ផ្លូវក្រាលកៅស៊ូ DBST ជាង ៤គីឡូម៉ែត្រ កំពុងលេចរូបរាងឡើង ក្នុងសង្កាត់បាទី ក្រុងបាវិត

(ខេត្តស្វាយរៀង): ផ្លូវកំពុងក្រាលកៅស៊ូDBSTមួយខ្សែប្រវែង៤៥០០ម៉ែត្រទទឹង៧ម៉ែត្រ ដែលជាអំណោយ​របស់រាជរដ្ឋាភិបាលកម្ពុជា ផ្តល់តាមរយ:ក្រសួងអភិវឌ្ឍន៍ជនបទស្ថិតក្នុងសង្កាត់បាទី ក្រុងបាវិត ខេត្តស្វាយរៀង បាននិងកំពុងលេចចេញជារូបរាងជាបណ្តើរៗ សម្រាប់ជាចំណងដៃថ្មីរបស់ប្រជាពលរដ្ឋក្នុងឆ្នាំ២០២៣នេះ។

អ្នកស្រី វ៉ា ចាន់ដាវី ពលរដ្ឋម្នាក់រស់នៅភូមិថ្នាញ សង្កាត់បាទី ក្រុងបាវិត បានលើកឡើងថា ថ្នល់១ខ្សែនេះ កាលពីមុនមានការលំបាកខ្លាំងណាស់ នៅខែវស្សាមានទឹកដក់ត្រឹមជង្គង់ ពិបាកក្នុងការធ្វើដំណើរ។ ឥឡូវនេះបានរាជរដ្ឋាភិបាលមកធ្វើផ្លូវក្រាលកៅស៊ូមួយខ្សែនេះដោយបានចាក់កៅស៊ូ DBST ហើយក៏លែង​មានការលំបាកដល់ប្រជាជនទៀតហើយ។

អ្នកស្រី បានបន្តថា បងប្អូនប្រជាពលរដ្ឋទូទៅគឺជួបការលំបាកយូរហើយ តែក្រោយទទួលបានថ្នល់​ថ្មីគឺមានចិត្តសប្បាយរីករាយណាស់។

លោក គឹម ថុន ជាអ្នកធ្វើដំណើរឆ្លងកាត់ផ្លូវមួយខ្សែខាងលើនេះក៏បានលើកឡើងផងដែរថា កន្លងមកផ្លូវនេះមាន​ការលំបាកចាប់ពីផ្លូវដងទង់ រហូតដល់ផ្លូវបាវិតនេះ។ ក្រោយឃើញ លោកចៅសង្កាត់ធ្វើផ្លូវល្អឲ្យប្រជាពលរដ្ឋធ្វើដំណើរ ទោះបីជាពេលនេះមិនទាន់បានស្រួលក៏ពិតមែនប៉ុន្តែនៅពេលបានក្រាលកៅស៊ូហើយ នឹងស្រួលធ្វើដំណើរ។

សូមរំលឹកផងដែរថា ផ្លូវក្រាលកៅស៊ូDBST ប្រវែង៤៥០០ម៉ែត្រទទឹង៧ម៉ែត្រ ស្ថិតនៅក្នុងសង្កាត់បាទី ក្រុងបាវិត ត្រូវបានបើកការដ្ឋានសាងសង់ជាផ្លូវការកាលពីថ្ងៃទី៧ខែ ខែធ្នូ ឆ្នាំ២០២២ ក្រោមអធិបតីភាពលោក លឹម សៀងហេង អភិបាលក្រុងបាវិត៕ ដោយ:ភក្ដី