ផ្លែគុយប្រមូលផលដំបូង លក់បាន ១គីឡូ ៦-៧​ម៉ឺនរៀល

អ្នកស្រី ដាង ចិន្ថា ជាអាជីវករមួយរូប ប្រកបរបរលក់ផ្លែឈើព្រៃតាមរដូវ និងម្ជូរ នៅក្បែរចិញ្ចើមថ្នល់ជិតរង្វង់មូល សម្តេច ជួន ណាត រាជធានីភ្នំពេញ បានឱ្យកម្ពុជាថ្មីដឹងថា តម្លៃផ្លែគុយខ្ពស់បំផុតនៅអំឡុងពេលប្រមូលផលដើមដៃ (ជាពេលដែលគុយនៅមានតិច) ហើយចុះថ្លៃទាបបំផុត ក្នុងអំឡុងពេលប្រមូលផលចុងដៃ ពោលគឺពេលផ្លែគុយបានផលច្រើន។

បើតាមអ្នកស្រី ដាង ចិន្តា រដូវកាលផ្លែគុយ គឺមានរយៈពេលប្រហែលជា ៤ខែ ដោយរាប់ចាប់ពីអំឡុងខែមករាទៅ ហើយក្នុងមួយរដូវកាល គឺគាត់អាចលក់បានចន្លោះ ៥-៦ខែ ។

អាជីវកររូបនេះ ប្រាប់ឱ្យដឹងទៀតថា គុយ មានតម្លៃខ្ពស់បំផុត នៅពេលប្រមូលផលដើមដៃ (អំឡុងខែមករា) ព្រោះ​តែ​ពេលវេលានេះ ផលផ្លែឈើព្រៃមួយប្រភេទនេះនៅមានតិចតួច ហើយអំឡុងពេលប្រមូលផលដំបូង អាជីវករអាចលក់បានចន្លោះពី ៦ម៉ឺនរៀល/គីឡូក្រាម ដល់ ៧ម៉ឺនរៀល/គីឡូក្រាម។

អ្នកស្រី ចិន្តា បន្តថា នៅខែបន្ទាប់ចន្លោះខែកុម្ភៈ-មីនា តម្លៃផ្លែគុយ គឺធ្លាក់ថ្លៃមកនៅត្រឹមប្រហែល ៤ម៉ឺនរៀល/គីឡូក្រាម ហើយនិងចុះថោកនៅត្រឹមប្រមាណ ២ម៉ឺនរៀលប៉ុណ្ណោះ ក្នុង១គីឡូក្រាម នៅអំឡុងខែមេសា ដែលជាពេលប្រមូលផល ចុងដៃ។

គួរបញ្ជាក់ថា ផ្លែគុយដែលគាត់លក់ មានប្រភពពីខាងស្រុកស្រែអំបិល ខេត្តកោះកុង (ទិញពីឈ្មួញកណ្តាល) ជាផ្លែឈើព្រៃមួយប្រភេទ ដែលមានតម្លៃថ្លៃជាងគេបង្អស់ បើធៀបទៅជាមួយផ្លែឈើព្រៃដទៃទៀត ដែលអាជីវករ និយមលក់ រួមមាន ផ្លែសាវម៉ាវ សិរមាន់ គូលែនព្រៃ-ល-៕