចាត់ទុកក្រុមហ៊ុននេះដូចជាកូនបង្កើត ដែលត្រូវចិញ្ចឹមបីបាច់ថែរក្សាឲ្យរីកលូតលាស់ធំធាត់បានល្អ។

ក្រុមហ៊ុន Minebea មានទីតាំងវិនិយោគនៅក្នុងតំបន់សេដ្ឋកិច្ចពិសេសភ្នំពេញ រហូតដល់បច្ចុប្បន្នក្រុមហ៊ុនផលិតម៉ូទ័រខ្នាតតូចសម្រាប់ប្រើប្រាស់ក្នុងឧបករណ៍អេឡិចត្រូនិក និងប្រព័ន្ធភ្លើង LED ជាដើម។

ក្រុមហ៊ុនអារ៉ាខាវ៉ា

អារ៉ាខាវ៉ាជាគឺជាក្រុមហ៊ុនជប៉ុនដ៏ធំមួយដែលរកស៊ីលើវិស័យអចលនទ្រព្យ ដែលបង្កើតឡើងក្នុងឆ្នាំ២០០៨។ បន្ទាប់ពីទទួលបានជោគជ័យក្នុងការសាងសង់ និងដាក់ឲ្យដំណើរការអាផាតមិន Bellevue Serviced Apartments ក្រុមហ៊ុនកំពុងអភិវឌ្ឍគម្រោងលំនៅឋានអារ៉ាខាវ៉ាតម្លៃធូរថ្លៃនៅតំបន់ទឹកថ្លា ក្នុងខណ្ឌសែនសុខ។

លំនៅឋានអារ៉ាខាវ៉ា ដែលមានម្ចាស់ភាគហ៊ុនធំជាជនជាតិជប៉ុន មកទល់ពេលនេះបានចំណាយទុនវិនិយោគប្រមាណ ១០០ លានដុល្លារ ដើម្បីសាងសង់លំនៅឋានបែបប្រណិត មានគុណភាពខ្ពស់ ស្តង់ដារជប៉ុនសម្រាប់ពលរដ្ឋខ្មែរដែលមានចំណូលទាបនិងមធ្យម នៅកណ្ដាលក្រុងភ្នំពេញ។

លំនៅឋានអារ៉ាខាវ៉ា ត្រូវបានអ្នកជំនាញវាយតម្លៃថា ជាលំនៅឋានស្តង់ដារជប៉ុនទី១ នៅកម្ពុជា ដែលបានក្លាយទៅជាគំរូនៃលំនៅឋាន ឬសំណង់អគារនានា ដែលមានគុណភាពតាមស្តង់ដារជប៉ុនពិតប្រាកដ។

គម្រោងលំនៅឋានអារ៉ាខាវ៉ា បានសាងសង់លើផ្ទៃដីជាង១.៣ ហិកតាមានសំណង់អគារសរុបចំនួន១៦ និងមានកម្ពស់ ២១ ជាន់ស្មើៗគ្នា។

ក្រៅពីក្រុមហ៊ុនជប៉ុនទាំងពីរនេះ ក៏មានក្រុមហ៊ុនជប៉ុនមួយចំនួនទៀតកំពុងវិនិយោគលើវិស័យផ្សេងៗ។

បើតាមប្រធានសមាគមពាណិជ្ជកម្មជប៉ុននៅកម្ពុជា រហូតមកដល់ពេលនេះមានក្រុមហ៊ុនជប៉ុនប្រមាណជាង ២៥០ ក្រុមហ៊ុនកំពុងវិនិយោគនៅប្រទេសកម្ពុជាភាគច្រើនផ្តោតលើវិស័យទូទៅដូចជាធនាគារ វិស័យសំណង់និងវិស័យធានារ៉ាប់រងជាដើម។

លោក កាន់ដា យូហ្គូ (KANDA YOGO) ប្រធានសមាគមពាណិជ្ជកម្មកម្ពុជាជប៉ុនបានបញ្ជាក់ថា ក្រៅពីក្រុមហ៊ុនជប៉ុនជាង ២៥០ ដែលបានចុះបញ្ជីនៅសមាគម នៅមានក្រុមហ៊ុនច្រើនទៀតដែលកំពុងវិនិយោគនៅកម្ពុជាតែមិនបានចុះបញ្ជីជាមួយសមាគម។

ក្នុងចំណោមក្រុមហ៊ុនជាង ២៥០ ក្នុងនោះមាន ២៥ ភាគរយ វិនិយោគលើវិស័យកម្មមន្តសាល ២៥ភាគរយវិនិយោគលើពាណិជ្ជកម្មនិងសេវាកម្ម និង៥០ភាគរយទៀតវិនិយោគលើវិស័យទូទៅដូចជាធនាគារ វិស័យសំណង់និងវិស័យធានារ៉ាប់រងជាដើម៕