ទំនេរពីការសិក្សាយុវជនមួយក្រុម ចូលព្រៃបេះផ្លែគុយលក់ ផ្គត់ផ្គង់ការរៀនសូត្រ និងជួយគ្រួសារ

យុវជនមួយក្រុមមានគ្នាជិត១០នាក់ រស់នៅក្នុងខេត្តមណ្ឌលគិរី ទំនេរពីការសិក្សា នាំគ្នាចូលព្រៃបេះផ្លែគុយយកមកលក់ដើម្បីយកថវិកាសម្រាប់ផ្គត់ផ្គង់ការរៀនសូត្រ និងគ្រួសារ។ ដំណើរស្វែងរកប្រាក់ចិញ្ចឹមជីវិត ស្របពេលចូលដល់ខែមេសានេះ រដូវផ្លែគុយព្រៃបានឈានចូលមកដល់ហើយ និងកំពុងទុំល្អ ហើយប្រជាពលដ្ឋរស់នៅក្នុងភូមិបាននាំគ្នាសម្រុកចូលបេះផ្លែនេះដើម្បីបរិភោគផង និងលក់ទៅកាន់លើទីផ្សារ។

យុវជនឈ្មោះ កក្កដា អាយុ២០ឆ្នាំ រស់នៅឃុំចុងផ្លាស់ ស្រុកកែវសីមា បានថ្លែងប្រាប់កម្ពុជាថ្មីថា រាល់ពេលរដូវផ្លែគុយចូលមកដល់ រូបគេនិងមិត្តភ័ក្តិទំនេរពីការសិក្សា តែងតែនាំគ្នាចូលព្រៃដើម្បីបេះផ្លែគុយលក់បន្តទៅឱ្យឈ្មួញក្នុងតម្លៃ ១០ ០០០ រៀលក្នុងមួយគីឡូ។ ក្នុងមួយថ្ងៃក្រុមពួកគេ អាចរកបានចន្លោះពី ៥ទៅ ១០ គីឡូ។ យុវជន កក្កដា រៀបរាប់ថា៖« ជាទម្លាប់រាល់ឆ្នាំឱ្យតែចូលដល់ពាក់កណ្ដាលខែមេសា ដល់ចុងខែឧសភា ផ្លែគុយព្រៃចាប់ផ្ដើមសម្បូរខ្លាំងហើយ ដូច្នេះខ្ញុំនិងប្រជាពលរដ្ឋដែលរស់នៅក្បែរព្រៃសហគមន៍ តែងសម្រុកចូលបេះផ្លែមកលក់»។

ទោះបីជាផ្លែគុយសម្បូរ ប៉ុន្តែពិបាករក ដោយសារដើមរុក្ខជាតិព្រៃម្យ៉ាងនេះដុះតោងដើមឈើធំៗ ខ្ពស់ៗក្នុងព្រៃក្រាស់
ដូច្នេះពេលឡើងដើមម្តងៗ ទម្រាំបេះបានត្រូវចំណាយពេល និងប្រឈមគ្រោះថ្នាក់។ យុវជនរូបនេះ អះអាងថា ថវិកាដែលរកបានគឺសម្រាប់ចំណាយទៅលើថ្លៃការសិក្សា និងមួយផ្នែកសម្រាប់ផ្គត់ផ្គង់គ្រួសារ។

បើតាមយុវជន កក្កដា អះអាងថា សម្រាប់ផ្លែគុយព្រៃធម្មជាតិនៅខេត្តមណ្ឌលគិរី មានរសជាតិផ្អែមឆ្ងាញ់មិនសូវជូរខ្លាំងនោះទេ។ ការជួយគាំទ្រភោគផលពីសហគមន៍ព្រៃឈើ រួមចំណែកលើកកម្ពស់សហគមន៍គ្រួសារ ជាពិសេស រួមចំណែកកាត់បន្ថយការកាប់ព្រៃឈើខុសច្បាប់៕

អត្ថបទ៖ រៀម សុខហេង