ជនជាតិដើមភាគតិចព្នងនៅខេត្តមណ្ឌលគិរី អំពាវនាវអ្នកទេសចរបន្តគាំទ្រផ្លែគុយព្រៃធម្មជាតិ ដែលពួកគាត់បេះផ្ទាល់ដៃ

នៅសល់តែពីរសប្ដាហ៍ទៀតតែប៉ុណ្ណោះ ផ្លែគុយព្រៃនៅខេត្តមណ្ឌលគិរីចាប់ផ្ដើមស្បើយហើយ ខណៈភ្លៀងកាន់តែធ្លាក់ជោគជាំ។

លោក គប់ ឈៀង អាយុ៣០ឆ្នាំ មានទីលំនៅភូមិពូឆប ឃុំដាក់ដាំ ស្រុកអូររាំង ខេត្តមណ្ឌលគិរី បានរៀបរាប់ថា គាត់មានមុខរបរធ្វើស្រែចម្ការហើយពេលទំនេរពីស្រែចម្ការក៏ឆ្លៀតចូលទៅក្នុងព្រៃសហគមន៍បេះផ្លែគុយព្រៃយកមកលក់ឲ្យអាជីវករលក់បន្តនៅក្រុងសែនមនោរម្យគ្រាន់បានប្រាក់កាសផ្គត់ផ្គង់គ្រួសារបន្ថែម។ លោកបន្តថា ផ្លែគុយព្រៃក្នុងមួយថ្ងៃគាត់អាចបេះបានចន្លោះពី១៦គីឡូ ដល់២០គីឡូក្រាម ហើយផ្លែគុយព្រៃក្នុងខេត្តមណ្ឌលគិរីនេះ ជាទម្លាប់ពេលវាទុំចាប់ពីពាក់កណ្តាលខែមេសា រហូតទៅដល់ពាក់កណ្តាលខែឧសភាទើបស្បើយ។

លោក គប់ ឈៀង បញ្ជាក់ថា ក្នុងមួយសប្ដាហ៍មុនពេលគាត់បេះមកលក់ឲ្យអាជីវករលក់មួយរយៈមុន គឺមិនសូវមានគេទទួលទិញប៉ុន្មាននោះទេ ដោយសារផ្លែគុយព្រៃនេះ មានពលរដ្ឋផ្សេងនាំគ្នាសម្រុកបេះច្រើនដែលធ្វើឲ្យផ្លែគុយមាននៅតាមទីផ្សារច្រើន ហើយពេលខ្លះគាត់មិនអាចលក់អស់ និងត្រូវយកត្រឡប់ទៅផ្ទះវិញ ពេលខ្លះស្ទើរតែបោះចោលទៀតផង។ ប៉ុន្តែមួយរយៈចុងក្រោយនេះ អាជីវករបានទទួលទិញជាហូរហែ ព្រោះផ្លែគុយដែលគាត់បេះយកមកលក់សុទ្ធតែមានរសជាតិផ្អែមឆ្ងាញ់ ដូច្នេះធ្វើឲ្យគាត់មានទឹកចិត្តបន្តបេះផ្លែគុយនេះយកមកលក់ជារៀងរាល់ថ្ងៃ។

លើសពីនេះក៏សូមអំពាវនាវទៅដល់អតិថិជនក៏ដូចភ្ញៀវទេសចរដែលមកកម្សាន្តក្នុងខេត្តមណ្ឌលគិរីមេត្តាជួយគាំទ្រផ្លែគុយព្រៃធម្មជាតិបេះដោយជនជាតិដើមភាគតិចផង ដើម្បីឲ្យលោកអាចរកចំណូលពីការបេះផ្លែគុយព្រៃនេះដើម្បីដោះស្រាយជីវភាពគ្រួសារប្រចាំថ្ងៃនារដូវផ្លែគុយនេះ៕

អត្ថបទ៖ រៀម សុខហេង