កម្ពុជាកាន់តែអភិវឌ្ឍវិស័យឧស្សាហកម្មពីរ​មានតម្រូវការអគ្គិសនីខ្ពស់

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ថា ភូមិដែលតភ្ជាប់បណ្ដាញអគ្គិសនីជាតិ មានរហូតដល់ទៅ ៩៩ ភាគរយ នៃភូមិទូទាំងប្រទេស ខណៈចំនួនផ្ទះ ចំនួនផ្ទះ មានចំនួន ៩០ ភាគរយ។

សម្ដេចតេជោ ហ៊ុន សែន មានប្រសាសន៍នៅក្នុងឱកាសអញ្ជើញពិនិត្យវឌ្ឍនភាព សាងសង់វារីអគ្គិសនីស្ទឹងពោធិ៍សាត់១ នៅថ្ងៃទី ១៤ ខែមីនេះថា សម័យនេះ គឺជាសម័យដែលប្រជាជនប្រើប្រាស់អគ្គិសនី ខណៈរាជរដ្ឋាភិបាលបានខិតខំប្រឹងប្រែងដោះស្រាយបញ្ហាអគ្គិសនីដល់ប្រជាពលរដ្ឋ ដែលមានតាមរបៀបដោះស្រាយដូចជាសាងសង់វារីអគ្គិសនីជាដើម។

វារីអគ្គិសនីជាប្រភពកកើតឡើងវិញដែលមិនប៉ះពាល់ទៅដល់ការប្រែប្រួលអាកាសធាតុ ខណៈកម្ពុជាទាញបានថាមពលអគ្គិសនីកកើតឡើងវិញប្រមាណ ៦២ ភាគរយ។

សម្ដេចតេជោ ហ៊ុន សែន មានប្រសាសន៍ថា នៅទស្សវត្សរ៍ ៩០ កម្ពុជាមានតម្រូវការអគ្គិសនីត្រឹមតែ ៩០ មេ​ហ្គា​វ៉ា​ត់ (MWs) ខណៈកម្រិតនៃការប្រើប្រាស់ទូទាំងប្រទេសបច្ចុប្បនកើនឡើងដល់ ២ ២០០ មេ​ហ្គា​វ៉ា​ត់ (MWs) ហើយតម្រូវការនៅពេលខាងមុខកាន់តែច្រើន។

សម្ដេចតេជោ ហ៊ុន សែន បន្តថា ប្រសិនបើមានអគ្គិសនី មិនត្រឹមតែបញ្ហាបំភ្លឺក្នុងផ្ទះទេ ប្រភពអគ្គិសនីនេះ គឺវានឹងផ្ដល់ឱកាសឱ្យយើង​ជំរុញវិស័យឧស្សាហកម្ម និងវិស័យដ៍ទៃទៀត ដែលមានតម្រូវការប្រើប្រាស់អគ្គិសនី។

សម្ដេចតេជោ ហ៊ុន សែន៖ «ឧស្សាហកម្មរោងចក្រមួយៗ ​គឺប្រើប្រាស់នូវអគ្គិសនី​ ប៉ុន្តែអ្វីដែលធ្ងន់ជាងនេះ គឺសេវាកម្មទេសចរណ៍ត្រូវការអគ្គិសនីធំណាស់»​។

សម្ដេចតេជោ ហ៊ុន សែន ក៏បានចោទសួរថា សណ្ឋាគារមួយដែលមាន ៤០០ ទៅ ៥០០ បន្ទប់ ត្រូវការអគ្គិសនីប៉ុន្មាន? ស្របពេលដែលគ្រួសារនីមួយសុទ្ធតែមានកង្ហា និងម៉ាស៊ីនត្រជាក់ប្រើក្នុងដំណាក់កាលនេះ៕